Technology Khabar २४ बैशाख २०८२, बुधबार
काठमाडौं ।
ओपनएआईले पहिले कोडियमका नामले चिनिने कृत्रिम बुद्धिमत्ता (एआई) मा आधारित कोडिङ उपकरण विण्डसर्फ खरिद गर्न लगभग ३ अर्ब डलरमा सहमति जनाएको छ। यसबारे ब्लूमबर्ग न्युजले स्रोतहरूको हवाला दिँदै सोमबार रिपोर्ट गरेको हो। यद्यपि यो सम्झौता अझै औपचारिक रूपमा सम्पन्न भएको छैन।
ओपनएआईले यसबारे टिप्पणी गर्न अस्वीकार गरेको छ, भने विण्डसर्फले पनि प्रतिक्रिया अनुरोधमा तत्काल कुनै जवाफ नदिएको रोयटर्सले उल्लेख गरेको छ।
विण्डसर्फ हालै जेनेरल क्याटालिस्ट र क्लेइनर पर्किन्सजस्ता लगानीकर्ताहरूको साथ ३ अर्ब डलरको मूल्यांकनमा लगानी जुटाउने छलफलमा थियो। यसअघि सन् २०२३ को अगस्टमा, जेनेरल क्याटालिस्ट नेतृत्वको १५० मिलियन डलरको लगानी चरणपछि यसको मूल्यांकन १.२५ अर्ब डलर पुगेको थियो।
यदि यो सम्झौता सम्पन्न भएमा ओपनएआई को इतिहासमा यो सबैभन्दा ठूलो अधिग्रहण हुनेछ, जसले च्याटजीपीटी को कोड लेख्ने क्षमतामा उल्लेखनीय वृद्धि गर्ने अपेक्षा गरिएको छ। हालैका संस्करणहरूसँगै ओपनएआई ले कोडिङ क्षमतामा निरन्तर सुधार गर्दै आएको छ, तर गिटहब कोपाइलट लगायतका प्रतिस्पर्धी उत्पादनहरूले प्रतिस्पर्धा चर्काइरहेका छन्।
ओपनएआईले विगतमा पनि आफ्नो उत्पादन र सेवाहरूलाई मजबुत बनाउन अधिग्रहणहरू गर्दै आएको छ। उदाहरणका लागि, सन् २०२३ मा खोज तथा डाटाबेस एनालिटिक्स स्टार्टअप रकसेटलाई नौ-अङ्कको स्टक डिलमा किनेको थियो, जसले विशेषगरी व्यापारिक ग्राहकहरूलाई लक्षित सेवाहरूमा सहयोग पुर्याएको छ।
ओपनएआईको साप्ताहिक सक्रिय प्रयोगकर्ता संख्याले सन् २०२४ को फेब्रुअरीमा ४० करोड पार गरेको थियो, जुन डिसेम्बरको ३० करोड प्रयोगकर्ताबाट उल्लेखनीय वृद्धि हो।
साथै, कम्पनीले हाल सफ्टब्याङ्क ग्रुपको नेतृत्वमा ३०० अर्ब डलरको मूल्यांकनमा ४० अर्ब डलरसम्मको नयाँ लगानी चरणको तयारी गरिरहेको बताइएको छ।
प्रकाशित: २४ बैशाख २०८२, बुधबार
