काठमाडौं ।
नेपाल दूरसंचार प्राधिकरणले केहि समयअघि अक्सन गराएको १८०० मेगाहर्ज फ्रिक्वेन्सी ब्याण्डलाई रिफ्रेम गरेको छ । हालै बसेको बोर्ड बैठकले १८०० मेगाहर्ज ब्याण्डलाई रिफ्रेम गर्ने र दूरसंचार सेवा प्रदायकहरुले प्रयोग गरिरहेको फ्रिक्वेन्सीलाई रिफ्रेमिङ्गअनुसार प्रयोग गर्नेगरि व्यवस्था गराउने निर्णय गरेको छ ।
प्राधिकरणकाअनुसार सेवा प्रदायकहरुले १८०० मेगाहर्ज ब्याण्डमा प्रयोग गरिरहेको र थप हुने फ्रिक्वेन्सीलाई व्यवस्थापन गर्न फ्रिक्वेन्सी रिफ्रेम गरिएको हो ।
१८०० मेगाहर्ज ब्याण्डको अगाडि रहेको नेपाल दूरसंचार कम्पनी लिमिटेडले प्रयोग गरिरहेको फ्रिक्वेन्सी ब्याण्ड र अन्तिममा रहेको यूनाईटेड टेलिकम(यूटिएल)को फ्रिक्वेन्सी रेन्जमा भने कुनै परिवर्तन भएको छैन् । त्यसबाहेक एनसेल, नेपाल स्याटेलाइट टेलिकम प्रालि, स्मार्ट टेलिकमको फ्रिक्वेन्सी रेन्जमा हेरफेर भएको छ भने बिचमा दुई स्थानहरुमा ५ मेगाहर्ज र २ मेगाहर्ज ब्याण्डविथ खाली रहेको प्राधिकरणले जानकारी दिएको छ ।
रिफ्रेमिङ्गसँगै एनसेलले अक्सनमार्फत १८०० मेगाहर्ज ब्याण्डमा पाएको ९ मेगाहर्ज ब्याण्डलाई व्यवस्थापन गरिएको छ। सो रिफ्रेमिङ्गअनुसार अब एनसेलले आफूले अक्सनमार्फत पाएको ९ मेगाहर्ज ब्याण्ड र यसअघि नै प्रयोगमा रहेको ११ मेगाहर्ज ब्याण्डलाई ‘एकै ढिक्का’को रुपमा प्रयोग गर्न सक्दछ ।
यसको अर्थ अब एनसेलले १८०० मेगाहर्ज ब्याण्डको एकै स्थानमा २० मेगाहर्ज फ्रिक्वेन्सी प्रयोग गर्न सक्दछ ।
सबै फ्रिक्वेन्सी एकै स्थानमा भएको खण्डमा दूरसंचार सेवा प्रदायकहरुले थप फिल्टर राख्नुनपर्ने र सेवाको गुणस्तर बढ्ने प्राधिकरणका प्रवक्ता मिन प्रसाद अर्यालले बताए ।
‘कम्पनीहरुले प्रयोग गर्ने च्यानल ब्याण्ड एकै स्थानमा हुँदा अतिरिक्त फिल्टर राख्नुपर्दैन भने डाटा सेवाको गुणस्तर पनि सुधार हुन्छ,’ प्रवक्ता अर्यालले भने ।
उनले फ्रिक्वेन्सी रिफ्रेम गर्दा दूरसंचार सेवा प्रदायकहरुले आफूले प्रयोग गरिरहेको फ्रिक्वेन्सी रेन्जमा केहि हेरफेर भएको जानकारी दिए ।
प्राधिकरणले गरेको फ्रिक्वेन्सी रिफेर्मअनुसार नै दूरसंचार सेवा प्रदायकहरुले फ्रिक्वेन्सी रेन्ज व्यवस्थापन गर्नुपर्नेछ । प्रवक्ता अर्यालकाअनुसार त्यसको लागि सबै सेवा प्रदायकहरुलाई पत्र पठाएर फ्रिक्वेन्सी रिफ्रेमको बारेमा जानकारी दिने र कम्पनीहरुले सोहि अनुसार फ्रिक्वेन्सी प्रयोग गर्नुपर्नेछ ।
नयाँ फ्रिक्वेन्सी रेन्जको आधारमा दूरसंचार सेवा प्रदायक कम्पनीहरुले अपलिंक र डाउनलिंकको लागि उपलब्ध फ्रिक्वेन्सी प्रयोग गर्नेछन भने त्यसमा आवश्यक फिल्टर समेत राख्नेछन् ।
प्राधिकरणले सो बारेमा सबै सेवा प्रदायकहरुलाई रिफ्रेम गरिएको १८०० मेगाहर्ज ब्याण्डको नयाँ च्यानल ब्याण्डअनुसार व्यवस्था मिलाउन १ महिनाको समयावधि समेत दिने भएको छ ।
यो पनि हेर्नुस्-
अक्सनमा किनेको फ्रिक्वेन्सी अझै चलाउन पाएन एनसेलले, ‘फ्रिक्वेन्सी रिफार्म’ गर्दै दूरसंचार प्राधिकरण
प्रकाशित: ३० फाल्गुन २०७६, शुक्रबार
