दूरसञ्चार प्राधिकरणले विदेशी मुद्रा सिफारिस नदिँदा एनसेलको व्याण्डविथ आयात रोकियो

काठमाडौं ।

नेपाल दूरसञ्चार प्राधिकरणले एनसेल आजियाटा लिमिटेडको विदेशी मुद्रा भुक्तानी सिफारिस रोकिदिएसँगै कम्पनीले विदेशबाट ल्याउने इन्टरनेट व्याण्डविथ रोकिएको छ।

एनसेललाई इन्टरनेट सेवाका लागि ब्यान्डविथ प्रदान गर्ने सिंगापुरस्थित अपस्ट्रिम प्रदायक कम्पनी टाटा कम्युनिकेसन्स इन्टरनेशनलले आफ्नो बक्यौता नतिरेको भन्दै यहि असार ३ गतेबाट ब्यान्डविथ दिन बन्द गरेको छ।

टाटाबाट प्राप्त गरेको ब्यान्डविथसँग सम्बन्धित सेवा वापत भुक्तानीको लागि आवश्यक पर्ने विदेशी मुद्रा स्वीकृति तथा सिफारिस प्राधिकरणबाट नपाएकोले एनसेलले भुक्तानी गर्न नसकेको कारण ब्यान्डविथ बन्द गरिदिएको हो।

नियामकले करिब ६ महिनादेखि एनसेलको ब्याण्डविथ तथा अन्य उपकरणहरु आयातका लागि आवश्यक पर्ने विदेशी मुद्रा स्वीकृति तथा सिफारिस रोकिदिएको छ।

प्राधिकरणले २१०० मेगाहर्ज फ्रिक्वेन्सी ब्याण्डको प्रयोग बापतको दस्तुर नतिरेको भन्दै नियामकिय सिफारिस रोकिदिएको हो। जसले गर्दा टेलिकम अपरेटरले ब्याण्डविथ आयातमा तिर्नुपर्ने रकम तथा उपकरणहरु आयात गर्न नसकेको जनाएको छ।

एनसेलले २०७८ सालमानै उक्त दस्तुर तिर्नु नपर्ने भन्दै नियामकको विरुद्धमा अदालत गएकोमा सर्वोच्च अदालतबाट कारण देखाउ आदेश* ल्याएको थियो तर अदालतमा विचाराधिन रहेको सोही विषय उल्लेख गर्दै दूरसञ्चार प्राधिकरणले सिफारिस रोकिदिएको गुनासो गरेको छ।

सम्बन्धित समाचार-

२१०० मेगाहर्ज ब्याण्ड फ्रिक्वेन्सी मूल्यको विषयमा एनसेलको मुद्दा, सर्वोच्चद्वारा कारण देखाउ आदेश

लामो समयदेखि विदेशी मुद्रा स्वीकृति तथा सिफारिस रोकिएपछि एनसेलले पटक पटक नियामकलाई सिफारिस खुलाई दिन भन्दै अनुरोध गरेको थियो।

टाटाले ब्यान्डविथ दिन रोकेको बारे गत हप्ता एनसेलले नियामक प्राधिकरणलाई पत्रमार्फत जानकारी गराउँदै तत्काल भुक्तानीका लागि विदेशी मुद्रा स्वीकृति तथा सिफारिस गरिदिन भनेको प्राधिकरण स्रोतले जानकारी दिएको छ।

एनसेलले प्राधिकरणलाई जानकारी गराएअनुसार, असार ३ गते पश्चात कम्पनीको सेवा संचालनमा समेत असर परेको छ। विगत ६ महिना भन्दा बढि समयदेखि विदेशी मुद्रा स्वीकृति तथा सिफारिस रोकेको र यसबाट सेवा विस्तार, सुधार गर्न नसकेको, ब्यान्डविथको भुक्तानी र विदेशी परामर्शदाताहरुलाई दिन पर्ने भुक्तानी गर्न नसकेको पत्रमा उल्लेख छ।

