१ लाखभन्दा बढी प्रयोगकर्तामाझ पुग्यो अमेजनको नयाँ डिजिटल असिस्टेन्ट एलेक्सा प्लस

काठमाडौं ।

अमेजनको जेनेरेटिभ एआईबाट सञ्चालित नयाँ डिजिटल असिस्टेन्ट ‘एलेक्सा प्लस’ हालसम्म १ लाखभन्दा बढी प्रयोगकर्तामाझ पुगेको अमेजनका प्रमुख कार्यकारी अधिकृत एन्डी जस्सीले बिहीबार कम्पनीको आम्दानी सम्बन्धी कलमा बताएका छन्।

यद्यपि विश्वभर करिब ६० करोड एलेक्सा उपकरणहरू रहेका सन्दर्भमा यो संख्या निकै थोरै हो, कम्पनीले फेब्रुअरीमा सार्वजनिक गरेको एलेक्सा प्लसको क्रमिक विस्तारमा केही प्रगति गरिरहेको देखिन्छ।

अमेजनले सुरुमा यो नयाँ असिस्टेन्ट चरणबद्ध रूपमा प्रयोगकर्तामाझ ल्याइने बताएको थियो।

एलेक्सा प्लसको उद्देश्य प्रयोगकर्तासँग प्राकृतिक शैलीमा संवाद गर्नसक्ने क्षमताको विकास गर्नु हो, साथै भविष्यमा तेस्रो पक्ष एप्स प्रयोगकर्ताको तर्फबाट प्रयोग गर्न सक्ने ‘एजेन्टिक’ क्षमता समेत प्रदान गर्नु हो। यसले पुरानो एलेक्सा वा सिरीजस्तो पूर्वनिर्धारित जवाफ नभई ओपनएआई को च्याटजीपीटी वा गुगलको जेमिनीजस्तै वास्तविक समयमा मौलिक जवाफ दिन सक्ने अपेक्षा गरिएको छ।

तर वाशिङ्टन पोस्टको प्रारम्भिक रिपोर्ट अनुसार, फेब्रुअरीमा प्रदर्शन गरिएका केही महत्वपूर्ण विशेषताहरू अहिले सार्वजनिक भएको संस्करणमा छैनन्। हालको संस्करणमा एलेक्सा प्लसले ग्रबहब जस्ता तेस्रो पक्ष एप्स प्रयोग गर्न, बच्चाका लागि निद्रा कथा तयार गर्न वा उपहार सुझाव दिन सक्दैन। यी सुविधाहरू कहिले उपलब्ध हुने भन्ने स्पष्ट नगरिएको टेकक्रञ्चले उल्लेख गरेको छ।

“हामी आगामी महिनामा थप धेरै सुविधा थप्ने योजना बनाइरहेका छौं,” जस्सीले बताएका छन्।

कलको सुरुवाती टिप्पणीमा जस्सीले एलेक्सा प्लस उपभोक्ताका लागि उपलब्ध पहिलो ‘कार्यमुखी एआई एजेन्ट’ मध्ये एक भएको दावी गरे। तर उनले प्रविधि अझै “प्रारम्भिक” र “अस्पष्ट” अवस्थामा रहेको स्वीकारे।

हाल प्रायः मल्टिफर्स्ट चरणका एआई एजेन्टहरूको शुद्धता दर ३० देखि ६० प्रतिशतबीच मात्र रहेको उल्लेख गर्दै एलेक्सा प्लसमा प्रयोग भएको वेब ब्राउजिङ एजेन्ट ‘नोभा एक्ट’ ले ९० प्रतिशत शुद्धता हासिल गर्ने लक्ष्य कम्पनीले राखेको जानकारी दिए।

एलेक्सा प्लसको विस्तार एप्पलको नयाँ एलएलएम-आधारित सिरीको तुलनामा छिटो भइरहेको देखिएको छ। अमेजनको कल भइरहँदा सँगसँगै सम्पन्न भएको एप्पलको आम्दानी कलमा सिरीको ढिलाइबारे प्रश्न गर्दा सीईओ टिम कुकले कम्पनीलाई “काम पूरा गर्न अझ केही समय चाहिने” बताएका थिए।

पुराना डिजिटल असिस्टेन्टहरूलाई जेनेरेटिभ एआईद्वारा समृद्ध बनाउन एप्पल र अमेजन दुवैले विभिन्न कठिनाइ र ढिलाइ झेलेका छन्। एलएलएम प्रणालीहरूलाई उपकरण चलाउने र अन्य प्रणालीहरूसँग जोड्ने काम विशेष गरी चुनौतीपूर्ण देखिएको छ, जसले एलेक्सा र सिरीले टाइमर सेट गर्ने वा सन्देश पढ्ने जस्ता व्यवहारिक कामहरू गर्न सकून्। तर यो कार्यान्वयन अपेक्षाभन्दा जटिल सावित भएको छ।