विश्वको पहिलो पाँचवटा क्यामरा सेटअप भएको स्मार्टफोन आउँदै, जनवरीमा सार्वजनिक हुने

काठमाडौं ।

काठमाडौं । नोकियाले विश्वको पहिलो पाँच वटा क्यामरा भएको स्मार्टफोन सार्वजनिक गर्ने भएको छ । यो स्मार्टफोन जनवरीको अन्तिम सातामा लन्च गर्ने अनुमान गरिएको छ । नोकिया फोन बनाउने कम्पनी एचएमडी ग्लोबलले बनाउने नोकिया नाइन प्योरभ्यू (Nokia 9 pureview) स्मार्टफोनको बारेमा केहि अघि जानकारी बाहिर आएको थियो ।

करिब १ वर्षदेखि बजारमा आउने चर्चा रहेको सो स्मार्टफोन बल्ल बजारमा आउन तयार भएको छ । हालै सो स्मार्टफोनको बारेमा रसियन पब्लिकेसनमा जानकारी देखिएको छ ।

नोकिया नाइन प्योरभ्यू स्मार्टफोन विशेष कार्यक्रमका साथ सार्वजनिक हुने रिपोर्टमा उल्लेख छ ।

सो जानकारीमा राखिएको तस्विर यसअघि आएको कन्सेप्ट फोटोसँग मिल्दोजुल्दो रहेको छ जहाँ पाँचवटा क्यामराहरु रहेका छन्।

नोकियाको फ्रन्ट प्यानलमा ठूलो फ्रन्ट क्यामरा र नोच नराखिएको डिस्प्ले रहेको छ । यसअघिको रिपोर्टअनुसार नोकिया नाइन प्योरभ्यू स्मार्टफोनको रियर भागमा एलईडी फ्ल्याशका साथमा ५ वटा क्यामरा सेन्सर हुनेछ।

यो स्मार्टफोनमा ६ इन्चको डिस्प्ले, ८ जीबी र्याम र २५६ जीबीको स्टोरेज हुनसक्ने छ भने स्न्यापड्रागन ८५५ प्रोसेसर राखिने अनुमान छ ।

फोटोग्राफीका लागि ५ वटा मूख्य क्यामरा सेन्सरभएको पेन्टा क्यामरा सेटअप हुनेछ जसमध्ये दुईवटा १६ प्लस १६ मेगापिक्सेको सेन्सर तथा अर्को दुईवटा १२ प्लस १२ मेगापिक्सेलको क्यामरा हुनेछ । त्यस्तै पाँचौं क्यामरा भने ८ मेगापिक्सेलको हुनेछ । त्यस्तै फोनमा १२ मेगापिक्सेलको फ्रन्ट क्यामरा हुनेछ ।

फोनमा पावरका ब्याकअपका लागि ४,१५० एमएएचको ब्याट्री हुने अनुमान छ जसको मूल्य ४,७०० यूआन भन्दा बढि हुनसक्नेछ ।