नेशनल आईसीटी स्कलरसीप २०७७ को लागि आवेदन खुल्यो, ४९ जना विद्यार्थीहरुले छात्रवृत्ति पाउने

काठमाडौं ।

कम्प्युटर एशोसिएसन नेपाल (क्यान महासंघ) ले ‘नेशनल आईसीटी स्कलरसीप २०७७’ को लागि आवेदन खुल्ला गरेको छ । क्यान महासंघले प्राविधिक शिक्षातर्फ विगत दुईवर्ष देखि स्कलरसीप प्रदान गर्दै आईरहेको छ ।

यो छात्रवृत्ति कलेज लर्ड बुद्ध एजुकेशन फाउन्डेसनसँगको सहकार्यमा सुरु भएको हो ।

यो छात्रवृत्ति मार्फत ४९ जना विद्यार्थीहरुलाई आंशिक तथा पूर्ण छात्रवृत्ती प्रदान गरिने जनाइएको छ । विगत दुईवर्षदेखि सञ्चालित यस छात्रवृत्ति कार्यक्रम अन्तरगत हालसम्म २८ जना विद्यार्थीहरु अध्ययनरत छन् ।

यो वर्षपनि फिमेल मेरिट आईसीटी स्कलरसीपमा प्रत्येक प्रदेशबाट चार जनाको दरले २८ जना छात्रालाई छात्रवृत्ति प्रदान गरिने छ । भने आईसीटी मेरिट स्कलरसीप अन्तर्गत प्रत्येक प्रदेशबाट तीनजनाका दरले २१ जनालाई छात्रवृत्ति प्रदान गरिने बताईएको छ ।

क्यान महासंघ र कलेज बीच भएको सम्झौता अनुसार ४९ जना विद्यार्थीले १ करोड ९६ लाख ४२ हजार ५ सय रुपैयाँ बराबरको छात्रवृत्ति पाउने छन् ।

नेपाल सरकारबाट मान्यता प्राप्त शिक्षण संस्थाबाट ५० प्रतिशत अंकसहित प्लस टू वा सो सरह अध्ययन गरेका र कक्षा १० को गणित विषयमा कम्तिमा ५० प्रतिशत अंक ल्याई सिटीइभिटीबाट कम्प्युटर इन्जिनियरिङमा डिप्लोमा गरेकाहरुले छात्रवृत्तिका लागि आवेदन दिन सक्ने छन् । साथै छात्रवृत्तिका लागि हाल कक्षा १२ को परीक्षा कुरेर बसेका विद्यार्थीहरुले पनि आवेदन दिन सक्नेछन् ।

छात्रवृत्ति प्राप्त विद्यार्थीले मलेसियाको एशिया प्यासिफिक युनिभर्सिटी अफ टेक्नोलोजी एण्ड इन्नोभेसनको सम्बन्धनमा सञ्चालित लर्ड बुद्ध एजुकेशन फाउन्डेसनमा स्नातक तह अन्तरगत विएससी आईटीको अध्ययन गर्न पाउनेछन् ।

छात्रवृत्ति प्रदान गर्नका लागि क्यान महासंघले केन्द्रिय स्तरमा निवर्तमान अध्यक्ष हेमन्त कुमार चौरासियाको संयोजकत्वमा सचिवद्वय शेखर दुलाल र दिपेन्द्र कुमार सिंह रहेको छात्रवृत्ति छनौट समिति गठन गरेको छ ।

छात्रवृत्तिका लागि इच्छुक विद्यार्थीले क्यान महासंघको वेबसाइट www.can.org.np र लर्ड बुद्ध एजुकेशनको वेबसाइट www.lbef.org मार्फत असोज ९ गतेसम्म आवेदन दिई सक्नुपर्नेछ।

आवेदन दिँदा कक्षा १२ उतिर्ण गरिसकेकाहरुले कक्षा १० र १२ को मार्कसिटको प्रतिलिपी तथा कक्षा १२ को परीक्षा नभइसकेकाहरुले कक्षा १२ अध्ययनरत रहेको प्रमाणका साथै एउटा फोटो, नागरिकता वा जन्मदर्ताको प्रमाणपत्र र स्थानीय सरकारको सिफारिसपत्र पेश गर्नुपर्नेछ ।

यस छात्रवृत्ति मार्फत कोभिड महामारीको बाबजुत पनि विपन्न वर्गका विद्यार्थीहरुलाई आफ्नो करिअर बनाउन मद्दत पुग्ने र कार्यान्वयनको चरणमा रहेको डिजिटल नेपाल फ्रेमवर्कलाई सहयोग पुग्ने क्यान महासंघका अध्यक्ष नवराज कुँवरले बताए ।

क्यान महासंघसँगको सहकार्यले डिजिटल डिभाइड कम गर्न मद्दत पुग्ने र भविष्यमा यस्तै कार्यमा सार्वजनिक निजि साझेदारीको निम्ति प्रोत्साहन मिल्ने लर्ड बुद्ध एजुकेशन फाउन्डेसनका अध्यक्ष इन्जिनियर पंकज जालानले बताए ।