ओपनएआईका तीन मुख्य प्राविधिकले दिए एकमुष्ट राजीनामा

काठमाडौं ।

बुधबारमा माइक्रोसफ्टद्वारा समर्थित ओपनएआईका तीनजना प्रमुख प्राविधिक कर्मचारीले राजीनामा दिएका छन्। जसबाट यस वर्षको उच्च स्तरका अधिकारीहरूको पदत्यागको श्रृंखलामा अझ थप गरेको छ।

च्याटजीपीटी निर्माता कम्पनीका लागि यो परिवर्तनको समय हो।
मुख्य प्राविधिक अधिकारी (सीटीओ) मीरा मुराटी, उपाध्यक्ष अनुसन्धान (भीपी रिसर्च) ब्यारेट जोफ, र मुख्य अनुसन्धान अधिकारी (सीआरओ) बब म्युग्रूले बुधबार दिउँसो एक्स अर्थात् पूर्व ट्विटरमार्फत आफ्नो राजीनामा घोषणा गरेका हुन्।

सान फ्रान्सिस्कोमा आधारित यो आर्टिफिसियल इन्टेलिजेन्सस्टार्टअप कम्पनी अहिले नयाँ साढे ६ अर्ब डलर लगानी चरणमा छलफल गर्दैछ, जसले कम्पनीलाई १५० अर्ब डलरको मूल्यांकनमा पुर्याउनेछ।

तर यो लगानी कम्पनीले आफ्नो संस्थागत संरचनामा परिवर्तन गरेपछि मात्र सम्भव हुने रोयटर्सले उल्लेख गरेको छ।

कम्पनीले आफ्नो संरचना परिवर्तन गरी लाभका लागि काम गर्ने संस्था बनाउने योजना बनाएको छ, र यस क्रममा सीईओ साम अल्टम्यानलाई कम्पनीमा सेयर दिने बुधबार रोयटर्सले लेखेको छ।

हाल एक गैर-नाफामुखी बोर्डले नाफामुखी इकाईलाई नियन्त्रण गर्छ, जुन असाधारण संरचना हो। यसै कारण २०२३ नोभेम्बरमा सञ्चारमा आएको असमझदारी र विश्वासको कमीका कारण गैर-नाफामुखी बोर्डका सदस्यहरूले अल्टम्यानलाई हटाएका थिए। तर पाँच दिनपछि उनलाई पुनः नियुक्त गरिएको थियो।

हालसम्म लगानीको यो चरण पूरा भएको छैन र कम्पनीले यसलाई अन्तिम रूप दिने प्रक्रियामा छ।

कार्यकारीहरूको राजीनामाले लगानी संकलन प्रक्रियामा असर गर्ने वा नगर्ने भन्ने अझै स्पष्ट छैन। केही लगानीका कागजातहरूमा “गम्भीर प्रतिकूल परिवर्तन” नामक प्रावधान हुन्छ, जसले कुनै पनि कम्पनीमा ठूलो नकारात्मक असर परेमा लगानीकर्तालाई सम्झौता तोड्न अनुमति दिन्छ।

मीरा मुराटी अहिले पनि ओपनएआईमा काम गरिरहेकी छिन्, र उनको राजीनामा सम्झौताबारे छलफल भइरहेको मुराटीको नजिकका स्रोतले जानकारी दिएका छन्।

उनी च्याटजीपीटी निर्माता कम्पनीमा ६ वर्षभन्दा बढी समयदेखि आवद्ध छिन्, र गत उनले नोभेम्बरमा केही दिन सीईओको रूपमा पनि काम गरेकी थिइन्।