Technology Khabar १६ असार २०७२, बुधबार
काठमाडौं ।
काठमाडौं, १६ असार । एप्पलले आफ्नो पहिलो म्यूजिक स्ट्रीमिंग सर्भिस सार्वजनिक गरेको छ । कम्पनीले अमेरिकासहित विश्वका १ सय देशहरुमा म्यूजिक स्ट्रीमिंग सर्भिस सार्वजनिक गरेको हो ।
विश्वको सबैभन्दा मूल्यवान कम्पनी एप्पलले नयाँ अपरेटिंग सिष्टम आईओएस ८.४ का साथमा यसको म्यूजिक स्ट्रीमिंग सार्वजनिक गरेको हो ।
एप्पलका आईफोन, आईप्याड तथा आईपड टच प्रयोगकर्ताहरुले नयाँ आईओएस ९.४ अपटेडको नोटिफीकेसन पाईसकेका छन् र यदि कसैले पाएको छैन भने केहि घण्टाभित्रै त्यस्तो नोटिफीकेशन आउनेछ ।
नयाँ आईओएस तथा म्यूजिक स्ट्रीमिंग सेवा सबै डिभाईस प्रयोगकर्ताले प्रयोग गर्न सक्नेछन् ।
कम्पनीले यो म्यूजिक स्ट्रीमिंग सेवाका साथमा सातै दिन र २४ घण्टाको फ्री रेडियो सर्भिस पनि दिनेछ । यो सर्भिसलाई कम्पनीले बिट्स १ नाम दिएको छ ।
यूजर्सले यो एप एप्पलको म्यूजिक एप स्टोर आईट्यून्सबाट डाउनलोड गर्न सक्नेछन् । तर यसभन्दा अघि नै प्रयोगकर्ताले प्रयोग गरिरहेको एप्पलको डिभाइसमा आईओएसको ८.४ भर्सन डाउनलोड गर्नुपर्ने हुन्छ ।
एप्पलले सानफ्रान्सिस्कोमा यहि जून महिनामा आयोजित वार्षिक वल्र्डवाइड डेभलपर्स कन्फ्रेन्स २०१५ मा म्यूजिक स्ट्रीमिंग सर्भिसको घोषणा गरेको थियो ।
एप्पलले सार्वजनिक गरेको यो सर्भिस पहिलो तीन महिना निशुल्क प्रयोग गर्न सकिनेछ । यसपछि भने कम्पनीले सर्भिस चार्ज लगाउनेछ । एप्पलको म्यूजिक स्ट्रीमिंग सर्भिसको लागि प्रयोगकर्ताले ९.९९ डलर व्यक्तिगत तथा १४.९९ डलर परिवारको लागि तिर्नुपर्ने हुन्छ । तर कम्पनीले विभिन्न मुलुकमा छुट्टाछुट्टै रकम तोकेकाे छ ।
एप्पलको म्यूजिक स्ट्रीमिंग एप क्याटलगमा ३ करोडभन्दा बढि गितहरु राखिएका छन् । यसमा फर यू (For You) नामको छुट्टै सेक्शन पनि छ जसमा प्रयोगकर्ताले सबैभन्दा नयाँ गानाहरुको कलेक्शन पाउनेछन् ।
यो सेवापछि एप्पलका डिभाइस प्रयोगकर्ताहरुले अन्य म्यूजिक एप प्रयोग गर्न नपर्ने भएको छ । एप्पलले यसअघि नै म्यूजिक लभर्स तथा म्यूजिक कल्चरलाई ध्यानदिँदै बनाएको बताएको थियो ।
प्रकाशित: १६ असार २०७२, बुधबार