एप्पलको ५जी आईफोन आउन अझै केहि समय लाग्ने, कोरोना भाइरसको कारण आपूर्ति प्रभावित

काठमाडौं ।

कोरोनाभाइरसको महामारीले आफ्नो बिक्रीमा असर परेको अमेरिकी टेक कम्पनी एप्पललाई यसले निकै समस्यामा पारेको छ । एप्पलका फोन मनपराउनेहरुले यसको नयाँ ५जी मोडलको लागि अझै कुर्नुपर्ने देखिएको छ ।

कोरोनाभाइरसले गर्दा यसको बिक्रीदेखि उत्पादनसम्म असर पारेकोछ । कम्पनीले आफ्नो ५जी आईफोन मोडलको लन्चिगलाई थप केहि अवधि पछाडि धकेलेको छ । बजार रिपोर्टहरुकाअनुसार यसको माग र बिक्रीमा आएको फरकका कारण कम्पनीले यस्तो निर्णय गरेको हो ।

जेपी मोर्गनकाअनुसार एप्पलको ५जी आईफोन बजारमा आउन तोकिएको समय भन्दा एक वा दुई महिना पछाडि सर्नेछ । सुत्रहरुलाई उल्लेख गरेर आएका रिपोर्टहरुका अनुसार कम्पनीका अधिकारीहरुले थप समय लिने बारेमा बैठक गरेर निर्णय गरेका हुन् ।

यस बाहेक लन्चिग मिती पछाडि सार्नुको कारणमा चीन र भारतलगायतका देशहरुमा कोरोनाको असरले गर्दा लकडाउनको अवस्था भएको र अझै उत्पादन प्लान्टहरु बन्द नै रहनु हो । जसको कारण फोनका आपूर्तिमा असर पर्नेछ ।

एप्पलको ५जी आईफोनको विभिन्न मोडलहरु रहेको बताईएको छ । एप्पल ५जी आईफोनमा ६जीबी र्यामका साथै दुई भर्सनमा ग्राहकहरुलाई उपलब्ध हुनेछ ।

एप्पलले विश्व बजारको अबस्थालाई ध्यानमा राखेर आगामी मे महिनासम्म अन्तिम निर्णय लिने अनुमान गरिएको छ । कम्पनीले आवश्यक परेको खण्डमा यो लन्चलाई सन् २०२१ मा पनि पुर्याउन सक्ने बताईएको छ ।

विश्व बजारमा सामसंग र ह्वावेपछि एप्पलले आफ्ना ५जी फोनहरु ल्याउने योजना बनाएको थियो । एजेन्सी