एनभिडिया चिप तस्करी भएकोबारे पत्ता लगाउन विधेयक ल्याउने अमेरिकी सांसदको प्रस्ताव

काठमाडौं ।

अमेरिकाका एक सांसदले एनभिडिया जस्ता कम्पनीहरूद्वारा बनाइएका कृत्रिम बुद्धिमत्ता (एआई) चिपहरू बिक्रीपछिको अवस्थिति पत्ता लगाउने कानून प्रस्ताव गर्न लागेका छन्।

सांसद बिल फोस्टरले आगामी केही हप्तामा प्रस्तावित यो कानूनी पहलले बिक्रीपछिका चिपहरू कुन देशमा पुगेका छन् भन्ने यकिन गर्न मद्दत गर्ने बताएका छन्। यो कदमलाई अमेरिकी सांसदहरूद्वारा द्विदलीय समर्थन प्राप्त भएको छ। प्रस्तावको उद्देश्य, अमेरिकी निर्यात नियन्त्रण कानूनको उल्लंघन गर्दै चीनमा एनभिडियाका चिपहरू व्यापक रूपमा तस्करी भइरहेको भन्ने रिपोर्टहरूसँग सम्बद्ध छ।

रोयटर्सका अनुसार एनभिडियाका चिपहरू एआई प्रणाली निर्माणमा अत्यन्त महत्त्वपूर्ण मानिन्छन् — जस्तै च्याटबोट, इमेज जेनेरेटर, र जैविक हतियार निर्माणमा प्रयोग हुन सक्ने विशिष्ट प्रणालीहरू। पूर्व राष्ट्रपति डोनाल्ड ट्रम्पदेखि हालका राष्ट्रपति जो बाइडेनसम्मले यी चिपहरूको चीनमा निर्यातमा क्रमशः कडा नियन्त्रण लगाएका छन्।

तर रोयटर्सलगायत अन्य सञ्चारमाध्यमहरूले ती चिपहरू अझै चीन पुगेको तथ्य सार्वजनिक गरेका छन्। एनभिडियाले भने आफनो उत्पादन बिक्रीपछिको अवस्थिति ट्र्याक गर्न नसकिने दावी गर्दै आएको छ।

भूतपूर्व भौतिकशास्त्री तथा इलिनोइ राज्यका डेमोक्र्याट सांसद फोस्टरका अनुसार चिपहरू ट्र्याक गर्ने प्रविधि सजिलै उपलब्ध छ, र धेरै प्रविधि पहिले नै एनभिडियाका चिपहरूमा इन बिल्ट अवस्थामा छन्। स्वतन्त्र प्राविधिक विज्ञहरू पनि यस कुरामा सहमत छन्।

फोस्टरले निकट भविष्यमा प्रस्ताव गर्न लागेको विधेयकले अमेरिकी नियामक निकायहरूलाई दुई प्रमुख क्षेत्रका लागि नियम बनाउन निर्देशन दिनेछ: पहिलो, निर्यात नियन्त्रण इजाजत अनुसार चिपहरू कहाँ छन् भन्ने ट्र्याक गर्ने, र दोस्रो, इजाजतबिना प्रयोग भए चिप नै नचलेको सुनिश्चित गर्ने।

फोस्टरले भने, “वास्तवमै ठूलो परिमाणमा चिप तस्करी भइरहेको विश्वसनीय रिपोर्टहरू छन् — तीमध्ये केही अझै सार्वजनिक भइसकेका छैनन्।”

“यो कुनै काल्पनिक भविष्यको समस्या होइन,” फोस्टरले भने। “यो अहिलेको समस्या हो, र कुनै समय हामीले पत्ता लगाउनेछौं कि चिनियाँ कम्युनिस्ट पार्टी वा तिनीहरूको सैन्य निकाय ठूलो संख्यामा चिपहरूको प्रयोग गर्दै हतियार निर्माण गरिरहेका छन् — वा अझ खतरनाक कुरा, कृत्रिम सामान्य बुद्धिमत्ता (एजीआई) विकासमा संलग्न छन् — जुन परमाणु प्रविधिसरह खतरनाक विषय हो।”