Technology Khabar ११ कार्तिक २०७२, बुधबार
काठमाडौं ।
काठमाडौं, ११ कात्तिक । पछिल्लो समय सुचना प्रविधि तथा स्मार्ट प्रविधि निर्माण गर्ने कम्पनीहरुको संख्या बढिरहेको छ । हरेक क्षण विश्वमा कुनै न कुनै नयाँ प्रविधिको बारेमा चर्चा परिचर्चा हुने गरेको छ । यसै सन्दर्भमा विश्वका प्रमुख टेक कम्पनीहरुमध्येका केहि कम्पनीहरुसँग भने कति रकम छ भन्ने सबैको जिज्ञासाको विषय हुनसक्दछ । विश्वभरका लाखौं टेक कम्पनीहरुमध्ये केहि सिमित कम्पनीहरुसँग अर्बौंको नगद रकम रहेको छ ।
विश्वका सबैभन्दा ठूला र प्रमुख कम्पनीहरु जो नयाँ र स्मार्ट प्रविधिमा आधारित भएर आफ्ना सेवा तथा उत्पादनहरुको बिक्री बितरण गरिरहेका छन्, यी कम्पनीहरु अधिकांश अमेरिकास्थित सिलिकन भ्यालीमा आधारित रहेको देखिएको छ । सिलिकन भ्यालीमा रहेका यी कम्पनीहरुको नगद मौज्दात यस्तो छ ।
यी कम्पनीहरुमध्ये सबैभन्दा धेरै नगद रकम विश्वको सबैभन्दा मुल्यवान कम्पनीको रुपमा स्थापित हुन सफल भएको एप्पल इंक (Apple Inc.)सँग नै रहेको छ । धनीहरुको बारेमा जानकारी दिने पत्रिका फोर्ब्सका अनुसार अहिले एप्पलसँग एक्लै २ सय ५ दशमलब ५ विलियन अमेरिकी डलर नगद रहेको छ । यो रकम यसपछिको श्रेणीमा रहेका अन्य कम्पनीहरु माइक्रोसफ्ट र अल्फावेटको संयुक्त नगद भन्दा पनि निकै बढि हो । एप्पल कम्पनीको आम्दानीको प्रमुख स्रोत भनेको यसले बिक्री गर्ने एप्पल ब्राण्डका आईफोन, आइप्याड, आइपड, ल्यापटप, डेस्कटपलगायतका प्रविधिमा आधारित ग्याजेट्स हुन् । अझ त्यसमध्ये पनि एप्पलले आईफोनको बिक्रीबाट वार्षिक अर्बौ रुपैंया आम्दानी गर्दछ । आईफोन विश्वभरी नै सबैभन्दा रुचाईएको ब्राण्ड हुन पुगेको छ ।
त्यस्तै एप्पलपछि सबैभन्दा बढि रकम माइक्रोसफ्ट (Microsoft) सँग रहेको छ । विश्वका सबैभन्दा धनी मानिसको रुपमा परिचित विल गेट्सको कम्पनी माइक्रोसफ्टले विश्वभर आफ्ना सफ्टवेयरहरु प्रमुखरुपमा बिक्री गर्दै आएको छ । यसका साथै यो कम्पनीले सुचना प्रविधिसँग सम्बन्धित अन्य सेवाहरु तथा अहिले स्मार्टफोन पनि बिक्री गर्दै आएको छ । माइक्रोसफ्टको पछिल्लो सफ्टवेयर विण्डोज १० अपरेटिंग सिस्टम विश्वभर निकै लोकप्रिय रहेको छ । जो कम्पनीसँग १ सय ७ दशमलब ९ विलियन अमेरिकी डलर नगद रहेको छ ।
सबैभन्दा धेरै नगद हुने कम्पनीको तेस्रो स्थानमा गूगलको माउ कम्पनी अल्फाबेट (Alphabet) रहेको छ । हालै गूगलले आफ्नो माउ कम्पनीको रुपमा अल्फाबेट इंकको घोषणा गरेको थियो । यो कम्पनीले गूगललगायत अन्य विभिन्न टेक कम्पनीहरुलाई ओगटेको छ । तर पनि अल्फाबेटको मुख्य आम्दानीको स्रोत भनेको गूगलको आम्दानी नै हो । विश्वको सबैभन्दा ठूलो सर्च इन्जिन गूगल र त्यो कम्पनीले उत्पादन गर्ने विभिन्न ग्याजेट्स, सेवाहरु नै यसको प्रमुख आम्दानी हो । अहिले विश्वभर गूगलको एन्ड्रोयडमा आधारित स्मार्टफोनहरु प्रयोग भईरहेका छन् ।
