एआई सर्भरको मजबुत मागसँगै फक्सकनको चौथो त्रैमासिक राजस्व इतिहासकै उच्च

काठमाडौं ।

विश्वकै सबैभन्दा ठूलो कन्ट्र्याक्ट इलेक्ट्रोनिक्स उत्पादक ताइवानको फक्सकनले चौथो त्रैमासिकमा आफ्नो इतिहासकै सबैभन्दा उच्च राजस्व प्राप्त गरेको छ। कृत्रिम बुद्धिमता  (एआई) सर्भरको बलियो मागले यस वृद्धिमा मुख्य भूमिका खेलेको छ।

फक्सकनले आइतबार जारी गरेको वक्तव्यअनुसार एप्पलको सबैभन्दा ठूलो आईफोन एसेम्बलरको राजस्व १५.२ प्रतिशत वृद्धि हुँदै २.१३ ट्रिलियन ताइवान डलर (६४.७२ अर्ब अमेरिकी डलर) पुगेको छ। यो राजस्व एसएसईजी स्मार्टएस्टिमेटको २.१ ट्रिलियन ताइवान डलरको अनुमानलाई समेत पार गरेको रोयटर्सले उल्लेख गरेको छ।

क्लाउड र नेटवर्किङ उत्पादन विभागमा एआई सर्भरको बलियो मागका कारण राजस्वमा उल्लेखनीय वृद्धि भएको कम्पनीले जनाएको छ। यसका ग्राहकहरूमा एआई एआई चिप कम्पनी एनभिडिया समेत सामेल छन्। आईफोन समावेश रहेको स्मार्ट उपभोक्ता इलेक्ट्रोनिक्सको वार्षिक वृद्धिलाई कम्पनीले “लगभग स्थिर” भनेको छ।

डिसेम्बर महिनामा मात्र कम्पनीको कुल राजस्व ६५४.८ अर्ब ताइवान डलर पुगेको छ, जुन वार्षिक रूपमा ४२.३ प्रतिशतले वृद्धि भएको हो। यो डिसेम्बर महिनाका लागि कम्पनीको इतिहासमै दोस्रो उच्च स्तर हो।

फक्सकनले २०२५ को पहिलो त्रैमासिकका लागि “परम्परागत अफ-सीजन” मा प्रवेश गर्ने बताएका छ। अघिल्लो पाँच वर्षको औसत स्तरको प्रदर्शनसँग तुलनात्मक रूपमा यो त्रैमासिक रहने अपेक्षा गरिएको छ। तर, अघिल्लो वर्षको तुलनामा उल्लेखनीय वृद्धि देखिने सम्भावना छ।

२०२४ मा फक्सकनका शेयरहरूमा ७६ प्रतिशतको वृद्धि भएको छ, जसले ताइवान बजारको २८.५ प्रतिशत वृद्धिलाई धेरैले पार गरेको छ। तर शुक्रबार राजस्व डाटा सार्वजनिक हुनु अघि कम्पनीका शेयरहरू ०.८ प्रतिशतले घटेका थिए, जबकि ताइवानको सूचकांक ०.३ प्रतिशतले बढेको थियो।

आधिकारिक रूपमा होन हाई प्रेसिजन इन्डस्ट्रीका नामले चिनिने फक्सकनले चौथो त्रैमासिकको विस्तृत आय विवरण मार्च १४ मा सार्वजनिक गर्ने जनाएको छ।