सुपरकम्प्युटरका लागि एनभिडियाको नयाँ ब्ल्याकवेल चिप पहिलोपटक सफ्टब्याङ्कले प्राप्त गर्ने

काठमाडौं ।

सफ्टब्याङ्कको जापानी टेलिकम युनिटले एनभिडियाको नयाँ ब्ल्याकवेल डिजाइन प्रयोग गर्ने पहिलो चिप्स प्राप्त गर्ने भएको छ जसलाई सुपरकम्प्युटरमा प्रयोग गरिनेछ। यो जानकारी क्यालिफोर्नियामा आधारित चिप डिजाइनर एनभिडियाले दिएको रोयटर्सले उल्लेख गरेको छ।

सफ्टब्याङ्क कर्प ले भविष्यमा ग्रेस ब्ल्याकवेल चिप्स प्रयोग गरेर अर्को सुपरकम्प्युटर बनाउने योजना पनि गरिरहेको छ जसलाई एनभिडियाले टोकियोमा भएको एआई इभेन्टमा घोषणा गरेको थियो। उक्त इभेन्टमा सफ्टब्याङ्क ग्रुपका सीईओ मासायोसी सन र एनभिडियाका सीईओ जेन्सेन हुआङ पनि सहभागी भएका थिए।

सन आफ्नो कंग्लोमेरटको एआई  क्षेत्रमा पहुँच बढाउन प्रयासरत छन्। उनले हालै ओपनएआई मा लगानी गरेका छन् र चिप स्टार्टअप ग्राफकोर लाई किनेका छन्। यो सबै केही अस्थिर वर्षहरु पछि भएको हो जसले उनलाई कम्पनीको रणनीति पुन: सोच्न बाध्य बनायो।

रोयटर्सका अनुसार इभेन्टमा दुई व्यवसायीहरुबीच एक “फायरसाइड च्याट” पनि भएको थियो, जहाँ जेन्सेन ले कुनै बेला सनले उनलाई एनभिडिया किन्ने पैसा ऋण दिन प्रस्ताव गरेका सम्झिए किनभने त्यस समयमा बजारले एनभिडिया को मूल्यलाई बुझ्न सकेको थिएन। “उनले मलाई एनभिडिया किन्ने पैसा दिन चाहन्थे। सबै। अहिले मलाई त्यो प्रस्ताव अस्वीकार गरेकोमा पछुतो छ,” हुआङले हाँस्दै भने।

यो प्रस्ताव उनले चिप डिजाइनर आर्म किनेको एक महिनापछि गरेका सनले बताए। पछि उनले एनभिडिया मा लगानी गरे र हिस्सेदारी बिस्तारै बेच्दै गए, अनि आर्मलाई एनभिडिया लाई बेच्न प्रयास गरे जुन नियामक समस्याका कारण असफल भयो।

पहिले गेमिङका लागि ग्राफिक चिप्स डिजाइन गर्ने कम्पनीका रुपमा परिचित रहेको एनभिडिया अहिले यसको चिप्सको अपार मागका कारण विश्वकै सबैभन्दा मूल्यवान कम्पनी बनेको छ।

सनले भविष्यलाई हेर्ने दुरदृष्टिको लागि आफ्नो प्रतिष्ठा बनाएका छन्, जहाँ उनले अलिबाबाजस्ता कम्पनीमा लगानी गरेर ठूला सफलताहरु प्राप्त गरेका छन्, यद्यपि वीवर्क जस्तो असफल लगानी पनि गरेका छन्।

विश्वभरका टेलिकम कम्पनीहरु नयाँ वृद्धिका लागि नयाँ सम्भावनाहरु खोजिरहेका बेला, सफ्टब्याङ्क ले एनभिडिया सँग सहकार्य गरेर फाइभजी र एआई सेवाहरु सँगै सञ्चालन गर्न सक्ने नेटवर्क निर्माण गर्न पाइलट प्रोजेक्ट सुरु गरेको छ।

“यो उस्तै सोचाइ हो जुन हामीलाई महसुस हुन्छ, जस्तै एउटा ब्वाँसाले अर्को ब्वाँसाको गन्ध पाउँछ,” सनले दुई व्यवसायीहरुको समानताबारे भने। “मसँग दुईवटा साना कुकुर छन्। मलाई त्यो मानसिक तस्वीर मन परेन,” हुआङले ठट्टा गर्दै जवाफ दिए।