Technology Khabar २३ माघ २०८१, बुधबार
काठमाडौं ।
बोइङले आफ्नो सीएसटी-१०० स्टारलाइनर कार्यक्रममा २०२४ मा आधा अर्बभन्दा बढी डलरको घाटा ब्यहोरेको छ जसले यो व्यावसायिक क्रू वाहनमा कुल घाटा २ अर्ब डलरभन्दा बढी पुर्याएको छ।
अमेरिकी सेक्युरिटिज एन्ड एक्सचेन्ज कमिसन (एसईसी) मा ३ फेब्रुअरीमा दर्ता गरिएको वार्षिक १०-के फाइलिङमा बोइङले २०२४ मा स्टारलाइनरमा ५२३ मिलियन डलर घाटा भएको जनाएको छ।
कम्पनीले यो घाटाका लागि “कार्यक्रमको ढिलाइ, परीक्षण र प्रमाणLकरण खर्चमा वृद्धि, र प्रमाणीकरणपछि हुने मिशनहरूको थप लागत” लाई दोष दिएको छ।
कम्पनीले दोस्रो त्रैमासिकमा १२५ मिलियन डलर र तेस्रो त्रैमासिकमा २५० मिलियन डलर घाटाको रिपोर्ट गरेको थियो। कम्पनीले २३ जनवरीमा चौथो त्रैमासिकमा थप घाटा हुने चेतावनी दिएको थियो तर पाँच दिनपछि वित्तीय नतिजा सार्वजनिक गर्दा स्पष्ट रकम उल्लेख गरेको थिएन। वार्षिक घाटाले चौथो त्रैमासिकमा १४८ मिलियन डलर घाटा भएको देखाउँछ।
स्पेसन्युजका अनुसार स्टारलाइनरमा बोइङले एकै वर्षमा गरेको ५२३ मिलियन डलरको घाटा अहिलेसम्मकै सबैभन्दा धेरै हो जसले २०१९ मा रिपोर्ट गरिएको ४८९ मिलियन डलरलाई पार गरेको छ।
अब स्टारलाइनरमा बोइङको कुल घाटा २ अर्ब डलर नाघिसकेको छ। “आगामी अवधिमा हामीले थप घाटा व्यहोर्नुपर्ने जोखिम रहन्छ,” कम्पनीले १०-के फाइलिङमा भनेको छ।
२८ जनवरीको आय विवरण सम्बन्धी फोनवार्तामा बोइङका कार्यकारीहरूले स्टारलाइनरबारे केही बोलेनन्। कम्पनी र नासाले पनि सार्वजनिक रूपमा स्टारलाइनर फेरि कहिले उडान भर्ने र त्यो क्रू मिसन हुने वा बिना-क्रू परीक्षण उडान हुने भन्नेबारे केही बताएनन्।
३० जनवरीमा नासाको एरोस्पेस सेफ्टी एडभाइजरी प्यानलको बैठकमा, समितिका सदस्यहरूले क्रू फ्लाइट टेस्ट मिसनका क्रममा स्टारलाइनरले भोगेका समस्याहरूको छानबिनबारे नासाबाट जानकारी पाएको बताए।
नासाले केही मुद्दाहरूमा “महत्वपूर्ण प्रगति” भएको जनाएको छ, तर अन्ततः बिना-क्रू फर्काइएका यानका थ्रस्टर समस्याहरू अझै समाधान हुन बाँकी रहेको छ।
“नासाले साझा गरेको विवरणले हामीलाई उनीहरू सही मुख्य मुद्दाहरूमा ध्यान केन्द्रित गर्दैछन् र स्टारलाइनरलाई सुरक्षित रूपमा उडान गर्ने मार्गमा काम गरिरहेका छन् भन्ने कुरामा विश्वस्त बनायो,” प्यानलका सदस्य पाउल हिलले ब्रिफिङमा भने। तर उनले स्टारलाइनर कहिले उडान गर्न सक्छ भन्नेबारे कुनै जानकारी दिएनन्।
प्रकाशित: २३ माघ २०८१, बुधबार
