Technology Khabar १८ बैशाख २०७५, मंगलवार
काठमाडौं ।
काठमाडौं । अमेरिकाका दुई ठूला मोबाइल अपरेटर स्प्रीन्ट (Sprint) र टि-मोबाइल (T-Mobile) एक आपसमा गाभिएका छन् । दुबै कम्पनीहरुले सोमबार सम्पूर्ण शेयर खरिद बिक्री कारोबार गरिने घोषणा गरेका छन् ।
दुबै कम्पनी मर्ज भएपछि बन्ने कम्पनीको नाम टि-मोबाइल राखिने छ र त्यसको मुख्यालय हाल टि मोबाइल रहेको वासिंगटनको वेलेभ्यू नामक स्थानमा राखिने छ । त्यस्तै अर्को मुख्यालय हाल स्प्रीन्टको मुख्यालय रहेको ओभरल्याण्ड पार्क, कान्सासमा राखिने बताईएको छ ।
मर्जर प्रकृयामा स्प्रीन्टको मूल्य ५९ विलियन अमेरिकन डलर तथा टि मोबाइलको मुल्य १४६ विलियन गरिएको थियो ।
हाल टि मोबाइल अमेरिकाका प्रमुख कार्यकारी अधिकृत (सिईओ) जोन लेगिरे नै नयाँ कम्पनीको सिईओ बन्नेछन भने निर्देशकको रुपमा समेत जिम्मेवारी पाएका छन् ।
दुबै कम्पनीले मर्जपछि भेरिजोन र एटि एण्ड टिलाई कडा प्रतिस्पर्धा दिने अनुमान गरिएको छ ।
मर्जर प्रकृयामा डोयचे टेलिकमले ४२ प्रतिशत हिस्सा पाएको छ भने सफ्ट बैंकले २७ प्रतिशतको हिस्सा प्राप्त गरेको छ । बाँकी करिब ३१ प्रतिशत सार्वजनिक शेयर हिस्सा रहेको छ ।
मर्जरपछि नयाँ कम्पनीले सन् २०२४ सम्ममा स्पेक्ट्रम, अपरेटिंग खर्च र क्यापिटल इन्भेस्टमेटबाट ६ विलियन अमेरिकी डलर भन्दा बढि बचत गर्ने अपेक्षा गरेको छ ।
नयाँ कम्पनीले तिब्र प्रतिस्पर्धाको बजारमा आफ्ना अमेरिकी ग्राहकहरुलाई अझ सस्तो मुल्यमा उच्च स्तरको सेवा प्रदान गर्ने विज्ञप्तिमा उल्लेख छ ।
मर्जरपछि कम्पनीले फाइभ जी विकासमा ध्यान दिने गरि काम शुरु गरेको छ । जसको लागि कम्पनीले नयाँ वेबसाइट समेत शुरु गरेको छ ।
दुबै कम्पनीको संयुक्त कारोबार आगामी २०१९ को पहिलो अर्धवार्षिकसम्म पुरा हुने अनुमान गरिएको छ ।
प्रकाशित: १८ बैशाख २०७५, मंगलवार