Technology Khabar १८ श्रावण २०७३, मंगलवार
काठमाडौं ।
काठमाडौं, १८ साउन । बहु प्रतिक्षित स्मार्टफोन सामसंग ग्यालेक्सी नोट सेभेन (Samsung Galaxy Note 7) आधिकारिकरुपमा सार्वजनिक भएको छ । सामसंगले मंगलबार एक कार्यक्रमकाबिच एज डिस्प्ले (Edge display) सहितको ग्यालेक्सी नोट सेभेन सार्वजनिक गरेको हो ।
यो स्मार्टफोन पछिल्लो दिनमा निकै चर्चामा रहेको थियो । कम्पनीले यो स्मार्टफोनलाई आफ्ना अन्य ग्यालेक्सी लाइनअपमा मिलाउन नयाँ नाम राखेको हो । त्यसैले सामसंगले नोट सिक्सको नामबाट नभई नोट सेभेनको नामबाट ग्यालेक्सी एस सेभेन तथा एस सेभेन एजसँग लाइनअप मिलाउन नाम राखेको हो ।
यो नोट सेभेनमा ग्यालेक्सी सिरिजका उच्च तहका प्रिमियम सेटहरुमा राखिने कयौं फिचरहरु राखिएका छन भने नयाँ फीचरहरु पनि थप गरिएका छन् ।
ग्यालेक्सी नोट सेभेन सामसंगको पहिलो दुबैतिर घुमाउदार स्क्रीन अर्थात कर्ब्ड एज भएको पहिलो नोट फोन हो । यसको स्ट्याण्डर्ड मोडल नोट सेभेन हेर्दा केहि ग्यालेक्सी एस सेभेन (Galaxy S7) जस्तै देखिन्छ । तर यसमा त्यो भन्दा ठूलो स्क्रीन अर्थात ५.७ इन्चको ड्यूल एज कब्र्ड डिस्प्ले राखिएको छ । यसमा पहिलो पटक भच्र्यूअल बेजेल फ्री कर्भच्यूल रहेको छ ।
यो स्मार्टफोन हेर्दा फोन र ट्याबलेटको हाईब्रिड भर्सन जस्तै देखिन्छ भने यो हातमा आरामले समाउन सकिने विश्लेषकहरुले उल्लेख गरेका छन् ।
त्यसैगरी कम्पनीले नोट सेभेनका साथमा एस पेन पनि उपलब्ध गराउने छ ।
ग्यालेक्सी नोट सेभेनका फिचरहरु
सामसंगले सार्वजनिक गरेको ग्यालेक्सी नोट सेभेनमा कयौं फिचरहरु राखिएको छ । जुन यो तहको स्मार्टफोनहरुमा पहिलो पटक पनि प्रयोग गरिएको छ ।
यो स्मार्टफोनमा ५.७ इन्चको ड्यूल एज कर्ब्ड सूपर एमोलेड डिस्प्ले राखिएको छ, जसको रिजोल्यूशन क्यूएचडी रहेको छ । यसको डिस्प्लेलाई कोर्निग गोरिल्ला ग्लास ५ द्धारा सुरक्षित पारिएको छ । यो ग्लास प्रयोग भएको पहिलो स्मार्टफोन हो – नोट सेभेन ।
प्रोसेसर
यसमा कम्पनीले अक्टा-कोर एक्सनोज ८८०० प्रोसेसर अथवा क्वाड कोर स्न्यापड्रयागन ८२० चीपसेट प्रयोग गरेको छ । जसअन्तर्गत अमेरिका, चीन र जापानमा स्न्यापड्रयागन तथा अन्य मुलुकहरुमा एक्सनोज चिपसेट प्रयोग गरिएका नोट सेभेन आउने छन् ।
स्टोरेज
यो स्मार्टफोनमा पनि कम्पनीले ग्यालेक्सी एस सेभेन सिरिज जस्तै ४ जीबीको र्याम प्रयोग गरेको छ । यसमा कम्पनीले ६४ जीबीको स्टोरेजमा सार्वजनिक गरेको छ । जुन सामसंगले स्मार्टफोनमा पहिलो पटक आन्तरिक स्टोरजको रुपमा प्रयोग गरेको डिभाइस हो । यसको स्टोरेजलाई माइक्रो एसडी कार्डद्धारा बढाएर २५६ जीबीसम्म पुर्याउन सकिन्छ ।