अल्फाबेटपछि यो श्रेणीको चौथो स्थानमा सिस्को (Cisco) कम्पनी रहेको छ । नेटवर्किंग तथा सफ्टवेयर उत्पादक कम्पनीको रुपमा ख्यातीप्राप्त सिस्कोसँग ६१ दशमलब ५ विलियन अमेरिकी डलर नगद रहेको छ । त्यस्तै अर्को सफ्वेयर निर्माता कम्पनी ओर्याकल (Oracle) सँग पनि ५४ विलियन अमेरिकी डलर नगद रहेको छ । यो कम्पनी सबैभन्दा धेरै नगद हुने कम्पनीको पाँचौ स्थानमा रहेको छ ।
सबैभन्दा धेरै नगद हुने कम्पनीको छैटौं स्थानमा अर्को सर्च इन्जिन कम्पनी याहू (Yahoo) रहेको छ । याहूको प्रमुख आम्दानीको स्रोत भनेको सर्च इन्जिन तथा यसले संचालन गर्ने इमेल सेवा नै हो । याहूसँग मात्रै नगद, छोटो समय तथा लामो समयको लगानी गरेर ३३ दशमलब ९ विलियन अमेरिकी डलर रहेको छ ।
यो सूचीको सातौं स्थानमा अर्को टेक कम्पनी क्वालकम (Qualcomm) रहेको छ । क्वालकम विशेषगरी चिपसेट निर्माण, हार्डवेयर जस्तै सेमि कन्डक्रट निर्माणकर्ताको रुपमा चिनिन्छ । यो कम्पनीसँग नगद छोटो तथा लामो अवधिको लगानीसहित कूल ३१ दशमलब ५ विलियन अमेरिकी डलर मौज्दात रहेको छ । त्यसैगरी सबैभन्दा बढि नगद हुने सिलिकन भ्यालीका कम्पनीहरुमध्ये आठौं स्थानमा ईएमसी (EMC) नामक कम्पनी रहेको छ । यो कम्पनीसँग १५ विलियन अमेरिकी डलर नगल, छोटो तथा लामो अवधिको लगानीसहितको मौज्दात रहेको छ । ईएमसीको मूख्य आम्दानीको स्रोत भनेको कम्प्यूटर स्टोरेज डिभाइस बिक्री हो ।
यो सूचीको नवौं स्थानमा ईकमर्श साइट ईवे (ebay) रहेको छ । यो कम्पनीले अनलाईन स्टोर संचालन गर्दछ भने यो विश्वको प्रमुख ईकमर्श साइटको रुपमा परिचित रहेको छ । त्यस्तै यसले क्याटालगमा आधारित रिटेल स्टोर संचालन गर्दछ । यो कम्पनीसँग नगद छोटो तथा लामो अवधिको रकम गरि कूल १३ दशमलब ७ विलियन अमेरिकी डलर मौज्दात रहेको छ ।
सिलिकन भ्यालीका सबैभन्दा धेरै नगद भएको कम्पनीहरुको सूचीमा फेसबुक(Facebook) भने दशौं नम्बरमा रहेको छ । सोसियल साइटको प्रमुख स्थानमा रहेको फेसबुकसँग कुल ११ दशमलब २ विलियन नगद मौज्दात रहेको छ । यो कम्पनीको प्रमुख आम्दानीको स्रोत फेसबुकमा रहेको अबौं व्यक्तिहरुको बारेमा जानकारी हुनु र त्यसको आधारमा हुने विज्ञापन नै हो ।
फोब्र्सका अनुसार यी कम्पनीहरु शेयर बजारमा अन्य कम्पनीहरुभन्दा अधिक सुरक्षित रहेको छन् । यी कम्पनीहरुको नगद मौज्दातले गर्दा शेयर बजार गिर्दो अवस्थामा भएपनि यी कम्पनीहरु भने आफ्नो नगद मौज्दातले गर्दा अन्य प्रतिस्पर्धिहरु भन्दा निकै सुरक्षित हुन्छन् ।
यो सूचीको प्रमुख स्थानमा रहेको एप्पलसँग २ सय ५ दशमलब ७ विलियन नगद भएपनि रोचक विषय भनेको यसको कूल सम्पत्तिको केबल १४.३ प्रतिशत मात्र नगद, छोटो तथा लामो अवधिको लगानी रहेको छ । यो अनुपात यसका सहकर्मी कम्पनीहरुको भन्दा निकै कम हो भने यसको अधिक नगद दिर्घकालिन लगानीको रुपमा रहेको छ ।
प्रकाशित: ११ कार्तिक २०७२, बुधबार