Technology Khabar १८ असार २०७६, बुधबार
काठमाडौं ।
काठमाडौं । सामाजिक संजाल फेसबुकलाई जर्मन अधिकारीहरुले २ मिलियन भन्दा बढि अमेरिकी डलर जरिवाना लगाएका छन् । जर्मनीमा फेसुबकले आफ्नो प्लेटफर्ममा भएको गैरकानूनी कन्टेन्टको बारेमा गलत जानकारी दिएको भन्दै सो जरिवाना लागेको हो ।
फेसबुकले अनिवार्यरुपमा बुझाउनुपर्ने पारदर्शि रिपोर्टमा उल्लेख गरेको गैरकानूनी कन्टेन्टबारे अपुरो सूचना प्रदान गरेको भन्दै जरिवाना गरिएको हो ।
जर्मनीमा नेटवर्क इन्फोर्समेन्ट एक्ट गत वर्ष लागू गरिएको थियो, जसअन्तरगत सामाजिक मिडिया प्लेटफर्महरुले प्रत्येक ६ महिनामा उनीहरुले गैरकानूनी कन्टेन्टको बारेमा प्राप्त गरेको गुनासोहरुबारे उल्लेख गर्नुपर्दछ ।
कम्पनीहरुले हेट स्पीच वा फेक न्यूज पत्ता लगाएको २४ घण्टाभित्र हटाउनुपर्ने आवश्यक छ, नत्र भने उनीहरुलाई ६० मिलियन डलरसम्मको जरिवाना लगाउन सकिने प्रावधान छ ।
जर्मन फेडरल अफिस अफ जस्टिसले मंगलबार फेसबुकले सार्वजनिक गरेको सन् २०१८ ट्रान्सपरेन्सि रिपोर्ट अपर्याप्त भएको र त्यसबापत २३ लाख अमेरिकी डलर जरिवाना गराईएको उल्लेख गरेको छ ।
‘रिपोर्टमा केहि अंश मात्र गैरकानूनी कन्टेन्टको गुनासोको बारेमा उल्लेख छ,’ नियमनकारी निकायले भनेको छ ।
फेसबुकले भने यो कानूनमा धेरै कमजोरी विश्लेषकहरुले देखाएको भन्दै जरिवानाको बारेमा विश्लेषण गरेर अपिल गर्ने अधिकार रहेको बताएको छ ।
फेसबुकको सो रिपोर्टअनुसार गत वर्षको पहिलो अर्थवार्षिकमा १,७०४ वटा अनधिकृत कन्टेन्ट भेटिएको थियो भने गूगलको यूट्यूबमा १,४४,८३६ वटा कन्टेन्टहरु अनधिकृत रहेका थिए ।
प्रकाशित: १८ असार २०७६, बुधबार