सेवा शुरु नै नभएपनि नेपाल टेलिकमको सहायक कम्पनीले गर्यो आम्दानी

Technology Khabar ३० बैशाख २०७८, बिहीबार

सेवा शुरु नै नभएपनि नेपाल टेलिकमको सहायक कम्पनीले गर्यो आम्दानी

नेपाल टेलिकमको सहायक कम्पनीले सेवा नै शुरु नगरेपनि आम्दानी गर्न थालेको छ । नेपाल टेलिकमको मोबाइल भुक्तानी सेवा ‘नमस्ते पे’ दिनको लागि स्थापना गरेको नेपाल डिजिटल पेमेन्ट कम्पनी लिमिटेडले पहिलो पटक आम्दानी गरेकोसहितको वित्तीय बिबरण सार्वजनिक भएको छ ।

सरकारी स्वामित्वको नेपाल दूरसञ्चार कम्पनी लिमिटेडले आफ्नो र आफू मातहतको सहायक कम्पनीको आर्थिक वर्ष २०७७।७८ को तेस्रो त्रैमासको संयुक्त वित्तीय विवरणहरु बिहिबार सार्वजनिक गरेको छ ।

पहिलो पटक कम्पनीले ग्रुपकै वित्तीय बिबरणहरु सार्वजनिक गरेको छ जसमा नेपाल डिजिटल पेमेन्ट कम्पनीको समेत आम्दानी तथा खर्चहरु देखाईएको छ ।

वित्तीय बिबरणअनुसार सहायक कम्पनीले सेवा नै नदिएपनि चालु आर्थिक वर्ष २०७७/७८ को तेस्रो त्रैमासमा ४६ लाख १९ हजार रुपैयाँ आम्दानी गरेको छ।

सहायक कम्पनीले अन्य शिर्षकमा आम्दानी बढाएको देखिएकोछ ।

नेपाल टेलिकमका प्रबन्ध निर्देशक डिल्लीराम अधिकारीले सहायक कम्पनीको वित्तीय बिबरणहरु समेत प्रकाशित गरिएको र केहि आम्दानी गरेको बताए ।

‘हाम्रा अडिटरहरुले टेलिकम र सहायक कम्पनीकै वित्तीय बिबरणहरु सार्वजनिक गर्नुपर्ने बताएअनुसार नै कम्पनी र ग्रुपको फरक/फरक देखिने गरि बिबरणहरु प्रकाशित गरिएको छ। अब आगामी दिनमा यसरी नै प्रकाशित हुनेछ,’ प्रबन्ध निर्देशक अधिकारीले भने ।

सहायक कम्पनीको सेवाहरु शुरु नगरेपनि कम्पनी स्थापना गर्दाको लगानी रकम भएको र सोही अनुसार ब्याज आम्दानी देखिएको उनको भनाई छ ।

सहायक कम्पनीले आम्दानीका साथै खर्च पनि गरेको विबरणमा देखिन्छ जसमा प्रशासनिक र सञ्चालन  लगायतका खर्चहरु समेटिएका छन् । त्यसैगरि केहि रकम राजश्वमा पनि तिरेको छ ।

नेपाल डिजिटल पेमेन्ट कम्पनीको मोबाइल मनी सेवाको हालै सफ्ट लन्च गरिएको थियो र सो सेवा परीक्षणको क्रममा रहेको छ । कम्पनीले लकडाउन खुलेसँगै र केहि प्राविधिक कार्यहरु सम्पन्न गरेसँगै सेवा सार्वजनिक गर्ने तयारीमा रहेको छ ।

TK Viber

प्रकाशित: ३० बैशाख २०७८, बिहीबार

Loading...