सुजुकी सुपर क्यारी नेपाली बजारमा सार्वजनिक

काठमाडौं ।

काठमाडौं, २९ मंसिर । सुजुकी गाडिको नेपालका लागि आधिकारिक विक्रेता सीजी मोटोकर्पले नेपाली बजारमा लाइट कमर्शियल भेहिकल (एलसीभी) सुजुकी सुपर क्यारी सार्वजनिक गरेको छ । यससँग कम्पनीले एलसीभी सेग्मेण्टमा समेत आफ्नो ब्यवसाय विस्तार गरेको छ ।
सीजी मोटोकर्पले काठमाडौंमा कम्पनीको महाराजगञ्ज र बालकुमारीस्थित विक्रि केन्द्रमार्फत गाडी उपलब्ध गराउने छ । त्यसैगरी, उपत्यका बाहिर भने पोखरा, बिरगञ्ज, विराटनगर र बुटवल विक्री केन्द्रमार्फत गाडी उपलब्ध गराइने कम्पनीले जानकारी दिएको छ । कम्पनीले आउने महिनाहरुमा आफ्नो विक्रि सञ्जाल थप बृहत बनाउँदै लैजाने बताएको छ ।

कम्पनीद्वारा जारी गरिएको विज्ञप्ति अनुसार सुजुकी सुपर क्यारीलाई फाइभ स्पिड म्यानुअल ट्रान्समिशन सहितको ७ सय ९३ सीसी क्षमताको ट्विन सिलिण्डर ईञ्जिनले शक्ति प्रदान गर्छ । कम्पनीका अनुसार सुपर क्यारीले ३ हजार ५ सय आरपीएममा ३२ दशमलव ६३ बीएचपीको शक्ति र २ हजार आरपीएममा ७५ एनएम टर्क उत्पन्न गर्ने क्षमता राख्छ । त्यसैगरी, नयाँ गाडीले एआरएआई प्रमाणित २२ दशमलव ०७ किलोमिटर प्रतिलिटर माइलेज दिने कम्पनीको दावी छ । कम्पनीका अनुसार गाडीको अधिकतम गति क्षमता ८० किलोमिटर प्रति घण्टा छ ।

३ दशमलव २५ स्क्वायर मिटरको लोडिङ बे सहितको सुपर क्यारीले ७ सय ४० किलोग्राम भारबहन (पेलोड) गर्ने क्षमता राख्छ ।

नयाँ एलसीभी, सुपर क्यारीमा कम्पनीले लाइट स्टेरिङ ह्विल, मोबाइल चार्जिङ सकेट, डुअल एसिस्ट ग्रिप, मल्टि पर्पोज स्टोरेज स्पेस, लकगर्न मिल्ने ग्लोभबक्स र बोटल होल्डर लगायत सबै आधारभूत फिचर्स समाहित गरेको छ ।

‘भारु. ३ सय करोड भन्दा बढीको लगानीमा भारतमा सुपर क्यारीको विकास तथा निर्माण गरिएको हो’ सीजी मोटोकर्पका कार्यकारी निर्देशक करण चौधरीले भने ‘उपभोक्ताको फाइदा तथा आवश्यकतालाई दृष्टिगत गर्दै सवारीको डिजाइनमा गहन अध्ययन तथा विशेष ध्यान दिइएको छ ।’ सुपर क्यारीले अधिकतम भारवहन क्षमता अत्यधिक शक्तिका साथै उत्कृष्ट माइलेज समेत प्रदान गर्ने चौधरीले बताए ।