छुट र अफरले ग्राहक तान्न नसकेपछि टेस्लाका गाडीहरुको वार्षिक माग पहिलो पटक खस्कियो

काठमाडौं ।

टेस्लाले बिहीबार आफ्नो वार्षिक डेलिभरी पहिलो पटक घटेको रिपोर्ट गरेको छ। इलन मस्क नेतृत्वको यो इलेक्ट्रिक गाडी निर्माता कम्पनीले वर्षको अन्त्यतिर दिएको आकर्षक छुट र नयाँ साइबरट्रक पिकअपले उच्च ब्याजदरबाट चिन्तित ग्राहकलाई आकर्षित गर्न सकेन।

मस्क ले सन् २०२४ मा “सामान्य वृद्धि” को पूर्वानुमान गरेका थिए र बिक्री बढाउन शून्य ब्याजदर वित्तीय योजना र निःशुल्क फास्ट-चार्जिङ सहित विभिन्न प्रोत्साहनहरू प्रस्ताव गरेका थिए।

तर युरोपमा सब्सिडी घट्नु, संयुक्त राज्य अमेरिकामा सस्तो हाइब्रिड गाडीहरूतर्फको झुकाव र विशेष गरी चीनको बीवाईडीजस्ता प्रतिस्पर्धीहरूले टेस्ला लाई असर पुर्याएको रोयटर्सले उल्लेख गरेको छ।

यसका कारण टेस्लाको शेयर झन्डै ६ प्रतिशतले घटेर बन्द भयो।

इलेक्ट्रिक गाडीहरूको माग घट्दै गर्दा, मस्क ले टेस्लाको मूल्य वृद्धि गर्न स्वायत्त ट्याक्सी व्यवसायमा ध्यान केन्द्रित गरेका छन्।

मस्क ले राष्ट्रपति-निर्वाचित डोनाल्ड ट्रम्पलाई लाखौं डलरको अभियान चन्दाद्वारा समर्थन गरेका छन्। विश्लेषकहरूले नयाँ प्रशासनबाट सजिलो नियमहरूको अपेक्षा गरेका छन्, जसले दीर्घकालमा टेस्लालाई सहयोग गर्न सक्छ।

तर अटोनोमस प्रविधि अझै विकासको चरणमा रहेको र यसको व्यावसायिकीकरण हुन वर्षौं लाग्ने हुँदा, विश्लेषकहरूले टेस्लाले हालका गाडीहरूको सस्तो संस्करण र साइबरट्रकको सफलतामा निर्भर गर्नुपर्ने बताएका छन्। भविष्यवादी डिजाइनको कारण चर्चित साइबरट्रकको मागमा कमीको संकेत देखिएको छ।

टेस्लाले आफ्नो साइबरट्रकको डेलिभरी संख्या अझै खुलाएको छैन। कम्पनीले बिहीबार ४ लाख ७१ हजार ९३० मोडल ३ र मोडल वाई गाडीहरूका साथमा मोडल एस, साइबरट्रक तथा मोडल एक्सजस्ता अन्य मोडलका २३ हजार ६४० गाडीहरु डेलिभरी गरेको बताएको रिपोर्टमा उल्लेख छ।