Technology Khabar १० भाद्र २०७२, बिहीबार
काठमाडौं ।
काठमाडौं, १० भदौ । माइक्रोसफ्ट कर्पोरेशनको हालै सार्वजनिक भएको नयाँ अपरेटिंग सिष्टम विण्डोज १० (Windows 10 OS) ७ करोड ५० लाख (75 million) भन्दा बढि डिभाइसहरुमा पुगेको कम्पनीले जानकारी दिएको छ । कम्पनीका विण्डोज एण्ड डिभाइसेजका मार्केटींग चीफ यूसुफ मेहन्दीकाअनुसार सार्वजनिक भएदेखि एक महिनाको अवधिमा विण्डोज १० ओएस साढे सात करोड भन्दा बढि पर्सनल कम्प्यूटरहरुमा पुगेको हो ।
त्यसैगरी यसमा ९० हजार भन्दा बढि पर्सनल कम्प्यूटर तथा ट्याबलेटका मोडलहरु नयाँ अपरेटिंग सिष्टममा अपग्रेड गरिएका छन् । यो अपरेटिंग सिष्टममा अपग्रेड गर्नेहरु १९२ मूलुकका प्रयोगकर्ताहरुका पर्सनल कम्प्यूटरहरु भएको मेहन्दीले गरेको ट्वीटमा उल्लेख छ ।
विण्डोज १० को एप स्टोरमा विण्डोज ८ भन्दा ६ गुणा अधिक डाउनलोड पर डिभाइस (Download per device) रहेको उनले उल्लेख गरेका छन् ।
वासिंगटनमा आधारित कम्पनीले आफ्ना शेयरहोल्डरहरुलाई विण्डोज १० आगामी ३ वर्षभित्र १ विलियन प्रयोगकर्ताहरुमाझ पुग्ने विश्वास दिलाएको छ, जुन अहिलेसम्मको सबैभन्दा द्रूत गतिको स्विकार दर हो ।
जुलाई २९ तारिखमा यो अपरेटिंग सिष्टम डिभाइस सार्वजनिक भएको २४ घण्टाभित्र १४ मिलियन डिभाइसमा प्रयोग गरिएको उनको ब्लगमा उल्लेख थियो ।
कम्पनीका प्रमुख कार्यकारी अधिकृत सत्या नाडेलाले नयाँ ओएसबाट आम्दानीमा उल्लेख वृद्धि हुनेभन्दै यो अहिलेको दुई चौमासिकसम्म हुने बताए ।
यसअघिको ओएस विण्डोज ८ सार्वजनिक भएको पहिलो महिनामा केबल १५ मिलियन डिभाइसमा मात्र प्रयोग गरिएको थियो ।
मेहन्दीले गरेको ट्वीटअनुसार माइक्रोसफ्टको विण्डोज १०मा रहेको ‘भ्वाईस कन्ट्रोल्ड पर्सनल असिस्टेन्ट’ अर्थात कोर्टानाले सार्वजनिक भएदेखि हालसम्म ५ लाख भन्दा बढि हाँस्यव्यंग (Joke) बताईसकेको छ । ब्लूमबर्गबाट
प्रकाशित: १० भाद्र २०७२, बिहीबार