७७ जिल्लामा पुगेको भनिएको नेपाल टेलिकमको फोरजी सेवामा अझै देखिँदैनन् ग्राहक

काठमाडौं ।

काठमाडौं । नेपाल टेलिकमले आफ्नो १६ औं वार्षिकोत्सव मनाईरहँदा ७७ जिल्लामा फोरजीसेवा बिस्तार भएको जानकारी दिएको छ । कम्पनीले हुम्लाको सिमकोटमा मंगलबार फोरजी जडान र परीक्षण गरेसँगै देशभरका ७७ जिल्लामा फोरजी पुगेको बताएको हो ।

एक वर्षभित्रै देशभर फोरजी सेवा बिस्तार गर्ने सम्झौता गरेको नेपाल टेलिकमले सोहि अनुसार फोरजी सेवा पुर्याएको प्रबन्ध निर्देशक डिल्लिराम अधिकारीलाई उदृत गर्दै आज गोरखापत्रले रिपोर्ट प्रकाशित गरेको छ ।

नेपाल टेलिकमले सबै जिल्लामा फोरजी सेवा पुगेको दाबी गरिरहँदा भने १ वर्षभित्र फोरजी सम्पन्न गर्ने सम्झौताअनुसार भने कामगर्न सकेको छैन् । गत वर्ष माघ २० गते देशभर फोरजी सेवा बिस्तारका लागि ४ हजार २ सय टावरमा फोरजी उपकरणहरु जडान र ६४० वटा नयाँ टावर बिस्तार गर्ने योजना लिएको थियो तर १ वर्षको समय बितिसक्दा पनि कम्पनीले केबल २ हजार ३८ साइटका ३ हजार ६८३ टावरमा मात्र फोरजी उपकरणहरु जडान गर्न सकेको हो । सो अवधिमा करिब २ सय टावरहरु मात्र नयाँ थपिएका छन् ।

यसअघि टेलिकमले फोरजी सेवाको सम्झौता गर्दा ६ हजार ७३७ साइटहरु आउटडोरमा तयार हुने र इन्डोरका लागि ५ हजार ८ सय २५ साइटहरु पुग्ने दाबी गरेको थियो । तर सो अनुसार टेलिकमले १ वर्षमा सेवा बिस्तार गर्न सकेको छैन् ।

त्यसैगरि कम्पनीले सोहि अवधिमा शुरुगर्नुपर्ने भीओएलटिई सेवा पनि दिन सकेको छैन् । जसले गर्दा ४जी नाममात्रको रहेको छ । हाल डाटा चलाईरहेको बेलामा एलटिई आउने भएपनि सोहि समयमा मोबाइलमा फोन आउँदा डाउनफल हुने अझै समस्या ज्यूँका त्यू रहेको छ । तर कम्पनीले यसअघि दाबी गरेजस्तो भीओएलटिई वा भीओवाईफाईको सुविधा अझै उपलब्ध छैन् ।

टेलिकमले आफ्नो प्रगति बिवरणमा पनि भीओएलटिई बारेमा उल्लेख गरेको छैन र केबल एलटिई एडभान्स सेवाको बारेमा मात्र जानकारी दिएको छ ।

टेलिकमले सो अवधिमा निर्माण गर्नुपर्ने नयाँ ६४० टावरहरुको लक्ष्यमध्ये हाल केबल एक तिहाई अर्थात करिब २ सयवटा टावर मात्र निर्माण गर्न सकेको छ भने बाँकी कहिले निर्माण हुन्छ भन्ने स्पष्ट लक्ष्य छैन् । फोरजी देशभर पुगेपछि टेलिकमले ६५ लाख ग्राहकहरु फोरजीमा आबद्ध हुने दाबी गरेकोमा कात्तिक महिनाको नेपाल दूरसंचार प्राधिकरणले सार्वजनिक गरेको तथ्यांक हेर्ने हो भने केबल ८ लाख ३९ हजार ५८० ग्राहकहरुसँग मात्र फोरजी प्रयोग गरिरहेका छन् ।

टेलिकमले भनेको ६५ लाख फोरजी ग्राहकहरुको दाबीमा अझै ५६ लाख ६० हजार भन्दा बढि ग्राहकहरु बाँकी रहेका छन् । ती ग्राहकहरु कहिले फोरजीमा पुग्लान भन्ने नै स्पष्ट छैन् । किनकी नेपाल टेलिकमको पुस महिनाको सक्रिय ग्राहकहरुको संख्या हेर्दा पनि करिब ९० लाख ग्राहकहरु रहेका छन र त्यसमध्ये अधिकांश ३जी र २जीका ग्राहकहरु छन् ।

सक्रिय ग्राहकहरुको संख्याको हिस्सा तिब्ररुपमा बढाउन नै नसकेको टेलिकमले आफ्ना ४ जीका ग्राहकहरु कहिले ६५ लाख पुर्याउला भन्ने पनि प्रश्न आउँछ ।

अर्कोतर्फ टेलिकमले फाइबर टू दि होम अर्थात एफटिटिएच सेवाको बिस्तार गरेर हालसम्म १ लाख भन्दा बढि पुर्याउनुपर्नेमा हालसम्म करिब १२/१३ हजार ग्राहकहरु मात्र सो सेवामा जोडिएका छन् । समयमा शहरी क्षेत्रभित्रै सेवा बिस्तार गर्न नसक्नु, उपयुक्त समयमा मर्मतको सुविधा दिन नसक्नु र कर्मचारीहरुको कमजोर कार्य प्रणाालीले गर्दा पनि टेलिकमले संभावनायुक्त एफटिटिएसको सेवा बिस्तार गर्न सकेको छैन् ।
यी वास्तविक तथ्यांकहरुका बिचमा टेलिकमले आफ्ना फोरजी ग्राहकहरु हालसम्म कति पुगे, भीओएलटिई सेवा कहाँ कहाँ उपलब्ध छ वा एफटिटिएच सेवाका ग्राहकहरु कति पुगे भनेर आफ्नो प्रगति बिबरणमा समेत उल्लेख गर्न सकेको छैन् ।

त्यस्तै आफ्नो ८०० मेगाहर्ज ब्याण्ड र १८०० मेगाहर्ज ब्याण्डमा सेवा दिईरहँदा ती दुबै फ्रिक्वेन्सीको प्रयोगको अवस्था कस्तो छ भन्ने अझै स्पष्ट छैन् । विशेषगरि दूर्गम क्षेत्रमा उपयोगी हुने ८०० मेगाहर्ज ब्याण्डको प्रयोगकर्ताहरुसम्म अझै सो ब्याण्ड भएको मोबाइल फोनहरु पुग्न सकेको छैन् । किनकी ८०० मेगाहर्ज ब्याण्ड भएका मोबाइल फोनहरु केहि महंगा हुने गर्दछन् ।

जसले गर्दा कम्पनीले ८०० मेगाहर्ज ब्याण्डबाट कसरी आम्दानी गर्ने (मनिटाइज)भन्ने चुनौती समेत रहेको छ । अर्कोतर्फ सोहि ब्याण्डमा देखिएको फ्रिक्वेन्सी इन्टरफेरेन्सको समस्यालाई समाधान गर्नुपनि टेलिकमको चुनौती हो । एक प्रकृतिको ब्याण्डमा जिएसएम र सिडिएमए संचालन हुँदा यस्तो समस्या आउने गर्दछ ।