हाल मासिक ३ अर्बभन्दा धेरै मानिसहरूले ह्वाट्सएप प्रयोग गरिरहेका छन्: जुकरबर्ग

काठमाडौं ।

मेटाका सीईओ मार्क जुकरबर्गले बुधबार कम्पनीको पहिलो त्रैमासिक नतिजासम्बन्धी सम्मेलनमा जानकारी दिँदै अहिले मासिक ३ अर्बभन्दा धेरै मानिसहरूले ह्वाट्सएप प्रयोग गरिरहेको बताएका छन्।

सन् २००९ मा स्थापना भएको र २०१४ मा फेसबुकले १९ अर्ब डलरमा खरिद गरेको यो एप निःशुल्क रूपमा प्रयोग गर्न सकिन्छ र यसमा विज्ञापन पनि देखाइँदैन। सन् २०२० मा मासिक सक्रिय प्रयोगकर्ता २ अर्ब पुगेको यो एप अहिले फेसबुकपछि ३ अर्ब प्रयोगकर्ताको सीमा पार गर्ने केही थोरै एपमध्ये पर्छ।

टेकक्रञ्चका अनुसार यो विशाल प्रयोगकर्ता आधारले विशेष गरी कम्पनीले आफ्नो एआई रणनीतिमा ठूलो लगानी गरिरहेका बेला ह्वाट्सएपलाई मेटाका लागि एक प्रमुख व्यापारिक प्लेटफर्म बनाएको छ। कम्पनीले पहिले नै बताइसकेको छ कि यो एप एआई सेवा वितरणका लागि यसको सबैभन्दा ठूलो प्लेटफर्महरूमध्ये एक हो।

कम्पनीकी प्रमुख वित्तीय अधिकृत सुसान लीले सम्मेलनका क्रममा भनिन्, “हामीले विभिन्न प्रविष्टि बिन्दुहरूबाट मेटा एआईसँग मानिसहरूलाई संलग्न देखेका छौं। व्हाट्सएपमा हाम्रो एपहरूका परिवारमध्ये मेटा एआईको सबैभन्दा बलियो प्रयोग भइरहेको छ।” उनले अधिकांश व्हाट्सएप प्रयोगकर्ताहरू एक्लाएक्लै च्याटमा मेटा एआई प्रयोग गर्ने थपिन्।

जुकरबर्गका अनुसार, व्हाट्सएपले एआई सुविधाहरूमा सहज पहुँच उपलब्ध गराउँछ, तर अमेरिकाजस्ता बजारमा, जहाँ अझै पनि धेरै मानिसहरू आफ्नो फोनको मूल मेसेजिङ एपहरू प्रयोग गर्न रुचाउँछन्, त्यहाँ मेटालाई एआई उत्पादनहरू अपनाउनका लागि फरक रणनीति अपनाउनु परेको छ। त्यसैले कम्पनीले हालै सार्वजनिक गरेको मेटा एआई एप त्यहाँ उपयोगी हुने अपेक्षा गरिएको छ।

उनले भने, “हामी समयसँगै (अमेरिकी मेसेजिङ बजारमा) नेतृत्व गर्न चाहन्छौं, तर व्हाट्सएप मा विश्वका अधिकांश ठाउँहरूमा जस्तो अवस्थामा हामी त्यहाँ छैनौं। त्यसैले मलाई लाग्छ, मेटा एआई एपलाई स्वतन्त्र रूपमा प्रयोग गर्ने प्रवृत्ति विशेष गरी अमेरिका बजारमा व्यक्तिगत एआईको रूपमा नेतृत्व स्थापित गर्न महत्वपूर्ण हुने छ। तर हामी यी सबै क्षेत्रहरूमा अनुभवलाई अझ उन्नत बनाउँदै लैजानेछौं।”

कम्पनीका अनुसार व्हाट्सएपको व्यावसायिक प्लेटफर्म, व्हाट्सएप बिजनेस बढ्दै गएको छ र कम्पनीका एपहरूको परिवारले ल्याएको ५१० मिलियन डलर आम्दानीमा यसले ठूलो हिस्सा ओगटेको छ।