Technology Khabar २८ मंसिर २०८१, शुक्रबार
काठमाडौं ।
कृत्रिम बौद्धिकता (एआई) को सहज पहुँचले इन्टरनेटमा नक्कली सामग्रीको बाढी ल्याएको छ। आईडी भेरिफिकेसन प्लेटफर्म समसब का अनुसार २०२३ देखि २०२४ सम्ममा डीपफेकको संख्या विश्वभर चार गुणा बढेको छ।
२०२४ मा, विश्वभरका सबै ठगीका घटनाहरू मध्ये ७% डीपफेकबाट प्रभावित भएको समसबले जनाएको छ। यी घटनाहरूमा नक्कली परिचय, खाता ह्याक, र जटिल सामाजिक इन्जिनियरिङ अभियानहरू समावेश छन्।
डीपफेकविरुद्धको लडाइँमा सहयोग पुर्याउने उद्देश्यले मेटाले AI द्वारा सिर्जना गरिएका भिडियो क्लिपहरूमा सूक्ष्म पानीको छाप अर्थात् वाटरमार्कथप्नको लागि एक उपकरण सार्वजनिक गरेको छ।
मेटा भिडियो सिल नामक यो उपकरण बिहीबार घोषणा गरिएको हो। यो ओपन सोर्समा उपलब्ध छ र विद्यमान सफ्टवेयरमा सजिलै समावेश गर्न मिल्ने गरी डिजाइन गरिएको छ।
यो उपकरण मेटाको अन्य वॉटरमार्किंग उपकरणहरू जस्तै वाटरमार्क एनिथिङ (नयाँ लाइसेन्सअन्तर्गत पुनः जारी) र अडियो सिलको हिस्सा हो।
“एआईद्वारा बनाइएका भिडियो पहिचान गर्न र मौलिकता जोगाउन हामीले भिडियो सिल विकास गरेका हौं,” मेटाका एआई अनुसन्धान वैज्ञानिक पियरे फर्नान्डेजले टेक क्रञ्चलाई बताएका छन्।
Video Seal आफ्नो किसिमको पहिलो प्रविधि भने होइन। डीप माइन्ड को सिन्थआईडी र माइक्रोसफ्टका आफ्नै भिडियो वॉटरमार्किङ विधिहरू पनि उपलब्ध छन्। तर फर्नान्डेजका अनुसार, धेरैजसो हालका उपकरणहरूले प्रभावकारी समाधान प्रदान गर्न सकिरहेका छैनन्।
“अरू उपकरणहरू प्रचलित भिडियो कम्प्रेसनहरू विरुद्ध पर्याप्त मजबुत छैनन्, जसले सामाजिक मिडिया प्लेटफर्महरूमा सामग्री साझा गर्दा समस्या निम्त्याउँछ। तिनीहरू ठूलो परिमाणमा चलाउन सक्षम छैनन्, खुला वा पुन: उत्पादनयोग्य छैनन्, वा तस्बिर वाटरमार्किङबाट व्युत्पन्न भएका छन्, जुन भिडियोका लागि उपयुक्त होइन,” फर्नान्डेजले भने।
टेक क्रञ्चका अनुसार भिडियो सिलले वॉटरमार्कका साथै भिडियोहरूमा एउटा लुकेको सन्देश पनि थप्न सक्छ, जुन पछि यसको उत्पत्ति पत्ता लगाउनका लागि प्रयोग गर्न सकिन्छ। मेटाका अनुसार, यो उपकरण धुमिलाउने, काट्ने, वा कम्प्रेसन एल्गोरिदम जस्ता सामान्य सम्पादनविरुद्ध पनि प्रभावकारी छ।
प्रकाशित: २८ मंसिर २०८१, शुक्रबार
