जिओमी ब्राण्डले नेपाली मोबाइल प्रयोगकर्तालाई नयाँ अनुभव दिनेछ

Technology Khabar १० कार्तिक २०७१, सोमबार

जिओमी ब्राण्डले नेपाली मोबाइल प्रयोगकर्तालाई नयाँ अनुभव दिनेछ
Classic Tech

विश्व बजारमा निकै चर्चा कमाएको जिओमी (Xiaomi) ब्राण्ड नेपाल भित्रने तरखरमा छ । ‘चीनियाँ एप्पल’ पनि भनेर चिनिने जिओमीलाई नेपालमा भने मोबिल्याण्ड इलेक्ट्रोनिक प्रालिले आधिकारीक बितरकको रुपमा ल्याउन लागेको हो । छिमेकी मुलुक भारतमा पनि ‘हट केक’ भएको र इकमर्श साइट फ्लिपकार्टबाट मात्रै बिक्री गर्दा पनि बिक्री रेकर्ड कायम गरिरहेको छ भने नेपालमा पनि त्यसको बारेमा निकै सोधखोज हुँदै आएको छ । नेपालमा करिब १०० करोड रुपैंयाको  वार्षिक माेबाइल बिक्री लक्ष्य राखेको कम्पनीले अनलाईनमार्फत पनि बिक्री गर्ने तयारी गरेको छ ।

हंगकंगको जेएमजी कम्पनीको सहकार्यमा जिओमीका करिब ६ वटा मोडल नेपालमा ल्याउन लागेको मोबिल्याण्ड ग्रुपका प्रमुख कार्यकारी अधिकृत (ग्रुप सिईओ) सुवर्ण महर्जनसँग गरेको कुराकानीको अंश ।

तपाईँको विचारमा अहिले नेपाली मोबाइलको बजार कस्तो छ ? 

अहिले नेपालमा मोबाईलको बजार निकै राम्रो छ । पहिलेको तुलनामा मोबाइलको बजार वृद्धि भइरहेको छ । अहिले अधिकांश व्यक्तिहरु नयाँ नयाँ मोबाइल किन्न रुचाउने देखिएको छ भने बजार पनि त्यहि अनुपातमा वृद्धि हुँदैछ ।

बजारमा कस्ता मोबाइलहरु बिक्री हुने गरेका छन् ?

नेपाली क्रेताहरुले नयाँ स्मार्टफोनहरु रुचाउने गरेका छन् । उनिहरुले विभिन्न स्मार्टफोनहरु खरिद गर्नुका साथै फरक र नयाँ प्रविधिका मोबाइलहरु खरिद गर्ने गरेको देखिएको छ । यसको अर्थ ग्राहकहरु हरेक पटक नयाँ प्रविधिसँग अपडेट हुन चाहिरहेका छन् ।

अहिले बजारमा विभिन्न ब्राण्डका मोबाइलहरु भित्र्याउने लहर चलेको छ तर के ती सबै बिक्री हुन्छन् ?

बजार निकै विस्तार हुँदै गएको हुँदा नयाँ नयाँ मोबाइल ब्राण्डहरु आउनु स्वभाविक हो तर अब बजारमा क्रेताहरुले नयाँ प्रविधि सहितका र नयाँ सफ्टवेयरसहितका मोबाइल खोजिरहेको हामीले अनुभव गरेका छौं । अहिले बजारमा अधिकांश एन्ड्रोइड सिष्टमका मोबाइल फोनहरु मात्र पाइन्छ तर क्रेताहरुले भने विश्व बजारमा नाम चलेका र फरक । फरक अपरेटिङ सिष्टमसहित चलाउन मिल्ने मोबाईल फोन खोजेको पाइन्छ । नेपालमा अहिले पछिल्लो पटक भित्रीएका मोबाइलहरुले ब्राण्ड टेष्ट मात्र गरिरहेको हाम्रो बुझाईछ ।

तपाईँहरुले पनि नयाँ ब्राण्ड भित्र्याउँदै हुनुहुन्छ । त्यो कुन ब्राण्ड हो ?

हामीले नेपालमा भित्र्याउन लागेको ब्राण्ड भनेको जिओमी (Xiaomi) ब्राण्ड हो, जसलाई कसैले श्याओमी त कसैले सिओमी पनि भन्नछन् । यसलाई एप्पल अफ चाइना भनेर विश्व बजारमा चिनिन्छ । यो फोन चीनमा सबैतिर उपलब्ध छ र यो फोनले एप्पलजस्तै अपरेटि९ गर्दछ । अहिले यो एन्ड्रोइड अपरेटि९ सिष्टममा चल्दछ । यो अहिलेको हट केक स्मार्टफोन हो ।

चीनियाँ ब्राण्डलाई नेपालमा अझै विश्वास गर्न सकेको छैन नी होइन र ?

