जापानमा निन्टेन्डोका फ्यानहरूले परीक्षण गरे सार्वजनिक हुन बाँकी ‘स्विच २’ गेमिङ कन्सोल

काठमाडौं ।

निन्टेन्डोका फ्यानहरूलाई गत शनिबार टोकियो नजिकै आयोजना गरिएको कार्यक्रममा कम्पनीको नयाँ स्विच २ गेमिङ उपकरण परीक्षण गर्ने अवसर दिइएको थियो। यो स्विच हाल सार्वजनिक भइसकेको छैन र छिट्टै सार्वजनिक हुने तयारीमा रहेको छ।

“ट्रम्प राष्ट्रपति भएपछि शुल्क बढेको छ, त्यसैले म गेम कन्सोल मात्र होइन, एक्सेसरीहरूको मूल्य पनि बढ्ने डरमा छु,” कार्यक्रममा सहभागी भएका ५५ वर्षीय रियल स्टेट कम्पनीका कर्मचारी हिदेनोरी टानाकाले भने।

विश्वभरका उपभोक्ताहरूले अमेरिकी राष्ट्रपति डोनाल्ड ट्रम्पको प्रशासनले चीनसहितका व्यापार साझेदारहरूमा लगाएको टैरिफका कारण इलेक्ट्रोनिक उपकरणहरूको उच्च मूल्य भोग्नुपर्ने सम्भावना छ। ट्रम्पले केही शुल्क हटाए पनि विनाशकारी व्यापार युद्धको जोखिम अझै कायम रहेको रोयटर्सले उल्लेख गरेको छ।

पूर्व-प्रक्षेपण कार्यक्रममा सहभागी हुनका लागि गेमरहरू टोकियो नजिकैको माकुहारी मेसे सम्मेलन केन्द्र बाहिर बिहानैदेखि लाइनमा बसेका थिए। उनीहरूले स्विच २ मा मारियो कार्ट वर्ल्ड, डंकी काँग बोनान्जा र अन्य शीर्षकहरू खेल्ने मौका पाए।

उच्च मूल्यको सम्भावनाका बाबजुद, स्विचको उत्तराधिकारीका लागि उपभोक्ताको माग बलियो रहेको प्रारम्भिक संकेत देखिएको छ। स्विचले सन् २०१७ देखि हालसम्म १५ करोडभन्दा बढी युनिट बिक्री गरी निन्टेन्डोको स्थिति परिवर्तन गरेको थियो।

क्योटोमा आधारित गेमिङ कम्पनी निन्टेन्डोले बुधबार जनाएको अनुसार, जापानमा स्विच २ को लटरीका लागि २२ लाख आवेदन प्राप्त भएका थिए र कम्पनीले सम्पूर्ण माग पूरा गर्न सकेन।

“साँचिकै भन्ने हो भने, मैले अवसर पाउँछु भन्ने सोचेको पनि थिइनँ। सामाजिक सञ्जालमा सबैले असफल भएको बताएपछि म पनि असफल हुन्छु जस्तो लागेको थियो,” स्विच २ किन्ने अवसर जितेका २८ वर्षीय ह्युमा हाशिगुचिले भने।

निन्टेन्डोले न्यूयोर्क, बर्लिन र हङकङ लगायत विभिन्न ठाउँमा स्विच २ को परीक्षण कार्यक्रम आयोजना गरिरहेको छ।

स्विच २ को जापानी भाषामा मात्र उपलब्ध हुने संस्करणको मूल्य ४९,९८० येन (३५० अमेरिकी डलर) तय गरिएको छ। अमेरिकामा भने टैरिफ चिन्ताका कारण प्रारम्भमा प्री-अर्डर रोकिए पनि पछि निन्टेन्डोले मूल्य ४४९.९९ डलरमा कायम राख्ने जनाएको थियो।