रणनीतिक प्रविधि कम्पनीहरुलाई आर्थिक सहायता दिन दक्षिण कोरियाले बनायो ३४ अर्ब डलरको कोष

काठमाडौं ।

दक्षिण कोरियाले चिप्स र अटोमोबाइलजस्ता रणनीतिक प्रविधिमा संलग्न कम्पनीहरूलाई वित्तीय सहायता प्रदान गर्न ३४ अर्ब डलरको नीतिगत कोष स्थापना गर्ने भएको छ। विश्वव्यापी प्रतिस्पर्धा र संरक्षणवाद तीव्र भइरहेको अवस्थामा सरकारको बुधबारको घोषणामा यो जानकारी दिइएको छ।

यस कदमलाई सुदृढ गर्न सरकारले विश्वभरका उच्च प्रविधि क्षेत्रका प्रतिभाहरू आकर्षित गर्न नयाँ नीतिहरू पनि घोषणा गरेको छ।

“नयाँ अमेरिकी प्रशासनअन्तर्गत बाह्य अनिश्चितता बढ्दै जाँदा उन्नत रणनीतिक उद्योगहरूको प्रतिस्पर्धात्मकता राष्ट्रिय आर्थिक सुरक्षाको केन्द्रबिन्दु बनेको छ,” सरकारको विज्ञप्तिमा भनिएको छ। यसलाई “धुवाँबिनाको लडाइँ” भनेर व्याख्या गरिएको छ।

जनवरीमा पदमा फर्किएपछि अमेरिकी राष्ट्रपति डोनाल्ड ट्रम्पले प्रमुख व्यापारिक साझेदार र विभिन्न उद्योगहरू जस्तै चिप्स, अटोमोबाइल, जैविक औषधिलाई लक्षित गर्दै विभिन्न ट्यारिफको धम्की दिने कदम उठाएका रोयटर्सले उल्लेख गरेको छ।

सरकारी स्वामित्वको कोरिया डेभलपमेन्ट बैंकले ५० ट्रिलियन वन (३४.३७ अर्ब डलर) कोष पाँच वर्षसम्म राष्ट्रिय रणनीतिक उद्योगहरूलाई सस्तो ऋण र अन्य लगानीको रूपमा प्रदान गर्नेछ।

दक्षिण कोरियाले पछिल्ला वर्षहरूमा १२ उद्योगलाई “राष्ट्रिय रणनीतिक प्रविधि” को रूपमा पहिचान गरी तीव्र विश्वव्यापी प्रतिस्पर्धा र आपूर्ति श्रृंखलाको विखण्डनसँग जुध्न लक्षित वित्तीय सहायता र संरक्षण प्रदान गर्दै आएको छ।

यी उद्योगहरूमा अर्धचालक (सेमीकन्डक्टर), भविष्यको गतिशीलता (फ्युचर मोबिलिटी), रिचार्जेबल ब्याट्री, जैविक औषधि (बायोफार्मास्युटिकल्स), एयरोस्पेस र कृत्रिम बुद्धिमत्ता (एआई) लगायतका क्षेत्र समावेश छन्।

गत वर्ष अर्धचालक उद्योगका लागि विशेष रूपमा तयार गरिएको वित्तीय सहायता प्याकेज पनि नयाँ कोषमा समाहित गरिनेछ।

यसैबीच, दक्षिण कोरियाले बुधबार उन्नत क्षेत्रका स्वदेशी कम्पनीहरूमा काम गर्न इच्छुक, विश्वव्यापी कम्पनीहरूमा कार्यानुभव भएका दक्ष विदेशीहरूलाई “शीर्ष स्तर” को भिसा र स्थायी बसोबासको सुविधा दिने घोषणा गरेको छ।