भारत प्रशासित काश्मीरमा २जी इन्टरनेट सेवा शुरु, सोशल मिडिया प्रयोगमा भने अझै रोक

काठमाडौं ।

काठमाडौं । भारत प्रशासित कश्मीरमा प्रशासनले २० जिल्लामा इन्टरनेट सेवा शुचारु गर्ने फैसला लिएको छ । ती २० जिल्लाहरुमा शनिवार बिहानदेखि २जी मोबाइल इन्टरनेट सेवा शुरु गरिएको छ ।

इण्डियन एक्सप्रेसको रिपोर्टअनुसार हाल आंशिक रुपमा इन्टरनेटमा रोक कायम हुनेछ र मानिसहरुले इन्टरनेट सेवाहरुका लागि केबल ३०१ वेबसाइटहरुमात्र प्रयोग गर्न सक्नेछन् । तर इन्टरनेट सुचारु भएपनि सोशल मिडिया एप्सको प्रयोग भने अझै प्रतिबन्धित रहेको छ ।

गएको पाँच अगस्टमा जम्मू कश्मीरबाट भारतीय सरकारले संविधानको विशेष व्यवस्थासहितको धारा ३७० हटाएपछि त्यहा संचार सेवाहरुमा प्रतिबन्ध लगाईएको थियो ।

यसअघि गएको १५ जनवरीमा आवश्यक सेवाहरुका लागि मात्र ब्रोडब्याण्ड सेवाहरु शुरु गरिएको थियो ।

शुक्रबार जारी गरिएको आदेशअनुसार यो इन्टरनेटमा पहुँच ह्वाइटलीस्टमा भएका क्षेत्रहरुमा मात्र सिमित हुनेछ । र नेटवर्कको स्पीड केबल २जीमा नै सिमित हुनेछ भने आगामी ३१ जनवरीपछि यसको समीक्षा गरिने बताईएको छ ।