एडोबद्वारा नयाँ फायरफ्लाई इमेज जेनेरेशन मोडल र रिडिजाइन गरिएको फायरफ्लाई वेब एप सार्वजनिक

काठमाडौं ।

एडोबले बिहीबार आफ्नो फायरफ्लाइ परिवारअन्तर्गतको नवीनतम इमेज जेनेरेसन एआई मोडेल, भेक्टर बनाउने नयाँ मोडेल, र सबै एआई मोडेलहरू (साथै केही प्रतिस्पर्धी कम्पनीका मोडेलहरू) समेटिएको नयाँ वेब एप सार्वजनिक गरेको छ। फायरफ्लाइ को मोबाइल एप पनि विकासको क्रममा रहेको कम्पनीले जनाएको छ।

नयाँ फायरफ्लाइ इमेज मोडल ४ ले अघिल्ला मोडेलहरूको तुलनामा गुणस्तर, गति, र प्रयोगकर्ताको नियन्त्रणमा सुधार ल्याएको कम्पनीले दावी गरेको छ। यसले संरचना, शैली, क्यामेरा कोण र जूममा बढी नियन्त्रण दिनेछ, र २के रिजोल्युसनसम्मका इमेजहरू बनाउन सक्छ। यस मोडेलको एक परिमार्जित संस्करण इमेज मोडल ४ अल्ट्रा पनि सार्वजनिक गरिएको छ, जसले साना संरचनाहरू र धेरै विवरण भएका जटिल दृश्यहरू उत्पादन गर्न सक्छ।

एडोबका जेनरेटिभ एआई उपाध्यक्ष अलेक्जान्ड्रु कोस्टिनले कम्पनीले नयाँ मोडेलहरूलाई अत्यधिक कम्प्युटिङ क्षमतासहित प्रशिक्षण दिएको बताए, जसले गर्दा ती मोडेलहरूले अझै बढी विस्तृत तस्विरहरू उत्पादन गर्न सक्छन्। उनका अनुसार नयाँ मोडेलहरूले इमेजमा टेक्स्ट जेनरेसन सुधार गरेका छन् र प्रयोगकर्ताले आफूले चाहेको शैलीको तस्विर उत्पादन गर्न उदाहरणस्वरूप इमेज प्रयोग गर्न सक्ने सुविधा पनि प्रदान गर्छन्।

एडोबले अघिल्लो वर्ष सीमित बेटा रूपमा सुरु गरिएको फायरफ्लाइ भिडियो मोडेल पनि सबैका लागि उपलब्ध गराएको छ। यसले प्रयोगकर्तालाई टेक्स्ट वा इमेज इन्पुटबाट भिडियो क्लिप उत्पादन गर्न, क्यामेरा कोण तय गर्न, शटको सुरुवात र अन्त्य फ्रेम निर्धारण गर्न, वातावरणीय तत्वहरू सिर्जना गर्न, र गति डिजाइन तत्वहरू कस्टमाइज गर्न दिन्छ। यसले १०८०पी रेजोल्युसनसम्मको भिडियो उत्पादन गर्न सक्छ।

यसका अतिरिक्त, फायरफ्लाइ भेक्टर मोडलले सम्पादन गर्न मिल्ने भेक्टर-आधारित आर्टवर्क उत्पादन गर्न सक्छ। यसले लोगो, उत्पादन प्याकेजिङ, आइकन, दृश्यहरू र ढाँचाहरूको विभिन्न भेरिएसनहरू बनाउन सहयोग पुर्‍याउँछ।

फायरफ्लाइ वेब एपमार्फत प्रयोगकर्ताले यी सबै मोडेलहरू साथै ओपनएआई (जीपीटी इमेज जेनेरेसन), गुगल (इम्याजेन ३ र भिओ २) र फ्लक्स (फ्लक्स १.१ प्रो) का केही इमेज तथा भिडियो मोडेलहरूमा पनि पहुँच पाउनेछन्।

प्रयोगकर्ताले कुनै पनि मोडेलबीच स्विच गर्न सक्नेछन् र जेनेरेट गरिएका सबै सामग्रीमा कन्टेन्ट क्रेडेन्सियल संलग्न हुनेछ। भविष्यमा अन्य एआई मोडेलहरू पनि यस वेब एपमा थपिने संकेत कम्पनीले दिएको छ।