Technology Khabar १ भाद्र २०७३, बुधबार
काठमाडौं ।
काठमाडौं, १ भदौ । इन्टेल हालै नयाँ तथा अनौठो किसिमको भर्च्यूअल रिआलिटि हेडसेट (Virtual Reality Headset) सार्वजनिक गरेको छ । यस भिआर हेडसेटमा कुनै फोन अथवा कम्प्यूटर बिना नै भर्च्यूअल रिआलिटिको अनुभव गर्न सकिन्छ ।
इन्टेलले प्रोजेक्ट एलोए (Project Alloy) अन्तरगत अल-इन-वान भिआर हेडसेट सार्वजनिक गरेको हो । यो हेडसेट पूर्णरुपमा वायरलेस रहेको छ भने यसमा आफ्नै प्रोसेसर तथा ब्याट्री राखिएको छ । एलोएले प्रयोगकर्ता रहेको कोठाको बारेमा पनि जानकारी राख्नेछ भने हेडसेट प्रयोगकर्ताको हातको औंलाको गतिबिधिहरुसँग पनि अन्तरक्रिया गर्नेछ ।
यो भिआरमा एउटा क्यामरा पनि राखिएको छ जसले कोठामा भएका बस्तुहरु हेर्न सकिन्छ । इन्टेलले यसलाई मर्ज्ड रिआलीटि “Merged Reality” अन्तरगत ल्याएको हो । यो भिआर हेडसेटमा कम्प्यूटेशन तथा ग्राफिक्स पावर दिईएको छ । जसको माध्यमबाट भर्च्यूअल रिआलिटि इमेज बन्दछ र यसमा भएको ब्याट्रीले इन्टेल थ्रीडी क्यामरा सेन्सर अपरेट हुन्छ ।
इन्टेलको एलोए भिआर हेडसेट माइक्रोसफ्टको होलोलेन्ससँग मिक्स्ड रिआलिटि जस्तै रहेको छ । इन्टेलका सिईओ ब्रायन क्रानिचले भने, “कसैले पनि एलोए हार्डवेयरलाई विण्डोज होलोग्राफिक्ससँग जोडेर विश्वको उत्कृष्ट भिआर सिस्टम बनाउन सक्नेछ ।”
उक्त भिआरको बारेमा हालै इन्टेलद्धारा आयोजना भईरहेकोे अन्तराष्ट्रिय डेलपर्स फोरममा डेमो प्रदर्शन गरिएको थियो । जहाँ भिआर हेडसेट प्रयोगकर्ताले कोठा भित्रको वरिपरिको वातावरणको बारेमा थाहा पाएका तथा भर्च्यूअल रिआलिटिमा कोठाको ढोका खोलेका थिए ।
प्रकाशित: १ भाद्र २०७३, बुधबार