ब्राजिलमा एक्समाथिको प्रतिबन्ध हटाउन अर्को नयाँ शर्त थपियो

काठमाडौं ।

शुक्रबार ब्राजिलका सर्वोच्च अदालतका न्यायाधीश अलेक्जान्द्रे डी मोराएसले एलन मस्कको एक्स (पहिले ट्विटर) लाई देशमा पुन: सेवा सुरु गर्नका लागि थप सर्तहरू थपेका छन्।

यसको एक दिनअघि मात्र सोसल मिडिया प्लेटफर्मले यसअघि मोराएसले राखेका कानूनी प्रतिनिधि तोक्नेलगायतका सबै मागहरू पूरा गरेको घोषणा गरेको थियो।

डी मोराएसले आफ्नो निर्णयमा मस्कसँग सम्बन्धित अर्को कम्पनी, स्याटेलाइट-आधारित इन्टरनेट सेवा प्रदायक स्टारलिंकले यस मुद्दासँग सम्बन्धित आफ्ना अपिलहरू फिर्ता लिएको खण्डमा मात्र एक्सलाई ब्राजिलमा पुनःस्थापित गरिने जनाएका छन्।

एक्स ब्राजिलमा लगभग एक महिनादेखि प्रतिबन्धित छ। मस्कसँग महिनौँसम्म अभिव्यक्ति स्वतन्त्रता, अतिवादी खाताहरू र गलत सूचना सम्बन्धमा विवादपछि डी मोराएसले सेवा बन्द गर्ने आदेश दिएका थिए।

यसै महिना डी मोराएसले स्टारलिंकको सम्पत्तिहरू एक्सको जरिवाना तिर्नका लागि प्रयोग गर्न आदेश दिएका थिए, जुन ३ मिलियन डलर भन्दा बढी भइसकेको थियो। ब्राजिलका न्यायाधीशले यी दुई कम्पनीहरू एउटै आर्थिक समूहको हिस्सा भएको तर्क गरेका थिए, तर केही कानूनी विशेषज्ञहरूले यसलाई प्रश्न उठाएका छन्।

एक्स (पहिले ट्विटर) लका अनुसार उसले आफ्ना सर्भरहरू परिवर्तन गरेर ल्याटिन अमेरिकामा रहेका ग्राहकहरूको सेवा दिन थालेपछि थाहै नपाई ब्राजिलमा सामाजिक मिडिया नेटवर्क पुनः अनलाइन भयो।

न्यायाधीश डी मोराएसको निर्णयसँग परिचित एक स्रोतले एसोसिएटेड प्रेसलाई बताएका अनुसार न्यायाधीशले हालै थपेका दुवै सर्त नयाँ हुन्।

डी मोराएसले एक्सको नयाँ कानूनी प्रतिनिधिलाई स्वीकृति दिए, तर उनलाई अगस्टमा न्यायाधीशका अन्य निर्णयहरूको पालना नगरेको भन्दै ३००,००० ब्राजिलियन रियाल (करिब ५५,००० डलर) जरिवाना लगाए।

ब्राजिलमा कानूनी प्रतिनिधि नभएको कारणले नै अगस्ट ३० मा एक्सलाई निलम्बन गर्ने उनको निर्णयको कारण बनेको थियो।

कम्पनीको डी मोराएससँग यस वर्षको सुरुबाट नै अभिव्यक्ति स्वतन्त्रता, अतिवादी खाता र प्लेटफर्ममा गलत सूचनासम्बन्धी मुद्दाहरूमा विवाद हुँदै आएको छ, र यसले आफूलाई सेन्सरसिपको शिकार भएको दावी गर्दै आएको छ।

मस्क र उनका समर्थकहरूले डी मोराएसलाई उनको निर्णयका लागि अधिनायकवादी र सेन्सरको रूपमा चित्रण गरेका छन्, तर उनका निर्णयहरू उनका सहकर्मीहरूले पटक-पटक अनुमोदन गरेका छन् — जसमा एक्सको देशव्यापी निलम्बन पनि सामेल छ।

अगस्ट २८ मा एक्सले “तत्काल लागू हुने” गरी ब्राजिलमा रहेका बाँकी सबै कर्मचारीहरू हटाउने र डी मोराएसले देशको कानूनी प्रतिनिधिलाई पक्राउ गर्ने धम्की दिएको आरोप लगाएको घोषणा गरेको थियो।