टेल्जी नेपालले ल्यायो स्पोर्टी स्कुटर ‘एस २’, मूल्य २ लाख ६८ हजार

काठमाडौं ।

नेपाली बजारमा टेल्जीको नयाँ स्पोर्टी विद्युतीय स्कुटर भित्रिएको छ। टेल्जी स्कुटरको नेपालका लागि आधिकारिक बिक्रेता योम मा ई मोटर्स प्रालिले पावरफुल साथै स्पोर्टी डिजाइन भएको ‘एस २’ स्कुटर सार्वजनिक गरेको हो।

टेल्जी नेपालले नक्सालस्थित शोरुममा एक कार्यक्रमका बीच एस २ स्कुटर सार्वजनिक गरेको हो। कम्पनीले ल्याएको स्पोर्टी स्कुटर एस २ को मूल्य २ लाख ६८ हजार रुपैयाँ तोकिएको छ।

टेल्जी नेपालको निर्देशक संजिव शिल्पकारले युवा वर्गलाई लक्षित गर्दै स्पोर्टी डिजाइनको स्कुटर नेपाल ल्याएको बताए।

उनले भने, ‘हामीले यसअघि ल्याएको लायन र टाइगर स्कुटर ग्राहक वर्गले अत्याधिक रुचाउनु भएको छ। हामीले युवा वर्गलाई लक्षित गर्दै अझ स्पोर्टी डिजाइनको स्कुटर ल्याएका हौं।’

नेपाली बजारमा उपलब्ध धेरै स्कुटरमा सस्पेन्सन राम्रो नभएको ग्राहकको गुनासो रहेको कम्पनीका निर्देशक राजेश राजकर्निकारले बताए। ‘हामीले यो स्कुटरको सस्पेन्सनलाई मोटरसाइकलको जस्तै कम्फर्टेबल बनाउने कोशिस गरेको छौं। यो स्कुटरको लुक्स र पर्फमेन्स पनि मोटरसाइकल जस्तै छ,’ उनले भने।

कम्पनीले ल्याएको नयाँ स्कुटर एस २ को फ्रन्टमा एग्रेसिभ डिजाइन रहेको छ। फ्रन्टमा सानो साइजको भाइजर, एलइएडी डीआरएल र ट्वीन पड हेड ल्याम्प छ। एस २ स्कुटरमा कम्पनीले ३ किलोवाट रेटेड पावरको मोटर उपलब्ध छ।

यो स्कुटरको टप स्पीड ७५ किलोमिटर प्रतिघण्टाको छ भने यो स्कुटरको १६ डिग्री क्लाइम्ब क्षमता छ। यसमा कम्पनीले ७२ भोल्ट ३८ एम्पियर अवारको ग्राफिन ब्याट्री दिइएको छ। यो स्कुटरलाई एकपटक फुल चार्ज गरेर १०० किलोमिटरसम्म गुडाउन सकिने कम्पनीको दावी छ। यसलाई ३ घण्टामा फुलचार्ज गर्न सकिन्छ।

यो स्कुटरको अगाडि पछाडि दुवैतर्फ डिस्क ब्रेकका साथै कम्बाइन ब्रेकिङ सिस्टम समेत दिएको छ। त्यस्तै, यसमा फुल डिजिटल कन्सोल, स्मार्ट की, अन्डर सिट स्टोरेज जस्ता फिचर पाउन सकिन्छ।

टेल्जी नेपालले अबको केही दिनमै नयाँ टाइगर स्कुटर ल्याउने घोषणा समेत गरेको छ। योम मा ई मोटर्स प्रालिले हाल नेपालमा टेल्जीका तीन मोडलका स्कुटर बिक्री गर्दै आएकोछ । कम्पनीले नेपालका मुख्य १० सहरहरूमा आफ्नो बिक्री र बिक्री पछिको सेवा उपलब्ध गराउँदै आएको छ। कम्पनीले टेल्जीका स्कुटरहरूमा लाइफटाइम निःशुल्क सर्भिस उपलब्ध गराउँदै आएको छ।