जापानले हाईटेक मटेरियल दक्षिण कोरिया निर्यातमा प्रतिबन्ध लगाउने, टेक कम्पनीहरु प्रभावित हुने

काठमाडौं ।

काठमाडौं । जापानले स्मार्टफोन डिस्प्लेमा र चीप्समा प्रयोग हुने उच्च तहका हाईटेक सामाग्रीहरु दक्षिण कोरिया निर्यातमा रोक लगाउने भएको छ । जापानी सरकारले यहि जुलाई ४ तारिदेखि लागू हुने गरि नयाँ घोषणा गरेको हो ।

हालै दक्षिण कोरियामा दोस्रो विश्वयुद्धको समयमा भएको फोस्र्ड लेबरको विषयलाई लिएर असन्तुष्टि जनाउँदै सो घोषणा गरेको हो ।

जापानको यो नयाँ निर्यात प्रतिबन्धले विशेषगरि दक्षिण कोरियाली टेक कम्पनीहरु सामसंग इलेक्ट्रोनिक्स, एसके हाईनिक्स र एलजी इलेक्ट्रोनिक्सलाई असर पार्ने बताईएको छ ।

यस्तो प्रतिबन्ध फ्लोरिनेटेड पोलिमाईड सामाग्रीमा लगाईएको छ जून स्मार्टफोनको डिस्प्लेहरुमा प्रयोग गरिन्छ । त्यस्तै उच्च शुद्धता भएको हाईड्रोजन फ्लोराईड, जून सेमिकण्डक्टर बनाउँदा प्रयोग हुने इचिंग ग्यासमा उपयोग हुन्छ ।

जापानले यी दुबै सामाग्रीको उत्पादन र निर्याँतमा विश्व बजारमा क्रमशः करिब ९० प्रतिशत र ७० प्रतिशत हिस्सा ओगटेको छ । दक्षिण कोरियाली टेक कम्पनीहरु यी सामाग्रीहरुमा निकै भरपर्ने गरेका छन् र यदि यो प्रतिबन्ध लागेमा कोरियाको अर्थतन्त्रमा नै असर पुर्याउन सक्ने अनुमान गरिएको छ ।

यो विवाद चुलिनुमा गत अक्टोबरमा कोरियाको सर्वोच्च अदालतले जापानको निप्पोन स्टीललाई विश्वयुद्धको समयमा जबर्जस्ति काम गराएकोमा क्षतिपूर्ति दिनुपर्ने आदेश दिनु कारक रहेको छ । जापानले भने यो विवाद दुबै मुलुकहरुबिच सन् १९६५ मा नै सकिएको बताउँदै आएको छ ।

यदि यी दुबै उच्च तहका हाईटेक मटेरियलहरु निर्यातमा रोक लागेमा दक्षिण कोरियाली कम्पनीका साथै अन्य कम्पनीहरु एप्पल, सोनी, ह्वावे, ओपोलगायत पनि प्रभावित हुने रिपोर्टमा उल्लेख छ । एजेन्सी