आगामी दिनमा ब्यान्डविथसँग सम्बन्धित सेवा वापतको रकम समयमा भुक्तानी गर्न नसकिएमा उक्त आपूर्तिकर्ता तथा अन्य ब्यान्डविथ आपूर्तिकर्ताबाट थप व्याण्डविथ बन्द गर्नसक्ने सम्भावना देखिएको र त्यसले कम्पनीको सेवानै अवरुद्ध हुन सक्ने अवस्था श्रृजना भएको जानकारी एनसेलले दिएको छ।

तर यस विषयमा प्राधिकरणले कुनै प्रतिकृया नदिएको एनसेलले उल्लेख गरेको छ। एनसेलले अदालती प्रकृयामा रहेको विषयमा समेत नियामकले रकम तिर्न दबाब दिँदा त्यसले दूरसञ्चार क्षेत्रमा असर पार्ने बतायो।

“हाम्रो विदेशी मुद्रा सिफारिस रोकिएकोनै लामो समय भयो,” एनसेलले भन्यो, “यसले अहिले व्याण्डविथ आयातमा असर पारेको छ। यस्तै भए भविश्यमा उपकरणहरु आयात हुन नसक्ने र त्यसले आगामी दिनमा मोबाइल गुणस्तरमा नै असर पार्न सक्नेछ।”

उता, भारतीय अपस्ट्रिम प्रदायक टाटाले आफ्नो वकिलहरुमार्फत पटक–पटक वक्यौता रकम दाखिला गर्न एनसेललाई कानूनी नोटिस जारी गरिसकेको छ भने समयमा वक्यौता दाखिला गर्न नसके मुद्दा हाल्ने चेतावनी दिएको उल्लेख छ।

एनसेलले भारत र चीनका विभिन्न ब्यान्डविथ आपूर्तिकर्ताहरुबाट आफूलाई आवश्यक पर्ने इन्टरनेट सेवाका लागि ब्यान्डविथ नियमित आयात गर्दै आएको छ।

यस बारेमा टेक्नोलोजीखबरले केहिदिन अघि सोध्दा दूरसञ्चार प्राधिकरणका प्रवक्ता सन्तोष पौडेलले दुबै कम्पनीहरुको विदेशी मुद्रा सिफारिस रोकिएको जानकारी दिएका थिए।

“दुबैले बाँकी बक्यौता रकम तिर्न बाँकी देखिएको छ। त्यो नतिरेसम्म सिफारिस हुँदैन्,” उनले भनेका थिए, “२१०० मेगाहर्ज व्याण्डमा प्रयोग भएको फ्रिक्वेन्सी दस्तुर बाँकी छ।”

स्मरणरहोस्, यसअघि, नियामक निकाय र सञ्चार तथा सूचना प्रविधि मन्त्रालयले इन्टरनेट सेवा प्रदायक (आईएसपी) हरुको विदेशी मुद्रा सिफारिस यसैगरी लामो समयसम्म रोकेको थियो।

उनीहरुलाई मर्मत संभारमा लाग्ने रोयल्टी र ग्रामीण दूरसञ्चार विकास दस्तुरको बाँकी बक्यौता नतिरेको भन्दै भुक्तानीका लागि विदेशी मुद्रा सिफारिस रोकिदिँदा, आइएसपीहरुले भारतीय अपस्ट्रिम सेवा प्रदायक एयरटेललाई रकम तिर्न नसक्दा; सूचना प्रविधि दिवसको दिनमा नै एयरटेलले नेपालमा आउने ब्याण्डविथ नै बन्द गरिदिएको थियो।

सो दिन करिब ४ घण्टा इन्टरनेट बन्द हुँदा सेवाग्राहीले निकै हैरानी पाएका थिए। तर आइएसपीहरु आफैंले सरकारले सिफारिस दिएसँगै तत्काल रकम भुक्तानी गरिदिने लिखित पुनः प्रतिबद्धता जनाएपछि एयरटेलले ब्याण्डविथ आगमन खोलेको थियो।

*सच्याईएको।