४ इन्चको आईफोन ‘पिंक’ कलरमा पनि आउने, आईफोन सिक्स एसको जस्तै फीचर

काठमाडौं ।

काठमाडौं, २५ माघ । एप्पलले ल्याउन लागेको ४ इन्चको आईफोनको बारेमा विभिन्न किसिमका समाचारहरु आई नै रहेका छन् । कम्पनीको नयाँ ४ इन्चको आईफोनको नाम आईफोन फाइभ एसई (iPhone 5se) हुने यसअघि नै सार्वजनिक भईसकेको हामीले उल्लेख गरिसकेका छौं ।

यसपटक फेरी ४ इन्चको नयाँ आईफोनको बारेमा नयाँ जानकारी चर्चामा रहेको छ । कम्पनीले यहि मार्च १५ तारिखमा सार्वजनिक गर्ने तयारी गरिरहेको आईफोन फाइभ एसई विभिन्न तीन कलर अप्सनमा आउने जानकारी सार्वजनिक भएको छ ।

कुन कुन कलरमा आउँदैछ ?

नयाँ आईफोन सिल्भर (Silver), स्पेस ग्रे (Space Grey) र पिंक (Pink)  कलर अप्सनमा आउन लागेको जापानी वेबसाइट म्याक ओटाकाराले (Mac Otakara) रिपोर्ट गरेको छ । यसअघि आईफोन फाइभ एस सिल्भर र स्पेस ग्रे कलर अप्सनमा आईसकेको भएपनि पिंक च्यासिस कलरमा भने पहिलो पटक आउन लागेको हो । उक्त वेवसाइटले एसेसरिज उत्पादक तेस्रो पक्षलाई उद्धृत गर्दै यो जानकारी दिएको हो ।

स्रोतले नयाँ आईफोनको पिंक कलरको बारेमा जानकारी दिँदै यसलाई छैठौं जेनेरेशनको आईपोड टचको (iPod Touch) पिंक कलर अथवा सातौं संस्करणको आईपड नानोको (iPod Nano) कलरमा हुने उल्लेख गरेको छ ।

नयाँ पिंक कलरको आईफोन यसअघिको रोज गोल्ड कलर अप्सनको आईफोन सिक्स एस (iPhone 6s) तथा सिक्स एस प्लस (iPhone 6s Plus) भन्दा फरक हुने रिपोर्टमा बताईएको छ । त्यसैगरी कम्पनीले ल्याउने गरेको येल्लो गोल्ड (Yellow Gold) कलर अप्सनको बारेमा रिपोर्टमा केहि उल्लेख छैन् । एप्पलले सन् २०१३ मा पहिलो पटक आईफोन ५ एसमा गोल्ड कलर प्रयोग गरेको थियो ।

नयाँ आईफोनको उत्पादनको क्रममा रहेको अनुमान गरिएको छ, जुन केहि दिनभित्रै सार्वजनिक हुँदैछ । यो ४ इन्चको नयाँ फोनको बारेमा कुनै आधिकारीक स्पष्ट जानकारी नभएपनि यो मेटल ब्याक्ड डिजाइनको हुने र ४ इन्चको स्क्रीन राखिने छ भने यसमा ए ८ प्रोसेसर वा ए ९ प्रोसेसर प्रयोग गरिनेछ । त्यसैगरी यसमा एप्पल पेका लागि एनएफसी पनि राखिनेछ ।

यसअघि पनि ४ इन्चको आईफोनको बारेमा विभिन्न तस्विरहरु आएका थिए । यदि त्यसलाई आधार मान्ने हो भने नयाँ फोन आईफो सिक्स एस जस्तै तर कब्र्ड एजसहितको हुनेछ भने २.५ डी स्क्रीन रहनेछ ।

यसमा ८ मेगापिक्सेलको रियर तथा १.२ मेगापिक्सेलको फ्रन्ट क्यामरा हुनेछ भने फ्रन्ट क्यामरा एयर स्पीकरको देब्रेमा राखिनेछ ।

यसअघि नै एप्पलले मार्च १५मा विशेष इभेन्टको आयोजना गर्ने जानकारी आईसकेको छ, जहाँ नयाँ आईफोनका साथै आईप्याड एयर थ्री तथा एप्पल वाचको नयाँ भर्सन सार्वजनिक हुने अनुमान छ ।