Technology Khabar ८ माघ २०७२, शुक्रबार
काठमाडौं ।
काठमाडौं, ८ माघ । ललितपुर मोबाइल कम्प्लेक्सको शुभारम्भको अवसर पारेर आयोजना गरेको मोबाईल मेला २०१६ आजदेखि शुरु भएको छ । उक्त मोबाइल मेलाको एक कार्यक्रमका बिच पूर्व यूवराज पारस विक्रम शाहले उद्घाटन गरे ।
कम्प्लेक्सको ग्राण्ड ओपनिंगको अवसर पारेर आजदेखि माघ १६ गतेसम्म मेला आयोजना हुने आयोजकले जानकारी दिएको छ ।
कार्यक्रममा ललितपुर मोबाइल कम्प्लेक्सका अध्यक्ष पुरुषोत्तम बस्नेतले कम्प्लेक्सको शुभारम्भको अवसर पारेर मोबाइल मेला गर्न लागिएको भन्दै कुनै पनि ब्राण्डका फोनहरु सुपथ मूल्यमा खरिद गर्न सकिने बताए । उनले ग्राहकहरुलाई मोबाइललगायतका सामाग्रीमा अधिकतम छुट दिईने जानकारी दिए ।
मोबाइल मेलाको पहिलो दिन करिब ३० हजार व्यक्तिले अवलोकन गरेको आयोजकले जानकारी दिएको छ ।
कम्पनीका अनुसार मोबाइल मेलामा न्यूनतम ९ सयदेखि १ लाख २५ हजार रुपैंयासम्मको ब्राण्डेड मोबाइल फोनहरु उपलब्ध हुनेछ । मेलाको अवधिभर कुनैपनि मोबाइल खरिदमा ४० प्रतिशतसम्मको नगद छुट ग्राहकले प्राप्त गर्नेछन भने एसेसरिजमा ५५ प्रतिशतसम्मको छुट दिईनेछ । त्यसैगरी कुनैपनि मोबाइल तथा ग्याजेटस् सर्भिस गरेबापत सर्भिसमा २५ प्रतिशतसम्मको छुट उपलब्ध हुने बताईएको छ ।
ललितपुर मलको दोस्रो तल्लामा रहेको कम्प्लेक्समा ४० भन्दा बढि मोबाइल शोरुम तथा आधिकारीक सर्भिस सेन्टर संचालनमा आईसकेएका छन् । त्यस्तै कम्प्लेक्समा सबैभन्दा ठूलो मल्टिब्राण्ड मोबाइल शोरुम संचालन गरिएको छ, जहाँ एकै पटक ४ हजारदेखि ५ हजार ग्राहकले सुविधा प्राप्त गर्न सक्न कम्पनीले जनाएको छ ।
त्यसैगरी मेलामा आउने हरेकलाई निशुल्क प्रवेशको व्यवस्था गरिएको र निशुल्क लक्की ड्र कुपन दिईनेछ भने उक्त कुपनबाट हरेक दिन लक्कि ड्र मार्फत तीन वटा स्मार्टफोन उपहार प्रदान गरिने कम्पनीले उल्लेख गरेको छ ।
मेलामा करिब ३ लाख भन्दा बढिले अवलोकन गर्ने अनुमान गरिएको छ । एक्स्पोको अन्तिम दिन मोबाइल अवलोकन तथा प्रवेशकर्ताहरु मध्येबाट १ जनालाई लक्कि ड्रको माध्यमबाट १ लाख रुपैंया बराबरको बम्पर उपहार प्रदान गरिने आयोजकको दाबी छ ।
मोबाइल मेलामा सामसुंग, हुवावे, जियोनी, आईफोन, एचटिसी, माइक्रोसफ्ट फोनहरु, डिटिसी, लाभा, विनकम, फ्लाई, कलर्स, इन्टेक्स, माइक्रोम्याक्स, सोनी, एलजी, ब्ल्याकबेरी, कार्बन, पानासोनिक, केनजिण्डालगायत ब्राण्डका फोनहरु उपलब्ध गराईने आयोजकको भनाई छ ।
प्रकाशित: ८ माघ २०७२, शुक्रबार
