क्रोम एक्स्टेन्सनमा पहुँच गरी साइबर आक्रमणहरूको श्रृङ्खला चलाउँदै ह्याकरहरु

काठमाडौं ।

डिसेम्बरको मध्यदेखि सुरु भएका साइबर आक्रमणहरूको शृंखलामा, ह्याकरहरूले विभिन्न कम्पनीहरूको क्रोम ब्राउजर एक्सटेन्सनहरूमा पहुँच पाएका छन्। यसबारे एकजना पीडित र यस अभियानको अनुसन्धान गर्ने विज्ञहरूले यस्तो जानकारी दिएका हुन्।

पीडितहरूमध्ये क्यालिफोर्नियामा आधारित डाटा सुरक्षा कम्पनी साइबरहेभन पनि रहेको छ, जसले शुक्रबार उक्त ह्याकको पुष्टि गरेको जनाइएको छ।

“क्रिसमसको अघिल्लो साँझ हाम्रो क्रोम एक्सटेन्सनलाई असर गर्ने दुर्भावनापूर्ण साइबर आक्रमण भएको थियो भन्दै साइबरहेभनले पुष्टि गर्न सक्छ,” वक्तव्यमा उल्लेख गरिएको छ। साइबरहेभनले साइबर सुरक्षा विज्ञहरूको सार्वजनिक टिप्पणीलाई उद्धृत गर्दै यो आक्रमण “विस्तृत अभियानको हिस्सा हुन सक्ने र यसले विभिन्न कम्पनीहरूको क्रोम एक्सटेन्सन डेभलपरहरूलाई निशाना बनाएको बताएको छ।”

यस्ता ह्याकहरूको भौगोलिक दायरा तत्काल स्पष्ट गरिएको छैन।

ब्राउजर एक्सटेन्सनहरू प्रायः इन्टरनेट प्रयोगकर्ताहरूले आफ्नो वेब ब्राउजिङ अनुभवलाई अनुकूल बनाउन प्रयोग गर्छन्, जस्तै शपिङ वेबसाइटहरूमा कुपनहरू स्वचालित रूपमा लागू गर्न। साइबरहेभनको क्रोम एक्सटेन्सनको सन्दर्भमा, यो वेब-आधारित एप्लिकेशनहरूमा बग्ने ग्राहकको डाटालाई निगरानी गर्न र सुरक्षित राख्न प्रयोग गरिन्थ्यो।

रोयटर्सका अनुसार टेक्ससको अस्टिनमा आधारित नज सेक्युरिटीका सहसंस्थापक जाइम ब्लास्कोले साइबरहेभन जस्तै तरिकाले ह्याक गरिएका अन्य क्रोम एक्सटेन्सनहरू पनि देखेका बताएका छन्। उनले कम्तिमा एउटा एक्सटेन्सन डिसेम्बरको मध्यमा प्रभावित भएको बताएका छन्।

ब्लास्कोका अनुसार अन्य प्रभावित एक्सटेन्सनहरू कृत्रिम बुद्धिमत्ता र भर्चुअल प्राइभेट नेटवर्कहरूसँग सम्बन्धित थिए। उनले यसलाई धेरै प्रभावित एक्सटेन्सनहरूमार्फत संवेदनशील डाटा सङ्कलन गर्ने अवसरवादी प्रयासको रूपमा व्याख्या गरेका छन्।

“यो आक्रमण साइबरहेभनमा मात्र लक्षित गरिएको होइन भन्नेमा म लगभग निश्चित छु,” बुलास्कोले भने, “मेरो अनुमानमा, यो केवल र्यान्डम हुन सक्छ।”