भारतमा एप्पलका लागि आईफोन बनाउने फक्सकनको राजस्व भारु १.७ लाख करोड पुग्यो

काठमाडौं ।

भारतमा आईफोन बनाउने एप्पलको कन्ट्र्याक्६ निर्माता फक्सकनको गत आर्थिक वर्षमा आफ्नो राजस्व दोब्बरभन्दा बढीले बढेर लगभग १.७ लाख करोड भारतीय रुपैयाँ पुगेको छ। यसले चाँडै नै नयाँ उत्पादन प्लान्ट सुरु गर्न सक्नेछ।

फक्सकनका कामदारहरूको संख्या ६५ प्रतिशतले बढेको छ। भारतमा फक्सकनका लगभग ८०,००० कामदार छन्। यो ताइवानी कम्पनी आईफोनको सबैभन्दा ठूलो निर्माता हो।

हालैको एक रिपोर्टअनुसार, गत आर्थिक वर्षमा भारतबाट स्मार्टफोनको निर्यातमा आईफोनको हिस्सा लगभग १.५ लाख करोड भारतीय रुपैयाँ रहेको छ।

यस वर्ष, फक्सकनले लगभग ३ करोड युनिट आईफोन एसेम्बल गर्ने योजना बनाएको छ। कर्नाटकको बेंगलुरु नजिकै रहेको फक्सकनको कारखानामा उत्पादन परीक्षणहरू भइरहेका छन्। देशमा आईफोन उत्पादन बढाउने योजनाको पहिलो चरणको लागि परीक्षण सञ्चालन भइरहेको छ। यो परीक्षण एप्पलको कडा मापदण्डहरू पूरा गर्दै कारखानाले ठूलो संख्यामा आईफोनहरू उत्पादन गर्न सक्छ कि सक्दैन भनेर मूल्याङ्कन गर्न सञ्चालन भइरहेको छ। यस वर्षको बजेटमा स्मार्टफोनका पार्टपुर्जाको आयातमा घोषणा गरिएको कर छुटबाट फक्सकनले फाइदा लिन सक्ने रिपोर्टमा भनिएको छ।

एप्पलले देशमा एयरपड्स, म्याकबुक र आईप्याड उत्पादन सुरु गर्ने योजना पनि बनाएको छ। फक्सकनले आफ्नो हैदराबाद प्लान्टमा निर्यातको लागि एयरपडहरू उत्पादन सुरु गर्ने तयारी गरेको छ। कम्पनीले आफ्नो उत्पादनको केही भाग चीनबाट सार्ने योजना बनाएको छ। कम्पनीको वायरलेस इयरफोनहरू भारतमै उत्पादन गर्नु यसमा एउटा महत्त्वपूर्ण कदम हुनेछ।

फक्सकनले करिब दुई वर्षअघि हैदराबादमा एयरपड्स उत्पादन गर्न लगभग ४० करोड डलरको लगानी अनुमोदन गरेको थियो। फेब्रुअरीमा लन्च गरिएको एप्पलको किफायती आईफोन १६ईको एसेम्बली भारतमा सुरु भएको छ। यसले लगभग तीन वर्ष अघि प्रस्तुत गरिएको आईफोन एसईलाई प्रतिस्थापन गर्नेछ। देशमै एसेम्बल भइरहेको आईफोन १६ई भारतमा बिक्री गरिने र केही देशहरूमा निर्यात पनि गरिनेछ। कम्पनीको आईफोन १६ सिरिज पनि भारतमै एसेम्बल भइरहेको छ।