यूएसबी टाइप-सी पोर्ट
ग्यालेक्सी नोट सेभेनमा भएको अर्को मूख्य विशेषता भनेको यसमा प्रयोग गरिएको यूएसबी टाइप-सी पोर्ट होे । जुन क्विक चार्जका लागि पनि प्रयोग गर्न सकिन्छ । यो स्मार्टफोनमा ३५०० एमएएचको शक्तिशाली ब्याट्री रहेको छ, जुन यसको अघिल्लो संस्करण नोट फाइभभन्दा ठूलो हो ।
एस पेन स्टायलस (S Pen Stylus)
नोट सेभेनमा भएको अर्को विशेषता भनेको यससँग आउने एस पेन स्टायलस हो । नोट सेभेनको एस पेन स्टायलसको कार्यमा पनि धेरै सुधार गरेर ल्याईएको छ । यसमा स्क्रीन अफ मेमो राखिएको छ, जसले फोन लक भएको बेलामा पनि एस पेन त्यसको स्लटबाट झिकेर नोट लेख्न सकिन्छ । त्यसैगरी अलवेज अन डिस्प्ले फीचरमा आफ्नो नोटहरु पिन गर्न सकिने सुविधा राखिएको छ । यसमा अर्को नयाँ ट्रान्सलेट फिचर इन एयर कमाण्ड राखिएको छ, जसले विदेशी शब्दहरुलाई आफ्नो मन परेको भाषामा रुपान्तर गर्न सकिन्छ ।
स्तरिय क्यामरा
फोटोका लागि हेर्दा यसमा ग्यालेक्सी एस सेभेन लाइनअपमा भएको जस्तै १२ मेगापिक्सेल भएको ड्यूल पिक्सेल अटो फोकस रियर क्यामरा राखिएको छ भने सेल्फीका लागि ५ मेगापिक्सेलको फ्रन्ट क्यामरा राखिएको छ ।
एन्ड्रोयडको पछिल्लो भर्सन मार्शमाल्लो ६.०.१ भर्सनमा संचालन हुने यो डिभाइसमा हालै एन्ड्रोयडले नाम जुराएको एन्ड्रोयड नुगट अपडेट गर्न सकिनेछ, जुन यो वर्षको अन्त्यतिर वा सन् २०१७ को शुरुवातमा हुनेछ ।
वाटररेसिस्ट
सामसंगको ग्यालेक्सी नोट सेभेन पहिलो नोट हो जुन वाटरप्रुफ रहेको छ । यसले आईपी ६८ रेटिंग सर्टिफिकेट प्राप्त गरेको छ । यो स्मार्टफोनलाई १ मिटरसम्मको पानी मुनिको गहिराईमा लाँदा पनि पानीले भिज्दैन् भने यसको एस पेनले पनि पानी मुनि गएर लेख्न सकिन्छ ।
आइरिस स्क्यानर
यो स्मार्टफोनलाई प्रयोगकर्ताका लागि मात्र सुरक्षित बनाउन यसमा आइरिस स्क्यानर प्रयोग गरिएको छ, जुन सामसंग पेका लागि प्रयोग गरिने फिंगरप्रिन्ट रिडरलाई छिट्टै हटाउनेछ ।
सामसंग ग्यालेक्सी नोट सेभेन बुधवारदेखि नै प्रि अर्डर गर्न सकिन्छ । यसको विश्व बजारमा बिक्री अगस्ट १९ तारिखदेखि मात्र शुरु हुनेछ ।
यो स्मार्टफोन एस सेभेन लाइनअप जस्तै गियर भिआरसँग सिमित अवधिका लागि बण्डल गरिने छ भने नोट सेभेनको खरिदमा गियर फिट टू स्मार्ट ब्याण्ड अथवा २५६ जीबीको माइक्रो एसडी कार्ड प्राप्त गर्न सक्नुहुनेछ ।
यो फोन ब्लू कोरल, ओनेक्स ब्ल्याक, सिल्भर टाइटानियम र गोल्ड कलर अप्सनमा उपलब्ध हुनेछ । यो स्मार्टफोनको मूल्यको बारेमा भने अझैपनि जानकारी दिईएको छैन् ।
प्रकाशित: १८ श्रावण २०७३, मंगलवार