क्यास अन एड एप फेरि विश्व बजारमा आउँदै, मोबाइल एपमा विज्ञापन हेरेपछि पैसा पाईने

काठमाडौं ।

काठमाडौं, १२ फागुन । एफ वान सफ्टको (F One Soft) मोबाइल एप क्यास अन एड (Cash on Ad) पुन विश्व बजारमा उदाउने भएको छ । कुनै समय नेपालमा निकै चर्चित मोबाइल एप बन्न पुगेको क्यास अन एड पुनः दक्षिण पूर्वी एशिया तथा ल्याटिन अमेरिकी मुलुकहरुबाट उदाउन लागेको हो ।

एफवान सफ्टले क्यास अन एड मोबाइल एपलाई दक्षिण पूर्वी एशियाको मलेशिया तथा ल्याटिन अमेरिकी मुलुक इक्वेडरबाट सार्वजनिक गर्ने तयारी गरेको छ । कम्पनीले यहि फेब्रुअरीको अन्त्य वा मार्चको पहिलो साताभित्र क्यास अन एड ती मुलुकहरुमा सार्वजनिक गर्न लागेको एफ वान सफ्टका अध्यक्ष विश्वास ढकालले जानकारी दिए । ‘हामी यो वर्षको पहिलो त्रैमासमा दक्षिण पूर्वी मुलुकमा क्यास अन एडलाई सार्वजनिक गर्ने तयारीमा छौं ।’ उनले भने, ‘पहिलो चरणमा दुई मुलुकमा सार्वजनिक गर्ने तयारीमा छौं ‘

कम्पनीले यसको लागि केहि काम अझै बाँकी रहेको जानकारी दिएको छ । हाल कम्पनीले दक्षिण पूर्वका १७ मुलुकमा क्यास अन एडको लाइसेन्स लिएको छ । ती सबै देशहरुमा बिस्तारै क्यास अन एड सार्वजनिक गर्दै जाने अध्यक्ष ढकालले जानकारी दिए । त्यसैगरी यो मोबाइल एप ल्याटि अमेरिकाका ६ वटा मुलुकमा पनि सार्वजनिक गर्ने योजनामा कम्पनीले रहेको छ ।

कम्पनीले ल्याटिन अमेरिकाका मेक्सिको, इक्वेडर, चिली र ब्राजिललगायतका देशमा यसको ट्रेडमार्क लिईसकेको छ भने अन्य मुलुकहरुमा लिने तयारीमा छ । दक्षिण पूर्वी एशियाली मुलुक मलेशिया, इण्डोनेशिया तथा फिलिपिन्सलगायतका देशहरुमा पनि अनुमती दिएको अध्यक्ष ढकालले बताए ।

यो एपको कन्सेप्ट नेपालमा सन् २०१३ मा पहिलो पटक सार्वजनिक गरिएको थियो भने पहिलो चरणमा यो निकै सफल भएको थियो । एप सार्वजनिक भएको पहिलो ३ महिनामा नै त्यसबेला २ लाख भन्दा बढि यूजरहरु दर्ता भएका थिए । तर यो कन्सेप्ट नेपालमा बिस्तारै असफल भयो र हाल यसको बारेमा अधिकांशलाई जानकारी पनि छैन् । ‘हामीले प्रयोगकर्तालाई भने बमोजिमको पैसा एप मार्फत दिन सकेनौं । उनले भने, क्यास अन एडको कन्सेप्टका लागि नेपाल एकदमै सानो मार्केट भयो ।’

कम्पनीले हाल यसलाई आफ्नो असफलताको सूचीमा राखेपनि पुन यसलाई विश्व बजारमा ल्याउने तयारी गरेको हो । त्यसबेला निकै नयाँ कन्सेप्टको रुपमा आएको यो एप खरिद गर्न विभिन्न क्रेताहरु आएपनि बिक्री गरिएको थिएन् । तर कम्पनीले यसमा करोडौं रुपैंया डुबाएको कम्पनी स्रोतले जानकारी दिएको छ । त्यो रकम उठाउनका लागि पनि यो कन्सेप्टलाई पुन ल्याउन लागिएको स्रोतको भनाई छ । कम्पनीका अध्यक्ष ढकाले भने कति रकम हालसम्म डुब्यो भन्ने जानकारी दिन चाहेनन् ।

क्यास अन एड हाल गूगलको प्ले स्टोरमा उपलब्ध रहेपनि हाल त्यसका प्रयोगकर्ता नगन्य मात्र रहेका छन् । यो एप हाल डाउनलोड गर्ने चाहनेहरु अझै पनि रहेका छन् । जसले एप डाउन हुन नसकेको वा क्र्यास भएको वा लगइन नभएको गुनासो आफ्नो कमेन्टमा उल्लेख गरेका छन् ।

यो एप गूगल प्ले स्टोरमा सन् २०१४ डिसेम्बर १८ तारिखदेखि अपडेट भएको छैन् भने त्यहाँ ५० हजारसम्म इन्स्टल भएको देखाएको छ । प्ले स्टोरमा यो एप ११ एमबी साइजको भएको र ३.३.८ भर्सनमा उपलब्ध रहेको उल्लेख छ भने यसले ३.४ रेटिंग पाएको छ ।

नेपालमा यो एप फेरी अाउँछ वा अाउँदैन भन्ने बारेमा अहिले केहि भन्न नसकिने अध्यक्ष ढकालले बताए ।

नेपालको सूचना, संचार तथा प्रविधिको अवस्था र एफ वान सफ्टको विषयसहित प्रविधिको अहिलेको अवस्थाको बारेमा एफ वान सफ्टका अध्यक्ष विश्वास ढकालसँग गरिएको कुराकानी पनि छिट्टै प्रकाशित गर्नेछौ‌ ।