मेटाले हटायो अनलाइन स्क्यामसम्बद्ध २० लाख एकाउन्ट

काठमाडौं ।

मेटाले म्यानमार, लाओस, कम्बोडिया, संयुक्त अरब इमिरेट्स र फिलिपिन्समा रहेका स्क्याम सेन्टरहरूसँग जोडिएका दुई मिलियनभन्दा बढी अकाउन्टहरू हटाएको छ।

कम्पनीले ‘पिग बुचरिङ’ जस्ता योजनाहरू सञ्चालन गर्ने आपराधिक समूहहरूलाई लक्षित गर्दै विश्वभर मेसेजिङ, डेटिङ, सामाजिक सञ्जाल र क्रिप्टो जस्ता एपहरू प्रयोग गरेर झूटो बहानामा लगानी गराउन मानिसहरूलाई ठग्ने अभियानहरू विरुद्ध कडा कदम चालिरहेको जनाएको छ।

“हामीले कानून कार्यान्वयन निकाय र निजी क्षेत्रका साझेदारहरूसँग सहकार्य गर्दै यी हानिकारक स्क्याम सञ्चालनहरूमा बाधा पुर्‍याउनका लागि जानकारी आदानप्रदान गरिरहेका छौं,” मेटाले जनाएको छ।

न्युज१८ का अनुसार ‘पिग बुचरिङ’ नामक ठगी योजनाहरू सबैभन्दा खतरनाक र जटिल ठगीमध्ये एक हो। यसमा अनलाइनमार्फत विश्वासपूर्ण व्यक्तिगत सम्बन्ध निर्माण गरिन्छ र पछि झूटो लगानी योजनामा थप पैसा लगानी गराउन फसाइन्छ। अक्सर क्रिप्टोक्यारेन्सी प्रयोग गरी पैसा गुमाइन्छ।

मेटाका अनुसार यो खतराको स्तर र जटिलता अभूतपूर्व छ। यूएस इन्स्टिच्युट अफ पिसको अनुमानअनुसार, २०२३ को अन्त्यसम्ममा विश्वभर करिब ३ लाख मानिसहरूलाई यस्ता आपराधिक समूहहरूले ठगी गराउन बाध्य बनाएका छन्, जसबाट वार्षिक ६४ अर्ब डलर ठगी भएको छ।

यी आपराधिक समूहहरूले आफ्ना कर्मचारीहरूलाई क्रिप्टोक्यारेन्सी, जुवा, ऋण र लगानी ठगी (‘पिग बुचरिङ’), सरकारी निकायहरूको नक्कल, र अन्य ठगी कार्यहरू गर्न बाध्य पार्छन्।

विभिन्न इन्टरनेट र टेलिकम सेवाहरूमा, उनीहरू धोकेबाज पहिचान बनाउँछन्। प्राय: आफूलाई आकर्षक एकल व्यक्तिको रूपमा देखाउन वा सरकारी एजेन्सी, सार्वजनिक व्यक्ति वा विश्वासिलो व्यवसायको प्रतिनिधिको रूपमा प्रस्तुत गर्छन्।

यस्ता ठगीहरू डेटिङ एप, टेक्स्ट मेसेज, इमेल, सामाजिक सञ्जाल वा मेसेजिङ एपमार्फत सुरु हुन्छन् र पछि ठगहरूसँग सम्बन्धित क्रिप्टो एप अकाउन्टहरू वा लगानी प्लेटफर्मको रूपमा देखिने स्क्याम वेबसाइटहरूमा जान्छन्।

“थाइल्याण्डको रोयल पुलिसले मेटासँग मिलेर दुई वर्षभन्दा बढी समयदेखि स्क्याम सेन्टरहरूमा बाधा पुर्‍याउने काम गर्दै आएको छ। हामीले जानकारी साटासाट गरी तिनीहरूलाई अनुसन्धान गर्न र अपराधी समूहहरूलाई कारबाही गर्न सहयोग गरेका छौं,” थाइल्याण्डको रोयल पुलिसका मेट्रोपोलिटन पुलिस ब्यूरोका अनुसन्धान विभागका कमान्डर मेजर जनरल थिराडेज थुम्सुटीले भने।