Technology Khabar १४ फाल्गुन २०७२, शुक्रबार
काठमाडौं ।
काठमाडौं, १४ फागुन । हुवावेको पछिल्लो फ्ल्यागशिप फोन मेट एट (Mate 8) आगामी साता नेपालमा सार्वजनिक हुने भएको छ । हुवावेले आउँदो आईतवार एक कार्यक्रमका बिच फ्ल्यागशिप फोन मेट एट नेपाली बजारमा उपलब्ध हुने घोषणा गर्न लागेको हो ।
कम्पनीनले मेट एट नेपालमा सार्वजनिक गर्न काठमाडौंमा विशेष कार्यक्रम गर्न लागेको छ । कम्पनीले मेट एट सार्वजनिक गर्ने कार्यक्रमका लागि विभिन्न संचारमाध्यमहरुलाई निम्तो पनि पठाईसकेको छ । नेपालमा हुवावेका मोबाइल फोनहरु कल मोबिलिटीले बिक्री गर्दै आएको छ ।
हुवावे मेट एट कम्पनीको पछिल्लो बजारमा उपलब्ध भएको स्मार्टफोन हो । यो स्मार्टफोन प्रिमियम सेगेमेन्टको स्मार्टफोन हो । कम्पनीले यसलाई नेपाली बजारमा प्रिमियम तहको फोनको रुपमा सार्वजनिक गर्नेछ ।
यसअघि कम्पनीले विश्व बजारका लागि सन् २०१५मा चीनमा सार्वजनिक गरेको थियो भने एशियाली मुलुकका लागि थाईल्याण्डमा एक कार्यक्रमका बिच केहि दिनअघि सार्वजनिक गरेको थियो । कम्पनीले यसअघि सार्वजनिक गरेको हुवावे एसेन्ड मेट सेभेनको (Huawei Ascend Mate 7) नयाँ संस्करणको रुपमा हुवावे मेट एट ल्याएको हो । एसेन्ड नामलाई भने कम्पनीले मेट एटमा हटाएको छ ।
यो स्मार्टफोन ६ इन्चको स्क्रीनसहितको फ्याबलेट हो, जुन बजारमा उपलब्ध फ्याबलेटबिच उत्कृष्ट मध्ये एक हो । यसको पिक्चर रिजोल्यूशन १०८०ह्१९२० पिक्सेल रहेको छ भने कोर्निग गोरिल्ला ग्लास फोरद्धारा सुरक्षित पारिएको छ ।
हुवावे मेट एटमा ही सिलिकन किरिन ९५० (HiSilicon Kirin 950) चीपसेट प्रयोग गरिएको छ भने यसमा २.३ गीगाहर्जको क्वाड-कोर कोर्टेक्स ए७२ का साथमा १.८ गीगाहर्जको कोर्टेक्स ए ५३ चीपसेट राखिएको छ । त्यसैगरी ग्राफिक्सका लागि माली टी ८८० एमपी ४ (Mali T880 MP4) प्रयोग गरिएको छ ।
कम्पनीले मेट एटको ३ जीबी र्याम र ४ जीबी र्याम भएको दुई भर्सनको फोन सार्वजनिक गरेको छ जुन बजारअनुसार फरक हुनेछ । त्यसैगरी ३ जीबीको लागि ३२ जीबीको आन्तरिक स्टोरेज तथा ४ जीबीका लागि ६४ जीबीको इन्टरनल स्टोरेज प्रयोग गरिएको छ । यसको स्टोरेजलाई माइक्रो एसडी कार्डद्धारा १२८ जीबीसम्म पुर्याउन सकिन्छ ।
मेट एटमा ड्यूल एलईडी सहितको १६ मेगापिक्सेलको अटोफोकस क्यामरा छ भने ८ मेगापिक्सेलको फ्रन्ट क्यामरा रहेको छ ।
यो फोनको मूख्य विशेषता भनेको यसमा हुवावेले फिंगरप्रिन्ट सेन्सर राखेको छ ।
हुवावे मेट एटमा कनेक्टिभिटीका लागि फोरजी वाईफाई, ब्लूटूथ ४.२ भर्सन, नियर फील्ड कम्प्यूनिकेसन, माइक्रो यूएसबी २.० रहेको छ भने एक्सेलेरोमिटर, गाईरो, ब्यारोमिटर लगायतका फीचर छन् ।
एन्ड्रोयडको मार्शमाल्लो ६.० भर्सनमा आधारित हुवावेको आफ्नै इमोशन यूआई ४.० राखिएको यो फोनमा झिक्न नमिल्ने ४,००० एमएएचको नन रिमूभेवल ब्याट्री राखेको छ ।
दुई सिम प्रयोग गर्न मिल्ने यो स्मार्टफोन स्याम्पेन गोल्ड, मूनलाईट सिल्भर, स्पे ग्रे तथा मोक्चा ब्राउन कलरमा उपलब्ध छ ।
हुवावेले मेट एट नेपाली बजारमा करिब ८० हजार रुपैंयाको हाराहारीमा उपलब्ध गराउने कम्पनी स्रोतले जानकारी दिएको छ । विश्व बजारमा यो फोनको ४ जीबी र्याम र ६४ जिबी भर्सन करिब ७०० यूरोमा उपलब्ध रहेको छ । त्यसैगरी नेपाली बजारमा ३ जीबी र्यामको हुवावे मेट ८ मात्र उपलब्ध हुने स्रोतको भनाई छ ।
प्रकाशित: १४ फाल्गुन २०७२, शुक्रबार