Technology Khabar ३० असार २०८१, आईतवार
काठमाडौं ।
नेपाल दूरसञ्चार प्राधिकरण, स्वतन्त्र कर्मचारी युनियनले आफूले विभिन्न समयमा राखेका मागहरु सम्बोधन नभएको भन्दै आन्दोलनको घोषणा गरेको छ।
युनियनका अध्यक्ष शिव राज जैसीद्वारा प्राधिकरणका अध्यक्षलाई लेखेको पत्रमा आफ्ना मागहरु १० दिनभित्र सम्बोधन नगरिए लगत्तै चरणबद्ध आन्दोलन गर्ने घोषणा र अध्यक्षलाई कार्यालयमा निषेध गर्नेसम्मको तालिका सार्वजनिक गरेको छ।
कर्मचारी युनियनले यसअघि प्राधिकरणको संस्थागत, संरचनागत र ब्यबस्थापकीय पक्षको सुधार गर्नका लागि रचनात्मक सुझाबसहित विभिन्न माग पेश गरेको बारेमा स्मरण गराउँदै युनियनले २०८० जेठ २४ गते तिस दिने समयसिमा दिई माग सम्बोधनको लागि प्राधिकरणको पुनः ध्यानाकर्षण गराएको थियो।
तर युनियनले पेश गरेका मागहरूमा मुखदर्शक भई हालसम्म कुनै पनि माग सम्बोधन नभएको भन्दै, दूरसञ्चार प्राधिकरण, स्वतन्त्र कर्मचारी युनियन आफ्ना सम्पूर्ण युनियन सदस्यहरूको बिस्तारित बैठकबाट पारित कार्यदिशा बमोजिम दश दिने अल्टिमेटम दिएको हो।
उक्त समयावधि भित्रै तोकिएका मागहरु पुरा गर्न युनियनले अध्यक्षसँग आग्रह गरेको छ।
युनियनले पेश गरेको मागहरूलाई प्राधिकरणबाट प्राथमिकता प्रदान नगरी १० दिनभित्र मागहरू सम्बोधन नभएमा गरिने चरणबद्ध आन्दोलनका कार्यक्रम तालिका समेत सार्वजनिक गरेको छ।
जसअनुसार युनियनले पहिलो चरणमा चार दिन कालो ब्यानर र कालो पट्टि बाँध्ने भएको छ भने दोस्रो चरणमा दुई दिनसम्म पहिलो आधा दिन पेन डाउन गर्ने भएको छ।
यसैगरी तेस्रो चरणमा डिजिटल सिग्नेचर व्यवस्थापनलाई बुझाएर प्राधिकरणको कामकारबाही ठप्प पार्दै एक सातासम्म अध्यक्षको कार्यकक्ष घेराउ गर्ने योजना राखेको छ।
यस अवधिमा समेत माग सम्बोधन नभएको खण्डमा नेपाल दूरसञ्चार प्राधिकरण, स्वतन्त्र कर्मचारी युनियनले माग पुरा नभएसम्मको अवधिका लागि अध्यक्षलाई कार्यालय प्रवेश निषेध गर्ने भएको छ।
यसैगरी युनियनले मुख्य चार मागहरु तत्काल पुरा गर्न समेत अध्यक्षसँग आग्रह गरेको छ।
यस्ता छन चार मागहरु-
१. नेपाल दूरसञ्चार प्राधिकरणको आफ्नै स्वामित्वको घर/जग्गा तथा भवन निर्माण कार्यको सुनिश्चितता गर्नको लागि जोडदार माग गर्दछौ ।
२. मौजुदा नेपाल दूरसञ्चार प्राधिकरणको भवनमा कार्य सम्पादनका दृष्टिकोणले उचित र पर्याप्त अक्सिजन र प्रकाशको न्युनतम मापदण्ड समेत नपुगेकोले अधिकांश कर्मचारीहरु स्वास्थ्य समस्या देखिएको सन्दर्भमा उचित स्वास्थ्य वातावरणमा काम गर्ने वातावरण निर्माण गर्नको लागि जोडदार माग गर्दछौ ।
३. नेपाल दूरसञ्चार प्राधिकरणका कर्मचारीहरूसँग सम्बन्धित नीति, नियम, गुरूयोजना, पदपूर्ति तथा ओ एण्ड एम सर्भे लगायतका विषयहरूमा कर्मचारीहरूको हक हित, उत्प्रेरणा, पूर्वानुमानयोग्य वृति-विकास सुनिश्चितता हुने गरी तत्काल अगाडी बढाउनको लागि जोडदार माग गर्दछौ।
४. समग्र दूरसञ्चार सुधारको लागि यस युनियनले पेश गरेको मागहरू अक्षरस; कार्यान्वयन गर्नको लागि पुनः जोडदार माग गर्दछौँ।
साथै आन्दोलनबाट सिर्जित हुने सम्पूर्ण परिमाणको जिम्मेवारी स्वयं प्राधिकरण व्यवस्थापन हुने चेतावनी समेत युनियले दिएको छ।
प्रकाशित: ३० असार २०८१, आईतवार
