ब्राजिलमा हट्यो स्टारलिंक र एक्सका बैंक खाताहरूमा लगाइएको रोक

काठमाडौं ।

ब्राजिलको सर्वोच्च अदालतका न्यायाधीश एलेक्जान्डर डे मोराएसले पहिले जफत गरिएको स्टारलिंक र एक्सका बैंक खाताहरूमा लगाइएको रोक हटाउने निर्णय गरेका छन्। उनले १८.३५ मिलियन ब्राजिलियन रियाल (३.३ मिलियन डलर) राष्ट्रिय कोषमा स्थानान्तरण गर्न आदेश दिएका थिए।

शुक्रबारको अदालतको वक्तव्य अनुसार ब्राजिललाई तिर्नुपर्ने कुल रकम स्थानान्तरण भइसकेकाले यो रोक हटाइएको हो। यो मुद्दा अर्बपति एलन मस्क र मोराएसबीचको विवादका क्रममा लगाइएको जरिवानासँग सम्बन्धित थियो।

न्यायाधीशले एक्स सोशल मिडिया प्लेटफर्ममा झुटा समाचार र घृणा सन्देश फैलाइरहेका र लोकतन्त्रलाई खतरा पुर्‍याउने खालका केही आपत्तिजनक खाताहरूलाई बन्द नगरेकाले ब्राजिलमा एक्समाथि प्रतिबन्ध लगाउन आदेश दिएका थिए।

मस्कले यी आदेशलाई चुनौती दिँदै यसलाई “सेन्सरशिप” भनेका थिए। साथै एक्सले ब्राजिलको कानुनअनुसार स्थानीय कानूनी प्रतिनिधि तोक्न असफल भएको थियो र अदालतको आदेश पालना गर्न दिएको समयसीमा उल्लङ्घन गरेको थियो। यसका कारण मोराएसले एक्सको जरिबाना तिर्नको लागि स्टारलिंकका खाताहरू रोक्का गर्न आदेश दिएका थिए।

सर्वोच्च अदालतले भनेको छ कि मोराएसले एक्सको पहुँच बन्द गर्ने निर्णयलाई फिर्ता लिएका छैनन् किनकि कानूनी प्रतिनिधिको अभावको समस्या समाधान भएको छैन र न्यायाधीशले आदेश दिएका सामग्री हटाउने कार्य पूरा भएको छैन।

एक्स र ४०% स्टारलिंकको मातृ कम्पनी स्पेसएक्सका मालिक मस्क इलेक्ट्रिक गाडी निर्माता टेस्लाका सीईओ पनि हुन्।