Technology Khabar १३ चैत्र २०७५, बुधबार
काठमाडौं ।
काठमाडौं । छिमेकी मुलुक भारतले अन्तरिक्षमा संचालनमा रहेको स्याटेलाइट झार्न सफल भएको दाबी गरेको छ ।
भारतीय प्रधानमन्त्री नरेन्द्र मोदीले अन्तरिक्षमा संचालनमा रहेको लाइभ स्याटेलाइटलाई एन्टि स्याटेलाइट मिसाइलद्धारा झार्न सफल भएको बताए । उनले यो भारतीय स्पेस प्रोग्राममा मूख्य ब्रेकथ्रू भएको दाबी गरे ।
मोदीले भारतीयहरुलाई सम्बोधन गर्दै भारत अन्तरिक्षमा यस्तो मिसन संचालन गर्ने चौथो देश भएको बताए । यसअघि अमेरिका, रसिया र चीनसँग मात्र संचालनमा रहेको लाइभ स्याटेलाइट झार्नसक्ने क्षमता रहेको बताईएको छ ।
मोदीकाअनुसार अन्तरिक्षमा ३०० किलोमिटरको दूरीमा लो अर्थ अर्बिट स्याटेलाइटलाई झारेको हो । यसलाई एक पूर्व निर्धारित लक्ष्यअनुसार तीन मिनेट भित्र झारिएको उनले जानकारी दिए ।
भारतको मिशन शक्ति नामक सो मिसनमा एलईओ स्याटेलाइटलाई झारिएको हो । यो मिसनका लागि भारतले लो अर्बिटमा स्याटेलाइट स्थापना गरेको थियो भने त्यसलाई एन्टि स्याटेलाइट मिसाइलद्धारा झारिएको थियो ।
लो अर्थ अर्बिट के हो ?
लो अर्थ अर्बिट भनेको पृथ्वीको सबैभन्दा तल्लो अन्तरिक्ष कक्षलाई भनिन्छ । यो पृग्वीको सबैभन्दा नजिकको अर्बिट हो । यो पृथ्वीको सहतबाट १६० किलोमिटर देखि २ हजार किलोमिटरको बीचमा अवस्थित हुन्छ ।
लो अर्थ अर्बिटपछि मिडियन अर्थ अर्बिट आउँछ भने त्यसपछि जियोसिन्क्रोनस अर्बिट तथा त्यसपछि हाई अर्थ अर्बिट हुन्छ । हाई अर्थ अर्बिट पृथ्वीको सतहबाट ३५ हजार ७८६ किलोमिटरमा अवस्थित हुन्छ ।
यसअघि सन् २००७ मा चीनले पनि ब्लालेस्टिक मिसाईल प्रयोग गरेर आफ्नो पुरानो मौसमको लागि राखिएको स्याटेलाइट ध्वस्त पारेको थियो, जून पृथ्वीको सतहभन्दा ५३५ किलोमिटर माथि अर्बिटमा थियो ।
प्रकाशित: १३ चैत्र २०७५, बुधबार