बढ्दो एआईको मागले विश्वमा चिपको अभाव हुनसक्ने

काठमाडौं ।

आर्टिफिसियल इन्टेलिजेन्स एआईमा केन्द्रित चिप्स र एआई-सक्षम स्मार्टफोन तथा ल्यापटपहरूको बढ्दो मागले अर्को विश्वव्यापी चिप अभाव निम्त्याउन सक्ने सम्भावना छ। यो आकलन बुधबार जारी गरिएको ब्रेन एण्ड को को एक रिपोर्टमा उल्लेख छ।

सीएनबीसीमा उल्लेख भए अनुसार कोभिड-१९ महामारीको समयमा आपूर्ति श्रृंखला अवरुद्ध हुनुका साथै उपभोक्ता इलेक्ट्रोनिक्सको माग बढेका कारण पछिल्लो ठूलो सेमिकन्डक्टर अभाव देखा परेको थियो किनभने मानिसहरू घरबाटै काम गर्न बाध्य थिए।

प्रविधि दिग्गजहरूले मुख्यतया एनभिडियाबाट ग्राफिक्स प्रोसेसिङ युनिटहरू खरिद गरिरहेका छन्। यी जीपीयूहरु डाटा सेन्टरमा राखिएका हुन्छन् र ठूला एआई मोडेलहरूको प्रशिक्षणका लागि अत्यावश्यक हुन्छन्।

यी  ठूला एआई मोडेलहरू ओपनएआईको च्याटजीपीटीजस्ता एप्लिकेसनहरूलाई आधार दिने प्रोग्रामहरु हुन्।

यसैबीच क्वालकमजस्ता कम्पनीहरूले स्मार्टफोन र व्यक्तिगत कम्प्युटरहरूमा प्रयोग हुने चिप्स डिजाइन गर्दैछन्, जसले यी उपकरणहरूलाई क्लाउडको इन्टरनेट कनेक्शन बिना नै स्थानीय रूपमा एआई एप्लिकेसनहरू चलाउन सक्षम बनाउँछन्।

यस्ता उपकरणहरूलाई अक्सर एई-सक्षम उपकरण भनिन्छ, र सामसङदेखि माइक्रोसफ्टसम्मका कम्पनीहरूले यस्ता उत्पादनहरू जारी गरिसकेका छन्।

रिपोर्टले जीपीयू र एआई-केन्द्रित उपभोक्ता इलेक्ट्रोनिक्सहरूको मागमा वृद्धि आगामी चिप अभावको कारण बन्न सक्ने संकेत गरेको छ। बेनका अमेरिकी प्रविधि क्षेत्र प्रमुख एनी होएकरले सीएनबीसीलाई इमेलमार्फत भने, “ग्राफिक्स प्रोसेसिङ युनिट्स (जीपीयू) को बढ्दो मागले सेमीकन्डक्टर मूल्य श्रृंखलाका विशेष तत्त्वहरूको अभाव निम्त्याएको छ।”

यदि जीपीयूको मागमा वृद्धि र एआई-सक्षम उपकरणहरूको लहरले पीसी उत्पादन चक्रलाई तीव्र बनायो भने सेमीकन्डक्टर आपूर्तिमा व्यापक बाधा उत्पन्न हुन सक्ने सम्भावना रहेको छ।

तर, उपभोक्ताहरूले यस्ता एआई-सक्षम उपकरणहरूप्रति हालसम्म सतर्क दृष्टिकोण अपनाएका कारण यी उपकरणहरूको वास्तविक माग कति हुनेछ भन्ने स्पष्ट छैन।

सेमिकन्डक्टर आपूर्ति श्रृंखला “अत्यन्तै जटिल” रहेको र लगभग २०% वा सो भन्दा बढीको माग वृद्धिले सन्तुलन खल्बल्याउने र चिप अभाव उत्पन्न गर्ने उच्च सम्भावना रहेको बेनले उल्लेख गरेको छ।

रिपोर्टले थपे अनुसार, “विभिन्न ठूला अन्तिम बजारहरूमा एआईको तीव्र वृद्धिले यो सीमारेखालाई सजिलै पार गर्न सक्छ, जसले आपूर्ति श्रृंखलामा विभिन्न कमजोर स्थानहरू सिर्जना गर्नेछ।”