दक्षिण कोरियामा डीपसिक नयाँ डाउनलोड गर्न प्रतिबन्ध

काठमाडौं ।

दक्षिण कोरियाको डाटा सुरक्षा निकायले सोमबार चिनियाँ एआई एप डीपसिकको नयाँ डाउनलोडहरू देशभर निलम्बन गरिएको जनाएको छ। डीपसिकले व्यक्तिगत डाटा सुरक्षा सम्बन्धी केही नियमहरू पालना नगरेको स्वीकार गरेपछि यस्तो कदम चालिएको हो।

देशको गोपनीयता कानूनअनुसार आवश्यक सुधार गरेपछि मात्र एप सेवाको पुनःसञ्चालन हुनेछ भनी व्यक्तिगत सूचना संरक्षण आयोग (पीआईपीसी) ले पत्रकार सम्मेलनमा जानकारी दिएको छ।

शनिबारदेखि लागू भएको यो उपाय एपको नयाँ डाउनलोडहरू रोक्नका लागि हो, पीआईपीसीले जनाएको छ। तर डीपसिकको वेब सेवा भने देशभर पहुँचयोग्य रहनेछ।

चिनियाँ स्टार्टअपले गत हप्ता दक्षिण कोरियामा कानुनी प्रतिनिधिहरू नियुक्त गरेको थियो र देशको डाटा सुरक्षा कानून सम्बन्धी केही पक्षहरूलाई बेवास्ता गरेको स्वीकार गरेको पीआईपीसीले जनाएको छ।

इटालीको डेटा सुरक्षा निकाय गारान्टेले गत महिनामा डीपसिकलाई आफ्नो गोपनीयता नीतिबारे नियामकको चासो सम्बोधन गर्न नसकेको भन्दै इटालीमा च्याटबट बन्द गर्न आदेश दिएको थियो।

डीपसिकले यस विषयमा कुनै प्रतिक्रिया नदिएको रोयटर्सले जनाएको छ।

दक्षिण कोरियाली सरकारी निकायहरूले डीपसिकलाई अवरुद्ध गर्ने पहिलाको प्रयासबारे सोध्दा, चिनियाँ विदेश मन्त्रालयका प्रवक्ताले फेब्रुअरी ६ मा आयोजित पत्रकार सम्मेलनमा चीनले डाटा गोपनीयता र सुरक्षालाई उच्च महत्त्व दिने र कानुनअनुसार सुरक्षा गर्ने बताएका थिए।

प्रवक्ताले बेइजिङले कुनै पनि कम्पनी वा व्यक्तिलाई कानुनविपरीत डेटा संकलन वा भण्डारण गर्न कहिल्यै निर्देशन नदिने पनि बताएका थिए।