अहिले धेरैजसो मोबाईल ब्राण्ड र उत्पादन चीनमा नै हुने गर्दछन् । चीनमा उत्पादित सबै ब्राण्ड गुणस्तरहीन हुन्छन भन्ने नेपालीहरुको धारणा छ तर त्यसो होइन् । अहिले विश्वमा उत्पादन हुने अधिकांश प्रविधियुक्त र इलेक्ट्रोनिक्स सामाग्रीहरु चीनमा नै उत्पादन हुने गर्दछन् । उदारहणको लागि आइफोन पनि चीनमा नै उत्पादन हुन्छ । तर त्यसको गुणस्तर कम्पनीले निर्धारण गरे बमोजिमको मात्रै हुन्छ, त्यसैले त्यो स्तरीय हुन्छ । त्यस्तै किसिमको उच्च गुणस्तरका स्मार्टफोन मात्र जिओमीले उत्पादन गर्दछ । यो फोन ए ग्रेडको चीनियाँ ब्राण्ड हो । त्यसैले यो फोनमा समस्या आउँदैन् ।

केहि समय अघि त भारतमा ‘फ्लिकार्ट’ इकर्मश साइटबाट जिओमीका बिभिन्न ब्राण्डका मोबाइल बिक्री गर्दा ग्राहकले खरिद गर्न लाइनमा बस्नु परेको थियो त्यसबाट पनि यो ब्राण्डको विश्वसनियता बुझ्न सकिन्छ ।

यो फोनको विशेषता के छ ?

यो फोन गुणस्तरीय भएको र विश्वभर यसको बजार विस्तार हुँदै गएको छ । जिओमी ब्राण्डको आफ्नै एमआई क्लाउड रहेको छ भने यसको आफ्नै सर्भर पनि रहेको छ । यसको सर्भर अपडेट पनि भइरहेको हुन्छ । जसले गर्दा मोबाइल प्रयोगकर्ताहरुको डाटा राख्न सुरक्षित हुन्छ । यहि कारणले अन्य चीनियाँ ब्राण्ड भन्दा जिओमी मोबाइलको बजार नेपालमा राम्रो भनेर भन्न सक्दछौं ।

त्यसैगरी हामीले जिओमीका विभिन्न ६ मोडलका स्मार्टफोन भित्र्याउँदैछौं । त्यसमा एमआई थ्री, एमआई वन एस जसलाई रेडमी वन एस पनि भनिन्छ, ट्याबलेट, नोट एमआई, एमआई फोरलगायतका मोडल भित्र्याउँदैछौं ।

चिनीयाँ ब्राण्डका मोबाइलहरु नेपालमा पछिल्लो समयमा निकै भित्रीँदैछ, बजारमा प्रतिस्पर्धा त निकै हुन्छ होला ?

यो सहि हो अब बजारमा निकै प्रतिस्पर्धा गर्नुपर्ने हुन्छ । नेपाली बजारमा पनि चीनियाँ ब्राण्डका स्मार्टफोन निकै छन् ती सबैसँग हामीले प्रतिस्पर्धा गर्नुपर्ने हुन्छ । त्यसको लागि कम्पनीको सहकार्यमा हामी बजार प्रतिस्पर्धा रणनीति तयार गर्नेछौं । अर्कोतर्फ यो उच्चस्तरको ब्राण्डको स्मार्टफोन भएको हुँदा हामीलाई प्रतिस्पर्धा गर्न अरुभन्दा केहि सहज हुने अनुमान छ । हामीले एक तर्फ ब्राण्ड अवेयर गराउने र दोस्रो तर्फबाट बजार मुल्यमा प्रतिस्पर्धा गर्नेछौं ।

जिओमीको लागि बजार बिस्तार योजना कस्तो छ त ?

हामीले नेपालभर वितरक नियुक्त गरेका छौं । र अरुपनि गर्दैछौं । उनिहरुलाई निश्चित बिक्री लक्ष्य दिएका छौं । भने मोबाइल प्रयोगकर्ताहरुलाई एक वर्षको सभिस सुविधा र सर्भिस सेन्टरको व्यवस्था गर्दैछौं । त्यसैगरी हामी आफैंले टु लेभलसम्मको सेवा दिने गरी व्यवस्था गर्दैछौं, जसले गर्दा मोबाइल बनाउन काठमाडौंसम्म आउनु नपरोस् ।
हाम्रो बिक्री लक्ष्य भनेको पहिलो वर्ष १ सय करोड रुपैंयाको मोबाइल बिक्री गर्नु हो । तर त्यो भन्दा बढि हामीले बिक्री गर्ने अनुमान गरेका छौं । यो फोनले नेपालमा पनि बिक्री रेकर्ड राख्ने आशा छ ।

तपाईहरुको लक्षित ग्राहक को हो ?

हाम्रो स्मार्टफोनको लक्षित ग्राहक भनेको मध्यमस्तरका र उच्चमध्यमस्तरका ग्राहकहरु हुन जसले लगभग ३० हजारको हाराहारीमा खर्च गर्न सकोस् । र त्यस्ता मोबाईल ग्राहकहरु जो ६ । ६ महिनामा नयाँ फोन खरिद गर्दछन् ।

तपाईहरुले जिओमीको लागि बुकिङ पनि खोल्नु भएको छ कस्तो छ माग ?

हामीले अनलाईन माध्यमबाट बुकिङ खोलेको केहि दिन मात्र भएको छ तर निकै सोधपुछ आईरहेको छ भने निकै मागहरु पनि आएका छन् । जस्तो रेडमी वन एसको लागि मात्रै १५०० भन्दा बढि बुकिङ भएको छ भने एमआई नोट र एमआई थ्रीको माग पनि करिब १ हजार पिस पुगेको छ ।

अझ हामीले प्रत्यक्षरुपमा बितरकहरुबाट आएको माग र बुकिङ पनि यहि हाराहारीमा संकलन गरिरहेका छौं । र यो बढ्दो क्रममा छ ।

फोटोः महर्जनको फेसबुकबाट

प्रकाशित: १० कार्तिक २०७१, सोमबार

Comments are closed.

Loading...