एक वर्षमा राउटर आयातको लागि बाहिरियो २ अर्ब १५ करोड रुपैयाँ, अधिकांश चीनबाट भित्रिए

काठमाडौं ।

– साजन सुवेदी

नेपालमा आर्थिक वर्ष २०७७/७८ मा जम्मा २ अर्ब १५ करोड ८२ लाख ३९ हजार रुपैयाँको राउटर आयात भएको छ।

भन्सार विभागले हालै अद्यावधिक गरेको आर्थिक वर्ष २०७७/७८ को वार्षिक प्रतिवेदन अनुसार २०७७ श्रावणदेखि २०७८ असार मसान्तसम्ममा नेपालमा ८ लाख ५ हजार २८० ओटा राउटर भित्रिएका छन्।

यीमध्ये सबैभन्दा बढी चीनबाट २ अर्ब ९ करोड ३९ लाख ८ हजार रुपैयाँ बराबरको ७ लाख ९६ हजार ३०८ वटा राउटर आयात भएका छन्।

यसपछि ताइवानबाट २ करोड ७६ लाख ३६ हजार बराबरको ६, २५६ ओटा, इटलीबाट २८ लाख ९६ हजार बराबरको १,१०० ओटा,  लात्भिया बाट १ करोड ५९ लाख ३६ हजार रुपैयाँ बराबरको ५८२ थान, यमनबाट ५ लाख ७६ हजार बराबरको ५०० थान आयात भएका छन्।

यसैगरी भारतबाट ५ लाख १३ हजार बराबरको २७६ थान, मलेसियाबाट २२ लाख ८२ हजार बराबरको १०२ थान तथा अमेरिकन सामोआबाट २ लाख ८६ हजार रुपैयाँ बराबरको १०० थान राउटर आयात भएको प्रतिवेदमा उल्लेख छ।

यसबाहेक अमेरिकाबाट २८ लाख ९६ हजार रुपैयाँ बराबरको १८ थान,  लिथुआनियाबाट १ लाख ७५ हजार बराबरको १० थान, मेक्सिकोबाट ६१ लाख ५ हजार बराबरको ७ थान लगायत विभिन्न देशबाट गरी यो परिमाणमा राउटर आयात भएको तथ्याङ्क छ।

कोरोनाका कारण वर्क फ्रम होम र अनलाइन कक्षाहरुका लागि इन्टरनेटको खपत बढ्दै जाँदा वायर्ड र वायरलेस दुवै कनेक्टिभिटीका लागि अत्यावश्यक हुने भएकाले राउटरको माग महिनैपिच्छे बढ्दै गइरहेको देखिन्छ।

पछिल्ला दिनमा देशभर दूरसञ्चार, टेलिभिजन तथा इन्टरनेट सेवाको उपयोग गर्ने प्रवृत्ति बढिरहेको छ ।

गत वर्ष कोरोना भाइरस महामारीको संक्रमणको डरले भएको लकडाउनपछि मानिसहरुले यी सेवाको उपयोग अधिकतम गरिरहेका छन् भने अहिले पनि कोरोनाको दोेस्रो लहरका कारण इन्टरनेट सेवा प्रयोग गर्नेको संख्या पनि दिन प्रतिदिन बढ्दै गइरहेको पाइएको छ।

यस्तो छ यो आर्थिक वर्षको राउटर आयात तथ्याङ्क: