नयाँ नियमका कारण एप्पलले अब ईयू देशहरुमा यी आईफोनहरु बिक्री नगर्ने

काठमाडौं ।

एप्पल र युरोपेली संघ (ईयू) बीचको लामो द्वन्द्व अन्ततः नयाँ नियम परिवर्तनसँग टुंगिएको छ। यो हप्ता सुरु हुने नयाँ नियमअनुसार एप्पल र अन्य प्राविधिक कम्पनीहरूले अब युरोपेली देशहरूमा आफ्ना मोबाइल उपकरणहरू यूएसबी-सी चार्जिङ पोर्टसहित मात्र बेच्नुपर्नेछ।

यसको अर्थ, डिसेम्बर २८ देखि एप्पलले पुरानो लाइटनिङ कनेक्टर भएका आईफोनहरू ईयूमा बिक्री गर्न पाउने छैन।

ईयूको कडा प्राविधिक नियमहरूले एप्पललाई आफ्नो उपकरणहरूमा यूएसबी-सी चार्जिङ पोर्ट अनिवार्य रूपमा अपनाउन बाध्य पारेका छन्। यसकारण एप्पलले पुराना मोडेलहरू बजारबाट हटाउन सुरु गरिसकेको छ। स्विजरल्याण्ड जस्ता देशमा यी परिवर्तन अन्यत्रभन्दा छिटो लागू हुने अपेक्षा गरिएको छ।

हटाइने मोडेलहरूमा आईफोन १४ सिरिज र आईफोन एसई २०२२ रहेका छन् भने यी मोडेलहरू २०२५ अघि नै बजारबाट हटाइने न्युज१८ले जनाएको छ। तर एप्पलका आधिकारिक रिटेलरहरूले मौज्दातमा भएका मोडेलहरू बिक्री गरिरहनेछन्।

एप्पलले यूएसबी-सीलाई अपनाउने काम तीव्र गतिमा गरिरहेको बुझिएको छ। सन् २०२५ को सुरुवातमा आउने अपेक्षा गरिएको आगामी आईफोन एसई४ मा पनि यूएसबी-सी उपलब्ध हुनेछ। लाइटनिङमा आधारित अन्य उपकरणहरू पनि कम्पनीले क्रमशः बजारबाट हटाउँदै लैजानेछ।

अन्य देशहरूको स्थिति

न्यूज१८ का अनुसार भारतजस्ता देशमा यस्ता परिवर्तनहरू तत्काल लागू हुने सम्भावना छैन। भारतमा यी पुराना मोडेलहरू सरकारको ईयू -जस्तै नियम पारित नभएसम्म उपलब्ध हुनेछन्।

तर आईफोन १४ र आईफोन एसईका हालका प्रयोगकर्ताहरू आफ्नो उपकरण काम गर्न नछोडेसम्म प्रयोग गर्न सक्छन्।

एप्पलको यूएसबी-सी मा रुपान्तरणका कारण ग्राहकहरूले अब युनिभर्सल चार्जिङ सुविधा पाउनेछन्। तर पुराना मोडेलप्रति लगाव भएका प्रयोगकर्ताहरूले यी परिवर्तनलाई ठूलो छलाङको रूपमा लिने सम्भावना रहेको बताइएको छ।