एप्पलका आइफोन बिना ब्याज मासिक किस्तामा पाईने, चीनमा नयाँ अफर शुरु

काठमाडौं ।

काठमाडौं । एप्पलले चिनियाँ आइफोन खरिदकर्ताहरुलाई बिना ब्याज फाइनान्समा आइफोनहरु उपलब्ध गराउने भएको छ । कम्पनीले चिनियाँ बजारमा आफ्नो उपस्थिती बढाउनका लागि ब्याज नलिनेगरि फाइनान्समा नै आइफोनहरु किन्न सकिने योजना सार्वजनिक गरेको हो ।

कम्पनीले चीनको पेमेन्ट जायन्ट कम्पनी एन्ट फाइनान्सियल सर्भिसेज ग्रुपसहित विभिन्न स्थानिय बैंकहरुसँग इन्ट्र्रेष्ट फ्री फाइनान्सिंगको लागि सहकार्य गरेको छ । यस्तो किसिमको सहकार्य कम्पनीले चीनमा पहिलो पटक गरेको हो ।

अमेरिकी टेक कम्पनी एप्पलले हालै चीनमा आइफोनको कमजोर बिक्रीले समग्र आम्दानीमा नै असर पार्नसक्ने विषय उठिरहेको बेलामा यस्तो नयाँ योजना ल्याएको हो । चीन स्मार्टफोन बिक्रीको लागि सबैभन्दा महत्वपूर्ण बजारहरुमध्ये एक हो, जहाँ हालै आर्थिक वृद्धिमा आएको कमीका कारण ग्राहकहरुले खर्च गर्ने क्रममा पनि कमी आएको छ ।

चीनको आफ्नो आधिकारिक वेबसाइटमा एप्पलले नयाँ स्कीमको प्रबद्र्धन गरिरहेको छ, जहाँ ग्राहकहरुले केबल २७१ यूआन प्रत्येक महिना भुक्तानी गरेर आइफोन एक्सआर किन्न सक्नेछन भने ३६२ यूआन मासिकरुमा तिरेर आइफोन एक्सएस किन्न सक्नेछन् । त्यस्तै पुराना आइफोन मोडलहरु पनि सस्तो इन्स्टलमेन्टमा नै ग्राहकहरुले किन्न सक्नेछन् ।

यदि ग्राहकहरुले न्यूनतम ४,००० यूआन भन्दा बढि मूल्यको एप्पलका उत्पादनहरु खरिद गरेमा कम्पनीले बिना ब्याजको फाइनान्सको सुविधा दिनेछ, जून तीन महिना, ६ महिना, १२ र २४ महिनाको मासिक किस्तामा तिर्न सकिनेछ ।

एप्पलले चीनमा ह्वाबेई नामक एन्ट फाइनान्सियलको कन्ज्यूमर क्रेडिट सर्भिसमार्फत सो अफर गरिरहेको छ, जून ईकमर्श साइट अलिबाबासँग भुक्तानीका लागि जोडिएको छ । चीनका चार प्रमुख बैंकहरुले एप्पलका उत्पादनहरु इन्स्टलमेन्टमा उपलब्ध गराउनेछ जसमा न्यूनतम ३०० को खरिद गर्नुपर्ने हुन्छ ।

माध्यम