Technology Khabar १९ जेष्ठ २०७८, बुधबार
काठमाडौं ।
हालै सरकारले राजपत्रमा प्रकाशित गरेर आवश्यक सेवामा राखेको दूरसञ्चार तथा इन्टरनेट सेवा प्रदायकका गाडीहरु निषेधाज्ञाको अवधिभर सरकारी पासको आधारमा मात्र चल्न पाउने भएका छन् ।
निषेधाज्ञामा यसअघि सम्बन्धित सेवा प्रदायक कम्पनीको परिचयपत्रको आधारमा निश्चित समय तोकेर सञ्चालन भईरहेका गाडीहरुलाई अहिले स्थानीय प्रशासनले यसअघिको भन्दा थप कडाई गरेको हो ।
काठमाडौं, भक्तपुर र ललितपुरका प्रमुख जिल्ला अधिकारीको बुधबार बसेको बैठकले हालको निषेधाज्ञालाई जेठ ३१ सम्म लम्ब्याउने निर्णय गरेको हो।
निषेधाज्ञाको बुँदा नम्बर ५ अन्तरगतको उपबुँदा (झ) मा इन्टरनेट सेवा तथा दूरसञ्चार सेवा प्रदायकका सवारी साधनहरुको बारेमा उल्लेख गरिएको छ । जसअनुसार अब सम्बन्धित मन्त्रालयको सचिव वा विभागिय प्रमुखले जारी गरेको पत्रको आधारमा मात्र आवतजावत गर्न पाईने भएको छ ।
यसअघि वैशाख १६ देखि जारी निषेधाज्ञालाई निरन्तरता दिँदै जेठ १४ देखि आदेशलाई थप कडा पारिएको थियो । जसमा प्रशासनले सरकारी कार्यालय र सार्वजनिक संस्थान जस्तै इन्टरनेट सेवा प्रदायक संस्था र एनसेलको नामै तोकेर कार्यालयमा आवतजावतका लागि निश्चित समयमा मात्र सवारी साधन सञ्चालन गर्न दिएको थियो जसमा कम्पनी वा सेवा प्रदायक कम्पनीको परिचयपत्र आवश्यक हुने गरेको थियो ।
आदेशअनुसार त्यस्ता कार्यालयका सवारी साधनहरु बिहान ९ः३० बजेदेखि १०ः३० बजेसम्म तथा बेलुका ५ बजेदेखि ६ बजेसम्मको लागि आवतजावतका लागि मात्र प्रयोग गर्ने गरि व्यवस्था मिलाएको थियो ।
यो पनि हेर्नुस्-
अब भने त्यसमा झनै कडाई गर्दै सम्बन्धित मन्त्रालयका सचिव तथा विभागीय प्रमुखले जारी गरेको पास तथा परिचय पत्रका आधारमा मात्र सेवा प्रदायकहरुको सवारी साधन आवतजावत गर्न पाउने भएका हुन् ।
‘सरकारी कार्यालय, सार्वजनिक संस्थान, बैंक, अन्य सम्पूर्ण वित्तीय संस्थाहरु, इन्टरनेट सेवा प्रदायक संस्था र दूरसंचार प्रदाय संस्थाका सवारी साधनको हकमा सम्बन्धित मन्त्रालयका सचिव तथा विभागीय प्रमुखले जारी गरेको पास तथा परिचय पत्रका आधारमा आवतजावत गर्ने व्यवस्था मिलाउने,’ निषेधाज्ञाको आदेशमा भनिएको छ ।
तर दूरसञ्चार तथा इन्टरनेट सेवाको मर्मतका लागि भने यसअघिकै जस्तै सहजरुपमा ब्यानर वा प्रिन्टमा विषय उल्लेख गरी निर्वाध संचालन गर्न पाउने व्यवस्था गरिएको छ ।
यसअतिरिक्त अन्य आदेशको नयाँ व्यवस्थाअनुसार अब किराना र डिपार्टमेन्ट स्टोर बिहान ९ बजेसम्म खोल्न दिइनेछ । फलफूल र पुस्तक पसल पनि बिहान ९ बजेसम्म खुल्नेछन्।
हेर्नुस नयाँ व्यवस्था-
प्रकाशित: १९ जेष्ठ २०७८, बुधबार