भेन्टिलेटरको अभावलाई ध्यानमा राख्दै एमआईटीको टिमले सस्तो भेन्टिलेटर डिभाइस बनाउँदै

काठमाडौं ।

कोरोना भाइरसको माहामारीले गर्दा विश्वभर विभिन्न मेडिकल सामाग्रीहरुको अभाव देखिएको छ । अस्पतालहरुमा ठाउँको अभावका साथै स्वास्थ्यकर्मीहरुका लागि मास्क, पन्जा, पिपिई मात्रै होईन की बिरामीका लागि भेन्टिलेटरको समेत अभाव रहेको छ ।

कतिपय देशहरुमा ठूला विभिन्न कम्पनीहरुले ती सामाग्री बनाउने घोषणा गरेर उत्पादन गरिसक्दा पनि विशेषगरि भेन्टिलेटरको समस्या समाधान छिटै नहुने देखिएको छ ।

यहि विषयलाई ध्यानमा राखेर अमेरिकाको प्रविधिको अनुसन्धान र विकासको क्षेत्रमा काम गरिरहेको म्यासाचुसेट इन्स्टिच्यूट अफ टेक्नोलोजी(एमआईटी)ले सस्तो, सुरक्षित र वैकल्पिक प्रविधि विकास गर्न लागेको छ । एमआईटीका भौतिकशास्त्रीहरु, इन्जिनियरहरु, कम्प्यूटर वैज्ञानिकहरु र अन्यले मिलेर भेन्टिलेटरको विकास गरेको फाइनान्सियल एक्सप्रेसको रिपोर्टमा उल्लेख छ।

रिपोर्टकाअनुसार यो भेन्टिलेटर तत्कालै कुनैपनि स्थानमा लान सकिने गरि तयार पारिएको छ ।

यसको लागि एमआईटी ई–भेन्ट(एमआईटी इमर्जेन्सी भेन्टिलेटर)को समूह गएको मार्च १२ मा गठन गरिएको र त्यसले तिब्ररुपमा फैलिरहेको महामारीलाई सम्बोधन गर्नेगरि काम गरेको बताईएको छ ।

भेन्टिलेटर बनाउने र समूह गठन गर्ने विचार भने डाक्टरहरुले इन्स्टिच्यूटलाई गरेको अनुरोधहरुको आधारमा शुरु गरिएको थियो । यो विषय सन् २०१० मा एमआईटीको केहि विद्यार्थीहरुले सो समयमा तयार पारेको सिम्पल भेन्टिलेटरको डिजाइनको आधारमा आएको थियो, जसको मूल्य करिब १०० डलर मात्र पर्ने थियो । जबकी साँच्चिकैको भेन्टिलेटरको मूल्य करिब ३० हजार डलर पर्ने बताईएको छ ।

तत्कालिन समयमा सो पेपर प्रकाशित भएपनि त्यसमा भेन्टिलेटरको डिजाइन र परिक्षण मात्र समावेश गरिएको थियो । सो बेलामा ग्रामीण भेगलाई आवश्यक हुनेगरि डिजाइन बनाईएको भएपनि काम अगाडि बढेको थिएन् ।

तर अहिले तत्कालको आवश्यकता सम्बोधन गर्न नयाँ टिमले सोहि प्रोजेक्टसँग आबद्धहरुसहित काम शुरु गरेको हो ।

सो डिभाइसमा एउटा मोटर हुनेछ जसले स्वचालितरुपमा भल्भ र मास्कलाई कम्प्रेस गर्नेछ । केहि कम्पोनेन्टहरु भने निकै सामान्य छन जून आकस्मिक समूहले एम्बुलेन्समा प्रयोग गर्ने गर्दछ र बिरामीलाई स्वास प्रस्वासको लागि सहयोग गर्दछ ।

तर सो समूहले यो भेन्टिलेटर चलाउन दक्ष र अनुभवी मेडिकल व्यक्ति आवश्यक पर्ने चेतावनी दिएको छ ।

एमआईटीको सो प्रोजेक्टले हाल गरिरहेको कामको बारेमा आफ्नो वेबसाइटमा थप जानकारीहरु राखेको छ र अन्य समूहहरुले पनि साथसाथै कामगर्ने अपेक्षा गरेको छ ।